ގެދޮރުވެރިޔާ ސްކީމްގެ ދަށުން ރައްޔިތުންނަށް ދީފައިވާ ފުލެޓުތަކުން ބައެއް ވަގަށް ވިއްކަން އުޅޭ މައްސަލަ ބޮޑު ވެއްޖެ!!

ގެދޮރުވެރިޔާ ސްކީމު ގެ ނަމުގައި ނިމިދިޔަ އެމްޑީޕީ ސަރުކާރުން ހިންގި ބޯހިޔާވަހިކަމުގެ މަޝްރޫޢުގެ ތެރެއިން ދޫކޮށްފައިވާ 4000 ފުލެޓްގެ ތެރެއިން 350 ފުލެޓް ވިއްކަން އުޅޭ މައްސަލަ ބޮޑު ވެއްޖެ ކަމަށް ފަހި ޔޫނިއަން އިން ބުނެފިއެވެ.

ބުރާސްފަތި ދުވަހު އެ ޖަމްއިއްޔާ އިން ބޭއްވި ނޫސްވެރިންގެ ބައްދަލުވުމެއްގައި ފާހަގަ ކުރި ގޮތުގައި ހައުސިންގ މިނިސްޓްރީގެ މުވައްޒަފުން ކަމުގައި ބުނެ އެކިއެކި ފަރާތްތަކުން ފުލެޓް ގަންނާނެ ފަރާތްތައް ހޯދުމަށް އާންމު ރައްޔިތުން ކާރިއަށް އަންނަ ވާހަކަ އެ ފަރާތްތަކުން އެ ޖަމްއިއްޔާގެ ސަމާލު ކަމަށް ގެނެސްފައިވާ ކަމުގައެވެ.

Advertisement

ފަހި ޔޫނިއަން އިން ބުނީ ނޫސް ކޮންފަރެންސް އެއް ބާއްވަން ޖެހުނު އެންމެ މުހިންމު އެއް ސަބަބަކީ އެކަމުގައި އެއްވެސް ހަޤީގަތެއް އޮތްތޯ ބައްލަވައި ދެއްވުން އެދި މިކަން ރައީސް މުއިއްޒުގެ ސަމާލު ކަމަށް ގެނައުން ކަމުގައެވެ.

އެ ޖަމްއިއްޔާ އިން ހާމަ ކުރި ގޮތުގައި، ފުލެޓް ވިއްކަން އުޅޭ ފަރާތްތަކުން ބުނާކަމަށް ވަނީ ފުލެޓެއް ވިއްކާ އަގަކީ 250،000ރ ކަމަށާއި، ފުރަތަމަ 100،000ރ ދިނުމުން ލިސްޓުގައި ނަން ހިމަނައިދޭނެ ކަމަށާއި، ފުލެޓް އެއްބަސްވުމުގައި ސޮއިކުރުމުން ބާކީ 150،000ރ ދައްކަންޖެހޭނެ ކަމަށެވެ.

މިޕްރޮސެސް ހިންގުމަށް ހައުސިންގ މިނިސްޓްރީގެ ޕޯޓަލްގެ އެކްސެސް މިހާރު ދީފައި ވަނީ ރައީސް އޮފީހުގެ 02 މުވައްޒަފަކަށް ކަމަށް ވެސް ފަހި ޔޫނިއަން އަށް މިކަން ތަޖުރިބާ ކޮށްފައިވާ ފަރާތްތަކުން މަޢުލޫމާތުދޭ ކަމަށް ހާމަ ކޮށްފައިވެއެވެ.

ފުލެޓް ހައްގުވާ 4000 މީހުންގެ ތެރެއިން 3000 މީހުނާއި އެކު ފަހި ދިރިއުޅުން ކޯޕަރޭޝަން (އެފްޑީސީ) އިން ސޮއިކުރި ދުވަހުން ފެށިގެން ބާކީ ހުރި 1000 ފުލެޓްގެ ހުރިހާ ކޮންޓްރޯލެއް ރައީސް އޮފީހަށް ނަގަފިކަމަށާއި މިހާރު ފުލެޓް އެއްބަސްމުގައި ސޮއިކުރަން އަންގަމުންދަނީ ރައީސް އޮފީހުން ކަނޑައަޅާފައި 2 މުއައްޒަފުން ކަމަށާއި އަދި މި 1000 ފުލެޓްގެ ހައްޤުވެރިން ކަނޑައަޅާނީ ރައީސް އޮފީހުން ކަމަށް އެކި ފަރާތްތަކުން މައުލޫމާތު ދީފައިވާ ކަމަށް ވެސް ފަހި ޔޫނިއަން އިން ބުނެފައިވެއެވެ.