ޓީބިލު ވިއްކައިގެން ދަރަންޏަށް 2.26 ބިލިއަން ރުފިޔާ ސަރުކާރުން ހޯދަނީ

ސަރުކާރުން ދަރަންޏަށް 2.26 ބިލިއަން ރުފިޔާ ހޯދުމަށް ޓްރެޜަރީ ބިލް (ޓީ-ބިލް) ވިއްކުމަށް އިޢުލާނުކޮށްފިއެވެ.

މިނިސްޓްރީ އޮފް ފިނޭންސްއިން ކޮށްފައިވާ އިއުލާނުގައި ވަނީ 21 ސެޕްޓެމްބަރ 2025 ގައި ސަބްސްކްރިޕްޝަން ހުޅުވައި، 22 ސެޕްޓެމްބަރ 2025 ގައި ސެޓްލްމަންޓް ހަމަޖައްސަން ޖެހޭ ގޮތަށެވެ.

އިޢުލާނުގައިވާ ގޮތުން، މި ފަހަރުވެސް ޓީބިލު ވިއްކަނީ ތަފާތު އިންޓަރެސްޓް ރޭޓްތަކެއްގައި ހަތަރު މެޗޫރިޓީ މުއްދަތެއް ހިމެނޭ ގޮތަށެވެ.

އެގޮތުން 28 ދުވަހުގެ މުއްދަތަށް 3.50 އިންސައްތައިގެ ރޭޓުގައި 384 މިލިއަން ރުފިޔާ، އަދި 98 ދުވަހުގެ މުއްދަތަށް 3.87 އިންސައްތައިގެ ރޭޓުގައި 402.25 މިލިއަން ރުފިޔާގެ ޓީބިލު ވިއްކުމަށް ވަނީ ހަމަޖެހިފައެވެ. އަދި 182 ދުވަހުން މެޗުއަރވާ ގޮތައް 4.23 އިންސައްތައިގެ ރޭޓުގައި 576 މިލިއަން ރުފިޔާގެ ޓީބިލު ވިއްކުމަށް ހަމަޖެހިފައިވެއެވެ. އެންމެ ގިނަ ޓީބީލު ހިމެނޭ ކެޓަގަރީގައި ހިމެނެނީ 364 ދުވަހުގެ މުއްދަތަށް 4.60 އިންސައްތައިގެ ރޭޓުގައި ވިއްކާ 896.9 މިލިއަން ރުފިޔާގެ ބިލެވެ.

ސަރުކާރުން ޓީބިލު ވިއްކަނީ އެތެރެއިން ދަރަނި ހޯދައިގެން ސަރުކާރުގެ ޚަރަދުތައް ފޫބެއްދުމަށެވެ.

ސަރުކާރުން ޚަރަދުތައް ހަމަ ޖެއްސުމަށް ޓީ-ބިލް ވިއްކައިގެން ފައިސާ ހޯދުމަށް ވަރަށް ބޮޑަށް ބަރޯސާވަމުންދާކަން ފާހަގަ ކުރެވޭ އިރު، ސަރުކާރުގެ އެތެރޭގެ ދަރަނި މިއާ އެކު މައްޗަށްދާކަން ވެސް ފާހަގަ ކުރެވެއެވެ.