ބަންކަރިން އާއި މެދު ދެއްކި ވާހަކަތަކުގައި ސައީދުގެ ރާގު މުޅިން ބަދަލުވެއްޖެ

އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި އިކޮނޮމިކް މިނިސްޓަރ ސައީދު އާއި ކުރި ގިނަ ސުވާލުތަކަށް ސީދާ ޖަވާބެއް ނުދެއްވައެވެ. މާލީ ހާލަތު ދަށްވެެގެން ސުވާލުކުރުމުން ވިދާޅުވި އަދި ރަނގަޅުވާނެކަމުގެ ވާހަކައެވެ. މާލީ ހާލަތު ގޯސްވާ ސަބަބު ވިދާޅުވެ ނުދެއްވުނު ތަނުގައި އިމްޕޯޓް ޑިއުޓީ ދަށްވާ ސަބަބެއް ވެސް ވަޒީރަށް ވިދާޅުވެ އެއް ނުދެވުނެވެ.

އެހެންނަމަވެސް އެ ހުރިހާ ވާހަކައެއްގެ ތެރެއިންވެސް އެންމެ ބޮޑަށް އަޅައިގަތީ ބަންކަރިން އާއި މެދު މިނިސްޓަރ ދެއްކެވި ވާހަކައެވެ. ކޮންމެއަކަސް އަނެއްކާވެސް ބަންކަރިން އާއި މެދު އިކޮނޮމިކް މިނިސްޓަރ މުަހައްމަދު ސައީދު މީގެ ކުރިން ދެއްކެވި ވާހަކައިގެ ރާގު އެއްކޮށް ބަދަލުކޮށްލައްވައިފިއެވެ. މިފަހަރު އާ ލަވައެކެވެ.

ބަންކަރިންގެ ޚިދުމަތުން އަހަރަކު 400 މިލިއަން ޑޮލަރުގެ އާމްދަނީ ހޯދޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު މީގެ ކުރިން ވިދާޅުވިއެވެ. 20 މިލިއަން ޑޮލަރު އިންވެސްޓްކޮށްގެން ކުރިއަށްގެންދާ މި މަޝްރޫޢުގެ ފައިދާ އަހަރެއް ވާ އިރު ލިބޭނެ ކަމަށް މީގެ ކުރިން ވަޒީރު ވިދާޅުވިއެވެ.

ވަޒީރު ހަނދުމަފުޅުނެތް ކަމަށް ވާނަމަ އެ ވާހަކަވެސް ހަނދާންކޮށްދޭނަމެވެ. އެއީ މިދިޔަ އަހަރުގެ މެދެއްހާ ހިސާބެވެ. ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޖަގަހައިގައި ވާހަކަ ދައްކަވަމުން ސައީދު ވިދާޅުވީ ބަންކަރިންގެ ޚިދުމަތް ފެށުމުން މުޅި ރާއްޖޭގެ އިގްތިސާދު ބަދަލުވާނެ ކަމަށެވެ.

އަދި އެ މަޝްރޫޢުގެ ސަބަބުން މި އަހަރުގެ ޖުލައި މަހުގެ ނިޔަލަށް 400 މިލިއަން ޑޮލަރު އިތުރުވާނެ ކަމަށް ސާފު ދިވެހި ބަހުން ވިދާޅުވިއެވެ. އިގްތިސާދު ސިންދަފާތުކުރާ ގޮތަކީ އެއީ ކަމަށާއި 6 ބިލިއަން ރުފިޔާ މުޅިން އާ ސިނާއަތެއްގެ ގޮތުގައި ރާއްޖޭގެ ޑީޖީޕީގައި އެނބުރެން ފަށާނެ ކަމަށް ވިދާޅުވިއެވެ.

ނޫސްވެރިންގެ ބައްދަލުވުމުގައި މިކަމާއި މެދު ސުވާލުކުރި ހިސާބުން ފެށިގެން ވަޒީރުގެ ރާގު މުޅިން މި މައްސަލައިގައި ބަދަލުވެއްޖެއެވެ. ބަންކަރިން ފެށިގެން މިހާތަނަށް އައި އިރު އެ މަސައްކަތް ރަނގަޅަށް ނުދާތީ އެތައް ބައެއްގެ ފާޑުކިޔުން އަމާޒުވެފައިވާ އިރު އެކަމާއި މެދު ނޫސްވެރިން ކުރި ސުވާލުތަކަށް ސާފު ޖަވާބެއް ވަޒީރަށް ދެވޭ ގޮތެއް ނުވިއެވެ. ތަކުރާރުކޮށް ސުވާލުކޮށްގެން ވެސް އެކަމުން ރާއްޖެއަށް ފައިދާ ވާ ގޮތެއް ވަޒީރަށް ފާހަގަކޮށްދެއްވޭ ވަރެއް ނުވިއެވެ.

