ލަންކާ ރައީސްގެ 4 ދުވަހުގެ ޗައިނާ ދަތުރުފުޅުން ގައުމަށް 10 ބިލިއަން ޑޮލަރުގެ އިންވެސްޓްމަންޓް!
ލަންކާ ރައީސް ގެ ދަތުރުފުޅުގައި، ދެ ފަރާތުން 15 މެމޮރަންޑަމް އޮފް އަންޑަސްޓޭންޑިންގ (އެމްއޯޔޫ) ބަދަލުކުރެވުނެވެ.
2025 ޖެނުއަރީ 15 - ޗައިނާގެ ރައީސް ޝީ ޖިންޕިން އާއި ލަންކާގެ ރައީސް އަނޫރާ ކުމާރާ ޑިސަނަޔަކޭ ބައްދަލު ކުރައްވަނީ
ސްރީ ލަންކާގެ ރައީސް އަނުރާ ކުމާރަ ޑިސަނާޔަކޭ ޗައިނާ އަށް ކުރެއްވި ރަސްމީ ދަތުރުފުޅުގެ ނަތީޖާއެއްގެ ގޮތުން، ސްރީ ލަންކާ އަށް ގާތްގަނޑަކަށް 10 ބިލިއަން އެމެރިކާ ޑޮލަރުގެ އިންވެސްޓްމަންޓް ޗައިނާގެ ކުންފުނިތަކުން ހޯދޭނެ ކަމަށް އެގަމުއުމުގެ ނޫހެއް ކަމުގައިވާ ޑެއިލީ މިރަރ އިން ރިޕޯޓު ކޮށްފިއެވެ.
ލަންކާ ރައީސް ޗައިނާ އަށް ރަސްމީ ދަތުރުފުޅެއް ކުރެއްވީ ޖެނުއަރީ 14ން 17 އަށެވެ. މި ދަތުރުފުޅަކީ ޗައިނާގެ ރައީސް ޝީ ޖިންޕިންގ ގެ ދަޢުވަތަކަށް ކުރެއްވި ދަތުރުފުޅެކެވެ.
މި ދަތުރުފުޅުގައި ރައީސް ޑިސަނާޔަކޭ ވަނީ ރައީސް ޝީ އާ ގްރޭޓް ހޯލް އޮފް ދަ ޕީޕަލްގައި ބައްދަލު ކުރައްވާފައެވެ. ދެ ރައީސުން މަޝްވަރާކުރެއްވީ އިޤްތިޞާދީ އަދި ވިޔަފާރީގެ ކުރިއެރުމާ ބެހޭ ގޮތުންނާއި، އިންވެސްޓްމަންޓް އާއި، ފަތުރުވެރިކަމާއި ޑިޖިޓަލް ޓްރާންސްފޮމޭޝަން އަދި ބައިނަލްއަޤްވާމީ މައިދާނުގައި އެއްބާރުލުން ދިނުން ފަދަ ދާއިރާ ތަކުން ކަމަށް ރިޕޯޓުގައި ވެއެވެ. ދެ ޤައުމުގެ ގުޅުން އިތުރަށް ބަދަހިކުރުމަށް މަސައްކަތް ކުރައްވާނެ ކަމަށް ދެ ގައުމުގެ ވެރިން ވަނީ އެއްބަސްވެވަޑައިގަންފައެވެ.
ލަންކާގެ ރައީސްގެ ދަތުރުފުޅުގައި ޗައިނާގެ ބޮޑުވަޒީރު ލީ ޗިއާންގ އަދި ޗައިނާގެ ނެޝަނަލް ޕީޕަލްސް ކޮންގްރެސްގެ ސްޓޭންޑިންގ ކޮމިޓީގެ ޗެއަރމަން ޒާއޯ ލެޖީއާ ބައްދަލު ކުރައްވައި ދެ ގައުމުގެ ދެމެދުގައި އެއްބާރުލުން އިތުރުކުރެވިދާނެ ދާއިރާތަކާ ބެހޭ ގޮތުން ވަނީ މަޝްވަރާ ކުރައްވާފައެވެ.
