ދަރަނި އަނބުރާ ދެއްކުން ނުހިމަނައި 2023 ވަނަ އަހަރުގެ ސެޕްޓެމްބަރު މަހާ އަޅާބަލާއިރު ސަރުކާރުގެ ޖުމްލަ ޚަރަދު 2024 ވަނަ އަހަރުގެ ސެޕްޓެމްބަރު މަހު 1.2 ބިލިއަން ރުފިޔާ އިތުރުވެއްޖެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ. އެއީ 32 އިންސައްތައިގެ މަތިވުމެކެވެ.

އެމްއެމްއޭ އިން އެންމެ ފަހުން ޝާއިއު ކުރި އިކޮނޮމިކް އަޕްޑޭޓްގައި ބުނެފައިވަނީ ޚަރަދުތައް މައްޗަށް ގޮސްފައިވަނީ މައިގަނޑު ގޮތެއްގައި ކެޕިޓަލް ޚަރަދު 721.9 މިލިއަން ރުފިޔާ އިތުރުވުމުގެ ސަބަބުން ކަމަށެވެ. މީގެ އިތުރުން، 2023 ވަނަ އަހަރުގެ ސެޕްޓެމްބަރު މަހާ އަޅާބަލާއިރު 2024 ވަނަ އަހަރުގެ ސެޕްޓެމްބަރު މަހު ރިކަރަންޓް ޚަރަދު 443 މިލިއަން ރުފިޔާ އިތުރުވެފައިވެއެވެ.  

އެންމެ ފަހުން ލިބެން ހުރި މަޢުލޫމާތުތަކަށް ބަލާއިރު، 2024 ވަނަ އަހަރުގެ ފުރަތަމަ ކުއާޓަރުގެ ނިޔަލަށް ސަރުކާރުގެ ޖުމްލަ ދަރަނި (ސަރުކާރުން ގެރެންޓީ ދީފައިވާ ދަރަނި ނުހިމަނައި) 112.2 ބިލިއަން ރުފިޔާ އަށް އަރާފައިވެއެވެ. މިއީ 2023 ވަނަ އަހަރުގެ ހަތަރު ވަނަ ކުއާޓަރާ އަޅާބަލާއިރު 1 އިން ސައްތަ އިތުރުވުމެކެވެ. އަދި ޖީޑީޕީގެ ނިސްބަތުން ބަލާއިރު ސަރުކާރުގެ ޖުމްލަ ދަރަނި 2023 ވަނަ އަހަރުގެ ހަތަރު ވަނަ ކުއާޓަރުގައި 103 އިންސައްތައިގައި ހުރި އިރު 2024 ވަނަ އަހަރުގެ ފުރަތަމަ ކުއާޓަރުގެ ނިޔަލަށް 98 އިންސައްތަ އަށް ދަށްވެފައިވެއެވެ. މި މުއްދަތުގައި ސަރުކާރުގެ ދަރަނި އިތުރުވެފައި ވަނީ މައިގަނޑު ގޮތެއްގައި އެތެރޭގެ ދަރަނީގެ ސަބަބުން ކަމަށް ވެސް އެމްއެމްއޭ އިން ބުނެފައިވެއެވެ.

ޖުމްލަ އާމްދަނީ އަށް ބަލާއިރު ހިލޭ އެހީ ނުހިމަނައި، 2023 ވަނަ އަހަރުގެ ސެޕްޓެމްބަރު މަހާ އަޅާބަލާއިރު 2024 ވަނަ އަހަރުގެ ސެޕްޓެމްބަރު މަހު 1.1 ބިލިއަން ރުފިޔާ އިތުރުވެފައިވެއެވެ. އެއީ 62 އިންސައްތައިގެ އިތުރުވުމެކެވެ.

އާމްދަނީ އިތުރުވެފައިވަނީ ޓެކްސް އަދި ޓެކްސް ނޫން އާމްދަނީ އިތުރުވުމުގެ ސަބަބުން ކަމަށް އެމްއެމްއޭ އިން ބުނެފައިވެއެވެ. މިގޮތުން، ޓެކްސް އާމްދަނީ 600.4 މިލިއަން ރުފިޔާ އިތުރުވެފައިވާއިރު، ޓެކްސް ނޫން އާމްދަނީ 512.4 މިލިއަން ރުފިޔާ އިތުރުވެފައިވެއެވެ.