އެމްޑީޕީގެ 'ފުދިއްޖެ ފުނޑިއްޖެ' ބޮޑު ހިނގާލުމަށް ރަށްރަށުންވެސް މީހުން އަންނަނީ
މާލޭގެ މަގުތަކުގައި އޮންނަ ހިނގާލުން ފެށުމަށް ހަމަޖެހިފައިވަނީ ހުކުރު ދުވަހުގެ ރޭ 8:00 ގައި
ފުދިއްޖެ ފުނޑިއްޖެ ހިނގާލުމަށް މާލެ އަންނަ ޓީމެއް ފުރަން ބަނދަރުގައި
ޖެނުއަރީ 31 ވާ ހުކުރު ދުވަހުގެ ރޭ 8:00 ގައި މާލޭގައި ރާއްޖޭގެ އެންމެ ބޮޑު އިދިކޮޅު ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ބާއްވާ ބޮޑު ހިނގާލުމަށް ގިނަ އަދަދެއްގެ ބަޔަކު ރަށްރަށުންވެސް މާލެ އަންނަމުން އެބަދެއެވެ.
ޕާޓީ ދިދަ ހިފައިގެން ލޯންޗު ފަހަރުގައި ފޯރީގައި މާލެ އަށް އަންނަމުންދާ ޓީމުތަކުގެ ވީޑިއޯ ތަކާއި ފޮޓޯ ތައް ސޯޝަލް މީޑިއާގައިވެސް ވަނީ އާންމު ވެފައެވެ.
'ފުދިއްޖެ ފުނޑިއްޖެ' ނަމުގައި އިންތިޒާމު ކުރާ މި ހިނގާލުމަކީ ރައީސް މުއިއްޒުގެ ބާރުން ގާނޫނު އަސާސީ އަށް ކުއްލި ބަދަލެއް ގެނެސް ހުރިހާ ބާރުތަކެއް އެމަނިކުފާނުގެ އަތްޕުޅަށް ނަންގަވާ، ތިންބާރު ވަކިވެފައި އޮތް ނިޒާމު ގަޑުބަޑުވަމުން ގޮސް ޑިމޮކްރަސީގެ ސިފަތައް ގެއްލި ޚުދުމުޚުތާރު ވެރިކަމަކާ ދިމާލަށް ރާއްޖޭގެ ވެރިކަން ދާތީ އެކަމާ ނުރުހުން ފާޅު ކުރުމާއި، ތަކެތީގެ އަގު ބޮޑުވުމާއި، ސަރުކާރުގެ ތެރޭގައި ވައްކަމާއި ކަރަޕްޝަން އިތުރުވެފައި ވުމާއި، ބޭސްފަރުވާ އަށް ބޭނުންވާ މީހުންނަށް ސަރުކާރުން އެހީތެރިކަން ނުލިބުމާއި ރަށްރަށުގެ ތަރައްގީ އަށް ކުރަން ފަށާފައި ހުރި މަސައްކަތްތައް ހުއްޓިފައި އޮންނަތާ އަހަރަކަށް ވުރެ ގިނަ ދުވަސްވުން ފަދަ އެތައް ކަންތައްތަކާ މެދު ނުރުހުން ފާޅު ކޮށް، ގާނޫނު އަސާސީ އިން ރައްޔިތުންނަށް ލިބިދީފައިވާ އެއްވެ އުޅުމާއި ޚިޔާލު ފާޅު ކުރުމުގެ މިނިވަންކަމުގެ ހައްގުގެ ބޭނުން ހިފައިގެން ބާއްވާ ހިނގާލުމެއް ކަމަށް އެމްޑީޕީ އިން ވަނީ ބުނެފައެވެ.
ސުލްހަވެރި ހިނގާލުމުގައި ގިނަ އަދަދެއްގެ ބަޔަކު ބައިވެރިވާނެ ކަމަށް ބެލެވިފައިވާއިރު، ހިނގާލުމުގެ އިންތިޒާމުތައް ފޯރީގައި އެމްޑީޕީގެ ފަރާތުން އަންނަނީ ކުރަމުންނެވެ.
މާލޭގެ މަގުތަކުގައި އޮންނަ ހިނގާލުން ފެށުމަށް ހަމަޖެހިފައިވަނީ ހުކުރު ދުވަހުގެ ރޭ 8:00 ގައެވެ.