ނުވިތާކަށް ވަޒީރު ވިދާޅުވަނީ މިއީ ކޮމްޕެޓެޓިވް އިންޑަސްޓްރީއަކަށް ވުމުން އެ ޚިދުމަތުގެ ފައިދާ ވާން ދުވަސް ނަގަނީ ކަމަށެވެ. އަދި އަވަށްޓެރި ޤައުމުތަކުގައި ހުރި ވަސީލަތްތަކާއި ރާއްޖޭގެ ވަސީލަތްތަކާއި އަޅާ ކިޔާ އިރު އަދި ކުރަން ޖެހޭ މަސައްކަތްތައް ހުރިކަމަށް ވެސް ވަޒީރު ފާހަގަކުރެއްވިއެވެ.

މި ވާހަކައިން ރެކިވަޑައިގަންނަވަން ދެއްކެވި ވާހަކައަކީ އަލަށް ފަށާ މަސައްކަތަކަށް ވީމަ އުނދަނގޫވާ ވާހަކައެވެ. ނުވިތާކަށް ކުރީ ސަރުކާރުތަކުން އެކަން ނުފެށުމުން ވީ ދަތިތަކުގެ އުދާސްތަކުގެ ވާހަކަވެސް ދެއްކެވިއެވެ. އަދި އެހިސާބުން ނިންމާލީކީ ނޫނެވެ. މީޑިއާ އިން އެ މަނިކުފާނު ދެއްކެވި ވާހަކަ ޓްވިސްޓް ކުރާކަމަށް ވެސް ވިދާޅުވިއެވެ. "އެވާހަކަ ވަރަށް ޓްވިސްޓް ކުރައްވާ" ކަމަށް ވިދާޅުވެ އެ މަނިކުފާނު ދެއްކެވި ވާހަކައިން ގޯސްވެގެން އުޅެނީ ނޫސްވެރިންކަމަށް ދޭހަވެއެވެ.

މިއަދު އެއްކަލަ 400 މިލިއަން ޑޮލަރުގެ ފައިދާގެ ވާހަކަ އެއް ނުދައްކަވައެވެ. ދެން ވާނީ ވެސް އެހެންނެވެ. މި އަހަރުގެ ޖުލައި ހަމަވެ އޭރު ބުނި ފައިދާ ލިބިގަންނަން ތައްޔާރުވާ އިރު ސަރުކާރުގެ ބަސް ވެސް މިކަމުގަ ދިމާނުވެއެވެ. ބޮޑު ރަސްމިއްޔާތަކާއި އެކު ފެށި ބަންކަރިން ޚިދުމަތް ރަސްމީކޮށް އަދި ނުފެށޭ ކަމަށް ވެސް ދާދި މި ފަހަކުން ރައީސް ވެސް ވިދާޅުވެއްޖެއެވެ.

ކުރީ ސަރުކާރުތަކުން އެކަން ނުފަށާ އޮވެގެން މަސައްކަތްތަކަށް ލަސްވާ ކަމަށް ބުނާ އިރު އެ މަސައްކަތް ސަރުކާރުން ފެށީ މި ސަރުކާރުގެ މައި އެއް މަޝްރޫޢު އަށް އެ މަޝްރޫޢު ވާނެކަމުގެ ވައުދާއި އެކުގައެވެ. އިގްތިސާދުގެ އާ ތަސައްވުރަކަށް އެ މަޝްރޫޢު ވާނެކަމުގެ ހުވަފެން ދެއްކެވިއެވެ. އޭރުވެސް މިނިސްޓަރ އެ ވިދާޅުވާ ފަދައިން އަޅުގަނޑުމެންގެ އަވަށްޓެރިން އައީ މި ސިނާއަތުގައި ހަރަކާތްތެރިވަމުންނެވެ.

އެހެންވީމަ އޭރު ވަސީލަތް ފުރިހަމަ ނުކޮށް، ތެޅިގަނެގެން ބަންކަރިން ވަރުގެ މޮޅު މަޝްރޫޢު އެއް ނެތްކަމަށް ދައްކާ، މި މަޝްރޫޢު ފެށީ ރައްޔިތުންގެ ލޮލުގަ ކޮން އަނދުނެއް އަޅުވަންތޯ މިއަދު ރައްޔިތުން ދަނީ ސުވާލު އުފައްދަމުންނެވެ.