އިސްރާއީލުގެ ޖަލުން އިތުރު 200 ފަލަސްތީން މީހުން ދޫކޮށްލައިފި
އެއްބަސްވުމުގައިވާ ގޮތުން މީގެ ތެރެއިން 70 މީހުން ސަރަޙައްދުގެ އެހެން ޤައުމުތަކަށް އަރުވާލެވޭނެއެވެ.
2025 ޖެނުއަރީ 25 - އިސްރާއީލުގެ ޖަލުން މިނިވަންވި ފަލަސްތީން މީހަކު ޚާން ޔޫނިސް އަށް އައުމާއެކު އެތައް ބަޔަކު އޭނާ އަށް މަރުހަބާ ކިޔަނީ
އިސްރާއީލާއި ހަމާސްއާ ދެމެދު ވެވުނު ހަނގުރާމަ ހުއްޓުމަކަށް ގެނައުމުގެ އެއްބަސްވުމުގެ ދަށުން އިސްރާއީލުގެ ޖަލުގައި ބަންދުކޮށްފައި ތިބި 200 ފަލަސްޠީނު މީހުން ހޮނިހިރު ދުވަހު ދޫކޮށްލައިފިއެވެ.
އެއްބަސްވުމުގައިވާ ގޮތުން މީގެ ތެރެއިން 70 މީހުން ސަރަޙައްދުގެ އެހެން ޤައުމުތަކަށް އަރުވާލެވޭނެއެވެ.
މިމީހުން މިނިވަން ކުރީ ފަލަސްޠީނު ހަނގުރާމަވެރިން ޣައްޒާގައި ހިފަހައްޓާފައި ތިބި ހަތަރު އަންހެން އިސްރާއީލު ސިފައިން ދޫކޮށްލުމާ ގުޅިގެންނެވެ.
އިސްރާއީލުގެ ޖަލުން ދޫކޮށްލި މީހުންގެ ތެރެއިން:
* 114 މީހުން ހުޅަނގު އައްސޭރީގެ ރާމަﷲ ސިޓީއަށް ވަނީ އައިސްފައެވެ.
* 70 އަރުވާލެވޭ މީހުން މިސުރުން ވަނީ ބަލައިގަނެފައެވެ. އަދި
* 16 މީހުން ޣައްޒާގެ ޚާން ޔޫނިސްއަށް ވަނީ އައިސްފައެވެ.
އަރުވާލަން ޖެހޭ ކަމަށް ކަނޑައަޅާފައިވާ 70 ފަލަސްޠީނު މީހުން ބަސްތަކެއްގައި މިސުރަށް އައިސްފައިވާ ކަމަށް މިސުރުގެ ސަރުކާރާ ގުޅުންހުރި މީޑިއާތަކުން ރިޕޯޓުކޮށްފައިވެއެވެ.
ސަރުކާރާ ގުޅުންހުރި އަލް-ޤާހިރާ ނިއުސް އިން ބުނެފައިވަނީ މި މީހުންނަކީ އިސްރާއީލުން "އަރުވާލި" މީހުންކަމަށާއި، އަދި އެމީހުން ފުރަތަމަ ގެންދިއުމަށް ހަމަ ޖެހިފައިވަނީ ފަރުވާ ދިނުމަށް ހޮސްޕިޓަލަށް ކަމަށެވެ.
ކުރިން އިސްރާއީލުގެ އިދާރާތަކުން ޢާންމުކޮށްފައިވާ ލިސްޓެއްގައިވާ ގޮތުން، މި އެއްބަސްވުމުގެ ދަށުން ދޫކޮށްލެވޭ 230 އަށްވުރެ ގިނަ ފަލަސްޠީނު ޤައިދީންނަކީ އުމުރަށް ޙުކުމް ކުރެވިފައިވާ މީހުންނެވެ. އަދި އެމީހުން ދޫކޮށްލުމާއެކު ފަލަސްޠީނު ސަރަޙައްދު ތަކުން ދާއިމީކޮށް ބޭރުވާން ޖެހޭނެއެވެ.
މިސުރުގައި މަޑުކުރުމަށްފަހު، އަރުވާލެވޭ މީހުން "އަލްޖީރިއާ، ތުރުކީ ނުވަތަ ޓިއުނީޝިއާ އިން ކޮންމެވެސް އެއް ޤައުމެއް" ދިރިއުޅުމަށް ޚިޔާރުކުރާނެ ކަމަށް ފަލަސްޠީނު ޤައިދީންގެ ކަންކަމާބެހޭ ކޮމިޓީގެ ވެރިޔާ އަމީން ޝުމާން އޭއެފްޕީ އަށް ބުނެފައިވެއެވެ.
