ރެކޯޑު އަދަދެއްގެ މުސާރައާއެކު، ސިޓީގެ އެއްބަސްވުން ހާލަންޑު އައު ކޮށްފި

މެންޗެސްޓަރ ސިޓީ އަށް ކުޅެމުން އަންނަ ނޯވޭގެ ފޯވާޑު އާލިން ހާލަންޑު، އެ ކުލަބާ އެކު ސޮއި ކޮށްފައިވާ އެއްބަސްވުން ދިގު މުއްދަތަކަށް އައު ކޮށްފި އެވެ.

އުމުރުން 24 އަހަރުގެ ކުޅުންތެރިޔާ ސިