ޕީއެންސީ އަށް ވަގު ފޯމު ފުރުމުގައި ރައީސް މުއިއްޒުގެ ސީދާ ބައިވެރިވުން އޮތް ކަމަށް ގަބޫލު ކުރެވޭ: ފައްޔާޒު

ޕީއެންސީ އަށް މީހުން ވައްދަން ވަގުފޯމު ފުރުމުގައި "ރައީސުލްޖުމްހޫރިއްޔާގެ ސީދާ ބައިވެރިވުން ނުއޮވެ ނުދާނެ" ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއެޖެއެވެ.

ފައްޔާޒު ވިދާޅުވީ، "އެގޮތައް ގަބޫލު ކުރަން މަޖުބޫރު ވަނީ މިކަމުގައި އެމަނިކުފާނު ހަނު ހުންނެވުމުން؛" ކަމުގައެވެ.

ވަގުފޯމު ފުރުމުގެ މައްސަލަ ވަރަށް ބޮޑަށް ހޫނުވެފައިވަނިކޮށް އިލެކްޝަންސް ކޮމިޝަނުން ހާމަކުރި ތަފާސް ހިސާބުން މިހާރު ރާއްޖޭގައި އެންމެ މެމްބަރުން ގިނަ ސިޔާސީ ޕާޓީ އަކީ ޕީއެންސީ ކަމަށް ވަނީ ވެފައެވެ.

ފައްޔާޒު ވިދާޅުވީ، ރައްޔިތުންގެ ޒާތީ މައުލޫމާތު ވަގަށް ނަގައި ދައުލަތުގެ މުދަލާއި ވަސީލަތްތައް ބޭނުންކޮށްގެން ޕީއެންސީ އަށް މެމްބަރުން އިތުރުކުރުމުގެ އެތައް ހާސް މައްސަލަ އެއް ފެންމަތިވުމުން ވެސް މިދިޔަ ތިން މަސް ދުވަހުގެ ތެރޭގައި އިލެކްޝަނުން މިވަނީ ފޯމުތަކުގެ ސައްހަކަން ބެލުމެއް ނެތި 40،000 މެމްބަރުން އެ ޕާޓިއަށް އިތުރުކޮށްދީފައި ކަމަށެވެ.

އެންމެ ބޮޑު އިދިކޮޅު ޕާޓީގެ ޗެއަރޕާސަން ފައްޔާޒު މިހެން ވިދާޅުވިއިރު، ނިމިދިޔަ 2024 ވަނަ އަހަރުގެ ފަހު ތިން މަސްދުވަހުގެ ތެރޭގައ ޕީއެންސީ އަށް 39،985 މީހުން ވައްދާފައި އޮތްކަން އިލެކްޝަންސް ކޮމިޝަނުގެ ތަފާސްހިސާބު ތަކުން ސާފުކޮށް ވަނީ ހާމަވެފައެވެ.

މިކަން މިހެން އޮތް އިރު، މިދިޔަ އަަހަރުގެ ޖެނުއަރީ މަހުން ސެމްޕްޓެމްބަރާ ހަމަ އަށް ޕާޓީއަށް އިތުރުވެފައިވަނީ އެންމެ 782 މީނުންނެވެ.

ދައުލަތުގެ ވަސީލަތްތަކާއި މުވައްޒަފުންގެ ނާޖާއިޒު ބޭނުން ކޮށްގެން، މީހުންނަށް ނޭގި ޕީއެންސީ އަށް ވަގު ފޯމު ފުރައިގެން އެތައް ބަޔަކު ވައްދަމުންދާ މައްސަލަ ފެންމަތިވެފައި ވަނިކޮށް، އިލެކްޝަންސް ކޮމިޝަނުން ވަނީ ކުރުމުއްދަތެއްގެ ތެރޭގައި އެތައް ހާސް ބަޔަކު އެ ޕާޓީގައި ދަފްތަރުގައި ޖައްސައިދީ، ޖުމްލަ މެމްބަރުންގެ އަދަދު 68,968 އަރާފައިވާ ކަމަށް ހާމަ ކޮށްފައިވެއެވެ. އިލެކްޝަންސްގެ ރެކޯޑުތަކުން ބަލާއިރު މިހާރު ޕީއެންސީ އަކީ އެންމެ މެމްބަރުން ގިނަ ޕާޓީ އެެވެ.

ޕާޓީގެ މެމްބަރުންގެ ނިސްބަތުން ދައުލަތުގެ ބަޖެޓުން ޕާޓީތަކަށްފައިސާ ދޭ ނިޒާމެއް މިހާރު ހަމަޖެހިފައި އޮންނަ އިރު، ވަގުފޯމު ފުރައިގެން ޕީއެންސީ އަށް މެމްބަރުން އިތުރުކުރުމުގެ ބޭނުމަކީވެސް ބަޖެޓުން އެ ޕާޓީ އަށް ގިނަ ފައިސާ ހޯދުން ކަމަށް އެމްޑީޕީ ގެ ގާނޫނީ ޓީމުގެ މެމްބަރު އަނަސް އަބްދުއްސައްތާރު ބުދަ ދުވަހު ވަނީ ވިދާޅުވެފައެވެ. 

އަނެއްކޮޅުން އިލެކްޝަންސް ކޮމިޝަންގެ ވެބްސައިޓް ބުނާ ގޮތުން ހުސްވި އަހަރުގެ ޖެނުއަރީ މަހުން ޑިސެމްބަރުގެ ނިޔަލަށް އެމްޑީޕީން ވަނީ 8387 މީހުން އުނިވެފައެވެ. ދެވަނަ އަށް އެންމެ މެމްބަރުން ގިނަ އެމްޑީޕީގަ ތިބިކަމަށް އީސީ ގެ ވެބްސައިޓް ބުނަނީ 43،755 މީހުން ކަމަށެވެ.

އެމްޑީޕީގެ އެތައް މެމްބަރުންނަކަށް ނޭނގި އެމީހުން ޕީއެންސީ އަށް ވެއްދި މައްސަލަ ބޮޑުވެ އޭގެ ތެރެއިން އެތައް މައްސަލަ އެއް އެމްޑީޕީ އިން ވަނީ ފުލުސް އޮފީހަށް ހުށަހަޅާފައެވެ.