ދިރާގުގެ އަހަރީ ދުވަހާ ދިމާކޮށް ޚާއްސަ އޮފަރތަކެއް

ދިރާގުގެ 37 ވަނަ އަހަރީ ދުވަހާ ގުޅިގެން، އެ ކުންފުނިން ކަސްޓަމަރުންނަށް ޚާއްސަ އޮފަރތަކެއް ތަޢާރަފުކޮށްފި އެވެ. މި އޮފަރތައް އިޢުލާނުކޮށްފައިވަނީ ބުދަ ދުވަހު ދިރާގު ހެޑް އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.

ދިރާގުގެ ޗީފް ކޮމަރޝަލް އޮފިސަރ އަލީ ރިޔާޒް ވިދާޅުވި ގޮތުގައި، ދިރާގުން އަބަދުވެސް މަސައްކަތް ކުރަމުންދަނީ ރާއްޖޭގެ އެކި ކަންކޮޅުތަކުގައި ދިރިއުޅޭ މުޖުތަމަޢުތައް ގުޅުވާލައި، ބާރުވެރިކޮށް، އެންމެ ރަނގަޅު ފެންވަރުގެ ޑިޖިޓަލް ތަޖުރިބާތައް ފޯރުކޮށްދިނުމަށެވެ. އަދި މި އަހަރީ ދުވަހުގެ މުނާސަބަތުގައި ކަސްޓަމަރުންގެ އަގު ވަޒަންކުރުމުގެ ގޮތުން ޚާއްސަ އޮފަރތަކެއް ތައްޔާރުކޮށްފައިވާ ކަމަށް އަލީ ރިޔާޒް ވިދާޅުވިއެވެ.

މިއަހަރުގެ އަހަރީ ދުވަހާ ގުޅިގެން ތަޢާރަފުކޮށްފައިވާ އޮފަރތަކުގެ ތެރޭގައި، 1 އޮކްޓޫބަރު 2023 ވަނަ ދުވަހު ހެނދުނު 10:00 އިން ހަވީރު 6:00 އާ ދެމެދު *225# އަށް ޑައިލްކޮށްގެން 24 ގަޑިއިރަށް 37 ޖީބީ ޑޭޓާ ހިލޭ ލިބޭ އޮފަރެއް ހިމެނެއެވެ. މި އޮފަރ ލިބޭނީ ޕްރީޕެއިޑް އަދި ޕޯސްޓްޕެއިޑް ކަސްޓަމަރުންނަށެވެ.

އަދި ހަމައެހެންމެ، ރާއްޖޭގައި ކިޔަވަމުންދާ ދަރިވަރުންނަށް އަމާޒުކޮށްގެން "ދިރާގު x އައިސިކް" ޕްލޭން ތަޢާރަފުކޮށްފައިވެއެވެ. މި ޕްލޭނުގެ ދަށުން އައިސިކް އަދި ދިވެހި ޕާޓްނަރުންގެ ފަރާތުން ޚާއްސަ އޮފަރތަކާއި ޓެލެކޮމް އިނާޔަތްތައް ލިބޭނެއެވެ.

ދިރާގުން ވަނީ "އާއިލާއަށް ހަދިޔާ ދީގެން ހަދިޔާއެއް" ގެ ނަމުގައި އާ އޮފަރެއްވެސް ތަޢާރަފުކޮށްފައެވެ. މި އޮފަރގެ ދަށުން ދިރާގު އެޕް މެދުވެރިކޮށް އާއިލާގެ ފަރާތްތަކަށް ޑޭޓާ ހަދިޔާކޮށްގެން ހިލޭ ޑޭޓާ ހޯދުމުގެ ފުރުސަތު ލިބިގެންދާނެއެވެ. މީގެ އިތުރުން، އޭއައިގެ އެހީތެރިކަމާއެކު އިންޓަރނެޓްގެ ރައްކާތެރިކަން 35 ރުފިޔާއިން ފެށިގެން ލިބޭގޮތަށް "ދިރާގު ނެޓްޕްރޮޓެކްޓް" ޚިދުމަތްވެސް ތަޢާރަފުކޮށްފައިވެއެވެ.

1988 އިން ފެށިގެން ދިރާގުން ވަނީ ރާއްޖޭގެ ޑިޖިޓަލް ކުރިމަގު ބިނާކުރުމުގައި މުހިންމު ދައުރެއް އަދާކޮށްފައެވެ. މި ގޮތުން ރާއްޖޭގައި އެންމެ ފުރަތަމަ 100% މޮބައިލް ކަވަރޭޖް ފޯރުކޮށްދިނުމާއި، 5ޖީގެ ޚިދުމަތް ތަޢާރަފުކޮށް، އާބާދީގެ 70% އަށް މި ޚިދުމަތް ފުޅާކުރުމާއި، ރާއްޖޭގެ މީހުން ދިރިއުޅޭ ހުރިހާ ރަށަކަށް ފައިބަރ ބްރޯޑްބޭންޑްގެ ޚިދުމަތް ފޯރުކޮށްދީފައިވެއެވެ.