ބަޖެޓް ބޮޑުވީ މި ސަރުކާރުން ބޭނުންވާ ކަންކަން ހިމަނައި މެނޭޖު ކުރަން ނޭނގުމުގެ ސަބަބުން: ރިޔާޒު މަންސޫރު

2026 ވަނަ އަހަރުގެ ބަޖެޓް ބޮޑުވީ މި ސަރުކާރުން ބޭނުންވާ ކަންކަން ހިމަނައި މެނޭޖްކުރަން ނޭނގުމުގެ ސަބަބުން ކަމަށް އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު ރިޔާޒު މަންސޫރު ވިދާޅުވެއްޖެ އެވެ.

ރާއްޖެޓީވީ އިން ގެނެސްދިން "ބޭކާރު ދެ އަހަރު" ކަވަރޭޖުގައި ވާހަކަ ދައްކަވަމުން ރިޔާޒު ވިދާޅުވީ މާލީ ކަންކަމާއި ގުޅުންހުރި ގާނޫނުތަކާއި ގަވާއިދުތަކަށް މި ސަރުކާރުން ބަދަލު ގެންނަނީ މެނޭޖްކުރަން ނޭނގޭތީ ކަމަށެވެ. އޭނާ ވިދާޅުވީ މެނޭޖް ކުރަން އެނގޭނަމަ ހުރިހާ ބާރެއް އޮވެ އުސޫލާ އެއްގޮތަށް ނުގެންދެވެންވީ ސަބަބެއް ނެތް ކަމަށެވެ. ރިޔާޒު ވިދާޅުވީ މި ސަރުކާރުން މާލީ ކަންކަން މެނޭޖްކުރަން ނޭނގި، ޕްރޮޖެކްޓްތައް ބިޑަށް ވެސް ހުޅުވާލަން ނޭނގޭ ކަމަށެވެ.

ރިޔާޒު ވިދާޅުވީ މި ސަރުކާރުން އައީ ވަރަށް ގަދައަށް ދަރަނީގެ ވާހަކަ ދައްކަމުން ކަމަށާއި، 2 އަހަރު ނިމެމުންދާ އިރު، 36 ބިލިއަން ރުފިޔާގެ ދަރަނި އިތުރުވެއްޖެ ކަމަށެވެ. އަދި މިކަން ހިނގާފައި ވަނީ ކާރިސާ އެއް ނުވަތަ މައްސަލައެއް އޮވެގެން ނޫން ކަމަށާއި، އެންމެ ކުޑަމިނުން ދުނިޔޭގެ އިގްތިސާދު ރަނގަޅު ކަމަށާއި، ރާއްޖެ އަށް އަންނަ ޓޫރިސްޓުން ވެސް އިތުރުވެ ޓެކްސް ލިބޭ މިންވަރު ވެސް އިތުރު ވެފައިވާ ކަމަށް ރިޔާޒު ވިދާޅުވި އެވެ.

