މި ސަރުކާރާއެކު ރާއްޖެ ދަނީ ފަހަތަށް، ކަންބޮޑުވުންތައް ސަރުކާރަށް އިއްވުމަށް މަގުމައްޗަށް ނުކުތުން ނޫން ގޮތެއް ނެތް: ޝައުނާ

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރާއެކު ދިވެހިރާއްޖެ ދަނީ ފަހަތަށް ކަމަށާއި، ރައްޔިތުންގެ ޝަކުވާއާއި، ކަންބޮޑުވުންތަކުގެ އަޑު ސަރުކާރަށް އިއްވުމަށް މަގުމައްޗަށް ނުކުތުން ނޫން ގޮތެއް މިއަދު ނެތް ކަމަށް ކުރީގެ އެންބަވަޔަރަމަންޓް މިނިސްޓަރު އައިމިނަތު ޝައުނާ ވިދާޅުވެއްޖެއެވެ.

ރާއްޖެޓީވީން ގެނެސްދޭ ފުދިއްޖެ ފުނޑިއްޖެ ޚާއްސަ ކަވަރޭޖްގައި ޝައުނާ ވިދާޅުވީ މިސަރުކާރަށް އަހަރަކަށްވުރެ ގިނަ ދުވަސްވެގެންދިޔައިރު، ގިނަކަންކަން ގައުމުގައި ހިނގާދިޔައީ ރައްޔިތުން އެދޭ ގޮތަށް ނޫން ކަމަށާއި، މިހާރު ހިންގާ ކަންކަން ވެސް ކުރިއަށް ގެންދަނީ ރައްޔިތުން ބޭނުންވާ ގޮތާއި ހިލާފަށް ކަމަށެެވެ. އަދި ރައީސް މުއިއްޒު ރިޔާސީ ކެންޕޭންގެ ތެރޭގައި ދެއްކެވި ވާހަކަފުޅުތަކާއި އެއްގޮތަށް ގައުމުގައި އެއްވެސް ކަމެއް ކުރިއަށް ގެންގޮސްފައިނުވާ ކަމަށް ޝައުނާ ވިދާޅުވިއެވެ.

ޝައުނާ ވިދާޅުވީ މިސަރުކާރުން ފާޅުގައި ގާނޫނު އަސާސީއާ ހިލާފަށް އަމަލުކުރަމުންދާ ކަމަށާއި، ގައުމު ދަނީ ފަހަތަށް ކަމަށެވެ. އަދި ރައްޔިތުންނާ ގުޅުންހުރި ކަންކަން ފާލުން ނެއްޓި، އަސާސީ ޚިދުމަތްތަކުގެ ފެންވަރު ދަނީ ދަށްވަމުން ކަމަށް އޭނާ ވިދާޅުވިއެވެ.

ރައްޔިތުންގެ އަޑު ސަރުކާރަށް އިއްވަންޖެހޭކަން ފާހަގަކުރައްވައި ޝައުނާ ވިދާޅުވީ މިއަދު ރައްޔިތުން ތިބީ މާޔޫސްވެ، ކަންބޮޑުވެފައިވާ ކަމަށެވެ.

ޝައުނާ ވިދާޅުވީ މިއަދުގެ ހާލަތު އޮތް ގޮތުން މަގުމައްޗަށް ނުކުމެގެން ނޫނީ ރައްޔިތުންގެ އަޑު ސަރުކާރަށް އިއްވެން ނެތް ކަމަށެވެ. އެހެންކަމުން އެމްޑީޕީން ރައްޔިތުންނާއެކު މަގުމައްޗަށް ނުކުންނާނެ ކަމަށާއި، ރައްޔިތުންގެ އަޑު ސަރުކާރަށް އިއްވާނެ ކަމަށެވެ. އަދި އެމްޑީޕީއަކީ މަގުމައްޗަށް ފަރިތަ ޕާޓީއެއް ކަމަށާއި، ފަހަތަށް ނުޖެހޭނެ ކަމަށް ޝައުނާ ވިދާޅުވިއެވެ.