އޭސީސީގެ މެންބަރުކަމަށް ރައީސް އައްޔަންކުރައްވަން ބޭނުންފުޅުވި މީހުންނާއި ގުޅޭ ޝަކުވާ ހުށަހަޅަން ދިނީ 27 މިނެޓް
ރައީސް ފޮނުއްވި ނަންތަކާއި ގުޅިގެން ޝަކުވާ ހުށަހެޅުމަށް އެދި އިއުލާންކޮށްފައިވަނީ 11:03 ގައި
ރައްޔިތުންގެ މަޖިލީހުގެ 2025 ވަނަ އަހަރު ދައުރުން ބޭރުން ބޭއްވި ޖަލްސާގެ ތެރެއިން
އެންޓި ކޮރަޕްޝަން ކޮމިޝަން (އޭސީސީ)ގެ މެންބަރުކަމަށް ރައީސް ޑރ. މުހައްމަދު މުއިއްޒު އައްޔަންކުރައްވަން ބޭނުންފުޅުވި މީހުންނާއި ގުޅޭ ޝަކުވާ ހުށަހަޅަން ދިނީ 27 މިނެޓެވެ.
ރައްޔިތުންގެ މަޖިލީހުގެ ރަސްމީ އެކްސް އެކައުންޓުގައި ރައީސް ފޮނުއްވި ނަންތަކާއި ގުޅިގެން ޝަކުވާ ހުށަހެޅުމަށް އެދި އިއުލާންކޮށްފައިވަނީ 11:03 ގައެވެ. އަދި ކުރި ޕޯސްޓުގައި ބުނެފައިވަނީ 20 ވަނަ ދުވަސް (ހޯމަ ދުވަހުގެ) 11:30 ގެ ކުރިން ޝަކުވާ ހުށަހަޅަން ފުރުސަތު ހުޅުވާލާފައިވާ ކަމަށެވެ.
މިއީ މިހާތަނަށް ރައްޔިތުންގެ މަޖިލީހުން މިހާ ކުރު މުއްދަތަކަށް މިނިވަން މުއައްސަސާއަކަށް އައަޔަންކުރާ ފަރާތަކާއި ގުޅޭ ޝަކުވާއެއް އޮތްތޯ ބެލުމަށް ދިން ފުރުސަތެވެ. ޝަކުވާ ހުށަހެޅުމަށް ދިނީ ޖުމުލަ 27 މިނެޓެވެ.
މަޖިލީހުގެ އިއުލާނުގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 200 ވަނަ މާއްދާގެ (ށ) ގައިވާގޮތުގެ މަތިން، އެންޓި-ކޮރަޕްޝަން ކޮމިޝަންގެ ގާނޫނޫގެ 4 ވަނަ މާއްދާގެ (ނ) ގައިވާ ގޮތުގެ މަތިން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ މައްސަލަ ދިރާސާކޮށް ނިންމުމަށްޓަކައި 20 ޖެނުއަރީ 2025 ގައި ބޭއްވި 2025 ވަނަ އަހަރުގެ ދައުރުން ބޭރުގެ ދެވަނަ ހާއްސަ ޖަލްސާގައި މިނިވަން މުއައްސަސާތަކުގެ ކޮމިޓީއަށް ފޮނުވާފައިވާ ކަމަށެވެ.
އެހެންކަމުން އެންޓި-ކޮރަޕްޝަން ކޮމިޝަންގެ މެންބަރުކަމުގެ މަގާމަށް އައްޔަން ކުރެއްވުމަށްޓަކައި، ރައީސުލްޖުމްހޫރިއްޔާ ނަންފުޅު ފޮނުއްވާފައިވާ ފަރާތްތަކާއި ގުޅޭގޮތުން އާންމުންގެ ޝަކުވާއެއްއޮތްތޯ ބެލުމަށްޓަކައި ރައްޔިތުންގެ މަޖިލީހުގެ ގަވާއިދުގެ 223 ވަނަ މާއްދާގެ (ބ) ގެ ދަށުން އިއުލާންކުރާ ކަމަށެވެ.
މި އިއުލާނުގައި ބުނެފައިވަނީ މި ފަރާތްތަކާއި ގުޅޭގޮތުން އެއްވެސް ޝަކުވާއެއް އޮތްނަމަ މެންދުރު 11:30 ގެ ކުރިން ޝަކުވާ ހުށަހަޅާ ފަރާތުގެ ފުރިހަމަ ނަމާއި، ދާއިމީ އެޑްރެސް އަދި ގުޅޭނެ ފޯނު ނަންބަރު އެނގޭނެގޮތަށް އެ ޝަކުވާއެއް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގެ މެއިލްއަށް ނުވަތަ މަޖިލީހުގެ އިދާރާއަށް ލިޔުމުން ފޮނުވުމަށެވެ.
27 މިނެޓް ޝަކުވާ ހުށަހެޅުމަށް ދިނުމަށްފަހު، އެންޓި-ކޮރަޕްޝަން ކޮމިޝަނަށް މެންބަރުން އައްޔަންކުރެއްވުމަށްޓަކައި ރައީސުލްޖުމްހޫރިއްޔާ ނަން ފޮނުއްވާފައިވާ ފަރާތްތަކާ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއިން ވަނީ އިންޓަރވިއު ވެސްކޮށްފައެވެ.