ޓެކްސް އާމްދަނީ ވެސް އިތުރު، ދެން ކީއްވެގެންތޯ މިވަރަށް ދަރަނީ މި އިތުރުވަނީ. މިއީ ހަމަ މެނޭޖްކުރުމުގެ މައްސަލަ އިނގޭތޯ. ދެން އަޅުގަނޑަށް މިއާ ގުޅިގެން އަދި އެއްވާހަކަ ދަންނަވާލާނަން. ޕީއެންސީ އިން އެބަ ބުނޭ ބަޖެޓް ބޮޑުވަނީ ދައްކަންޖެހޭ ލޯނުތައް އިތުރުވާތީއޭ. އެއީ ތެދު ވާހަކަ އެއް ނޫން. އެ އަޅުގަނޑުމެން ބަލައިލެވޭނެ. ޓީވީ އަޑުއައްސަވަން އިންނަވާ ބޭފުޅަކަށް ވެސް ހީވެދާނެ ތަފާތު ދެގޮތަކަށޭ މި ބުނަނީ. ކިހިނެއްހޭ ތިމަންނަ މެންނަން އެނގޭނީ. އެ ބަލާލެވޭނެ ގޮތް އެބަހުރި. ބަޖެޓް ކޮންމެ އަހަރެއްގައި ވެސް ބަލައިލާފައި އެ ބަޖެޓުން އުނިކޮށްލާ ލޯނަށް އަނބުރާ ދައްކަން އޮތް ބައި. ދެން އެ ބާކީ އޮންނަ ބައިން އާމްދަނީ ކަނޑާލީމަ އެއީ، ސަރުކާރުން ހޯދަން ޖެހޭ ފައިސާ. ލޯނުގެ ގޮތުގައި އެ ވަޢުދުތައް ފުއްދަން ނުވަތަ އެހެން ކަމެއް ކުރަން. އެގޮތަށް ބަލައިލީމަ ވަރަށް ސާފުކޮށް ފެންނާނެ 2024 އާއި 2025 އަކީ އެންމެ ބޮޑަށް އެގޮތަށް ފައިނޭންޝަލް ރިކުއާމަންޓް އޮތް ދެ އަހަރު. އެހެންވީމާ، 2026 ގައި މި ބަޖެޓް މިވަރުވެފައި މިއޮތީ ލޯނު އަދާކުރާތީއޭ ބުނާ ވާހަކަ އަކީ އެއްގޮތަކަށްވެސް ރަނގަޅު ކަމެއް ނޫން.

ރިޔާޒު މަންސޫރު

ރިޔާޒު ވިދާޅުވީ 2026 ވަނަ އަހަރު ގެ ބަޖެޓް ބޮޑުވެފައި އޮތީ އެ ބޭފުޅުން ބޭނުންވާ ކަންތައްތަކެއް ބަޖެޓަށް ލުމުން ކަމަށެވެ. އަދި އެކަންކަން ބަޖެޓަށް ނުލާ ނަމަ 2026 ވަނަ އަހަރު ގެ ބަޖެޓަކީ އާމްދަނީ އެންމެ މަތިން ލިބޭނެ ކަމަށް ބަލާފައި އޮތް އަހަރު ކަމަށެވެ. ރިޔާޒު ވަނީ ބަޖެޓުގައި ފައިނޭންޝަލް ރިކުއަރމެންޓާއި އިތުރަށް ހޯދަންޖެހޭ ފައިސާ ގެ އަދަދު ބޮޑު ވެގެން ދަނީ ކީއްވެގެންތޯ ސުވާލު އުފައްދަވާފަ އެވެ. އޭނާ ވިދާޅުވީ މިހެން ދިމާވަނީ ކަންކަން މެނޭޖްކުރަން ނޭނގި ރައްޔިތުންނަށް އޮޅުވާލާތީ ކަމަށެވެ.

ދިވެހިރާއްޖޭގައި އެއް އަހަރުގެ ތެރޭގައި ދަރަނި އިތުރުވި ރިކޯޑު އޮތީ ރައީސް ޑރ. މުހައްމަދު މުއިއްޒުގެ އަތްޕުޅުގައި ކަމަށް ރިޔާޒު ވިދާޅުވި އެވެ. އޭނާ ވިދާޅުވީ ވިދާޅުވީ މިސަރުކާރުން ބޭރަށް ދައްކަން ޖެހޭ ދަރަނި ރީސްޓްރަކްޗަރކޮށް ލަސްކުރަމުންދާ ކަމަށެވެ. މިހާރު ލޯނު ދައްކަމުން ނުދާއިރު، ގައުމަށް ވަންނަ ޑޮލަރު ބާޒާރުން ފެންނަންޖެހޭ ކަމަށާއި، ނަމަވެސް ޑޮލަރަށް ވާނުވާ ނޭނގޭ ކަމަށް އޭނާ ވިދާޅުވިއެވެ.

މިދިޔަ އަހަރު ނިމުނު އިރު މި ސަރުކާރުގެ ދަރަނި ހުރީ 19 ބިލިއަން ރުފިޔާގަ އެވެ. ނަމަވެސް މި އަހަރުގެ މިހާތަނަށް އެ އަދަދު ދެގުނައާ ގާތްކޮށް މިހާރު ދަރަނި ހުރީ 36 ބިލިއަން ރުފިޔާގަ އެވެ.