ލަންކާ ރައީސް ގެ ދަތުރުފުޅުގައި، ދެ ފަރާތުން 15 މެމޮރަންޑަމް އޮފް އަންޑަސްޓޭންޑިންގ (އެމްއޯޔޫ) ބަދަލުކުރެވުނެވެ. ސިނޯޕެކް ގްރޫޕާއެކު ހަމްބަންޓޯޓާގައި އެކްސްޕޯޓަށް އަމާޒުކޮށްގެން ހަދާ ޕެޓްރޯލިއަމް ރިފައިނަރީއަކާ ބެހޭ ޖޮއިންޓް ސްޓޭޓްމަންޓެއް އެކުލަވާލި ކަމަށް ވެސް ޑެއިލީ މިރަރ ގައި ވެއެވެ. މި މަޝްރޫޢުގެ އަގަކީ 3.7 ބިލިއަން އެމެރިކާ ޑޮލަރެވެ.
ރައީސް ޑިސަނާޔަކޭ ވަނީ "އިންވެސްޓް އިން ސްރީ ލަންކާ" ރައުންޑްޓޭބަލްގައި ވާހަކަފުޅު ދައްކަވާފައެވެ. މި ބައްދަލުވުމުގައި ޗައިނާގެ ސަރުކާރުގެ ކުންފުނިތަކާއި ބޮޑެތި އަމިއްލަ ކުންފުނިތަކުގެ އިސް ފަރާތްތަކުން ބައިވެރިވިއެވެ. އިންވެސްޓްމަންޓް ފޯރަމްގައި ވާހަކަފުޅު ދައްކަވަމުން، ރައީސް ޑިސަނާޔަކޭ ފާހަގަކުރެއްވީ ސްރީ ލަންކާގެ އިޤްތިޞާދީ ސިޔާސަތުތައް އަމާޒުކުރެވިފައިވާ ފުޅާ ތަޞައްވުރާއި، ވިޔަފާރިތަކުގެ ޝައުޤުވެރިކަން ހުރެދާނެ މުހިންމު ދާއިރާތަކާއި، ސްރީ ލަންކާގައި އިންވެސްޓް ކުރުމަށް ހުރި ފުރުޞަތުތަކުގެ މައްޗަށެވެ. ފޯރަމްގައި ބައިވެރިވި ޗައިނާގެ ސަރުކާރުގެ އިސް ކުންފުނިތަކުން ސްރީ ލަންކާގައި އައު އިންވެސްޓްމަންޓްތައް ގެނައުމަށާއި މިހާރު ހިނގަމުންދާ އިންވެސްޓްމަންޓް މަޝްރޫޢުތައް ފުޅާކުރުމަށް ޝައުޤުވެރިކަން ފާޅުކުރިކަމަށް ރައީސް އޮފީހުގެ މީޑިއާ ޑިވިޜަން (ޕީއެމްޑީ) އިން ބުނެފައިވެއެވެ.
ޑެއިލީ މިރަރ އިން ރިޕޯޓު ކޮށްފައިވާ ގޮތުގައި، އިންވެސްޓްމަންޓް ފޯރަމްގައި ބައިވެރިވި ޗައިނާގެ ކުންފުނިތަކުން ހަކަތަ، އޮޓޯ އުފެއްދުން އަދި އިމާރާތްކުރުން ފަދަ އެކި ދާއިރާތަކަށް 10 ބިލިއަން އެމެރިކާ ޑޮލަރާ ހަމައަށް ސްރީ ލަންކާގައި އިންވެސްޓްކުރުމަށް ތައްޔާރަށް ތިބިކަމަށް ބުނެފައިވެއެވެ.
މި މަޝްވަރާތަކުގައި ނަން މަޝްހޫރު ޗައިނާގެ ބޮޑެތި ކުންފުނިތަކުން ބައިވެރިކަމަށް ވެސް މި ޚަބަރުގައި ވެއެވެ.
