ޖެހިޖެހިގެން ދެވަނަ މަހު ރިޒާވް ދަށަށް ހިނގައްޖެ

ޖެހިޖެހިގެން ދެވަނަ މަހު ރާއްޖޭގެ ރިޒާވް ދަށަށް ގޮސްފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ރިޕޯޓަކުން ހާމަ ވެއްޖެއެވެ.

2025 ވަނަ އަހަރުގެ ޖުލައި މަހު ދިވެހިރާއްޖޭގެ މާލީ ހާލަތު ހާމަ ކޮށް އެމްއެމްއޭ އިން އެންމެ ފަހުން ނެރުނު އިޤްްތިޞާދީ އަޕްޑޭޓުގައިވާ ގޮތުން، ރިޒާވް ފައިސާ ޖޫން މަހު ދަށަށް ދިޔުމަށް ފަހު ޖުލައި މަހު ވެސް ވަނީ ދަށަށް ގޮސްފައެވެ.

ޖުލައި މަހުގެ ނިޔަލަށް ރިޒާވް ފައިސާ ވަނީ 2 އިންސައްތަ ދަށަށް ގޮސްފައެވެ. މިއީ ވިދިވިދިގެން ދެވަނަ މަހަށް ރިޒާވް ފައިސާ ދަށަށް ދިއުމެވެ. ޖޫން މަހު ރިޒާވް ފައިސާ 1 އިންސައްތަ ވަނީ ދަށަށް ގޮސްފައެވެ. އެއާއެކު ބޭރު ފައިސާގެ ވަސީލަތްތައް ވަނީ މަދުވެފައެވެ.

ޖުމްލަ ބައިނަލްއަޤްވާމީ ރިޒަރވް ނުވަތަ ރަސްމީ ރިޒަރވް އެސެޓްސް 2025 ވަނަ އަހަރުގެ ޖޫން މަހުގެ ނިޔަލަށް 832.4 މިލިއަން އެމެރިކާ ޑޮލަރު ގައި ހުރި އިރު، ޖުލައި މަހުގެ ނިޔަލަށް 774.5 މިލިއަން އެމެރިކާ ޑޮލަރަށް ދަށްވެފައިވެއެވެ.