ކޮވިޑްގެ ނުރައްކާތެރި ހާލަތުގައި މަގުމަތީ މުޒާހަރާ ލީޑް ކުރީ މުއިއްޒު: ޝިފާޒް

ދުނިޔެއަށް މި ފަހުގެ ތާރީޚެއްގައި ކުރިމަތިވި ސިއްހީ އެންމެ ނުރައްކާތެރި ބަލިމަޑުކަމުގެ އާލަމީ ވަބާގެ ދުވަސްވަރު އެއްވުންތައް ނުބޭއްވުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އަންގާފައި އޮއްވާ އެއާ ޚިލާފަށް މަގުމަތީގައި ޕީޕީއެމް/ޕީއެންސީ އިން މުޒާހަރާތައް ބޭއްވި އިރު އެ މުޒާހަރާތައް ލީޑު ކުރެއްވުމުގައި ހުންނެވީ މިހާރުގެ ރައީސް މުހައްމަދު މުއިއްޒު ކަން އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް ހަނދާން ކޮށްދެއްވައިފިއެވެ.

'ފުދިއްޖެ ފުނޑިއްޖެ' ނަމުގައި ބޮޑު ހިނގާލުމަށް ގިނަ އަދަދެއްގެ ދިވެހި ރައްޔިތުން ތައްޔާރުވަމުންދާއިރު، ރައީސް މުއިއްޒުގެ ސަރުކާރުން އެކި ގޮތްގޮތުން އެ އެއްވުމަށް ހުރަސް އެޅުމަށް ދަނީ މަސައްކަތް ކުރަމުންނެވެ. ސަރުކާރުގެ ބައެއް ކުންފުނިތަކުގެ މުވައްޒަފުންނަށް ވެސް އެއްވުމަށް ނުދާން ވަނީ އަންގާފައި ކަމަށް މައުލޫމާތު ލިބިފައިވެއެވެ.

ހުކުރު ދުވަހުގެ ރޭ 8:00 ގައި މާލޭ އާޓިފިޝަލް ބީޗް ސަރަހައްދުން ފެށުމަށް ހަމަ ޖެހިފައިވާ އެއްވުމަށް ތައްޔާރު ވަމުން ދަނިކޮށް ހުކުރުވިލޭރޭ ކުއްލިއަކަށް ގިނަ އަދަދެއްގެ އަސްކަރީ އުޅަނދުތަކާއެކު މާލޭގެ މަގުމައްޗަށް ސިފައިން ނެރެ ހަރަކާތްތަކެއް ވަނީ ހިންގާފައެވެ.

ހުކުރު ދުވަހުގެ ހަވީރަށް ވީ އިރު މާލޭގެ އެތައް ސަރަހައްދެއްގައި ފުލުހުން ވަނީ ބެރިކޭޑް ޖަހާ ބަންދުކޮށްފައެވެ.

ބާރަށު ދާއިރާގެ މެމްބަރުކަން ވެސް ކުރިން ކުރެއްވި ޝިފާޒް ހުކުރު ދުވަހު އެކްސް ގައި ކުރެއްވި ޕޯސްޓެއްގައި ވިދާޅުވީ: "ކޮވިޑް ލޮކްޑައުން ތެރޭ އެޗްޕީއޭ މިންގަނޑުތަކާ ޚިލާފަށް މުޒާހަރާ ލީޑުކުރީ މުއިއްޒު ކަން ސަލާމަތީ ޚިދުމަތްތަކުން މިރޭ ދަންނަންވާނެ. މިހާރު އެފަދަ އެއްނުވެވޭނެ ހާލަތެއް އަމުދުން ނެތްއިރު މުޒާހަރާ ކުރުމުގެ ހައްގަށް ތިބޭފުޅުން އިހުތިރާމް ކުރައްވަންވާނެ،" ކަމަށެވެ.

ޕީޕީއެމް/ޕީއެންސީ އިން މާލޭގެ މަގުތަކަށް ގިނަ ބަޔަކު ނެރެ 2020 ވަނަ އަހަރު މުޒާހަރާތައް ކުރި އިރު، ކޮވިޑް-19 ގެ ނުރައްކަލުގެ މިންވަރު އޮތީ ވަރަށް ބިރުވެރި ދަރަޖައެއްގައި ކަމަށާއި އަދި އިންޒާރުގެ ލެވެލް 9 ގައި އޮތް ކަމަށް ބުނެ، ކަމާބެހޭ އިދާރާތަކުން ދިޔައީ އާންމު ރައްޔިތުންނަށް ރައްކާތެރިކަމުގެ އިރުޝާދުތަކަށް ތަބާވުމަށާއި އަދި ވައިރަސް އިތުރަށް ފެތުރުން ހުއްޓުވުމަށް ކެނޑިނޭޅި އިލްތިމާސް ކުރަމުންނެވެ.

ކޮވިޑްގެ ދުވަސްވަރު މުޒާހަރާތައް ކުރަމުން ދިއުމާއެކު ހެލްތު އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، ޗީފް ސުޕްރިންޓެންޑެންޓް އޮފް ޕޮލިސް އަބްދުﷲ ޝަރީފް އޭރު ވިދާޅުވީ އެ ޙާލަތުގައި އިހުތިޖާޖުތަކާއި މުޒާހަރާތައް ބޭއްވުމަކީ މަނާކަމެއް ކަމަށެވެ. އަދި މިފަދަ ކަންކަމަށް ޙާޟިރުވުމުގެ ސަބަބުން ފުލުހުން ކަރަންޓީނު ކުރަންޖެހި އަދި އެކަހެރި ކުރަންޖެހޭ ކަމަށްވެސް ވިދާޅުވެފައިވެއެވެ.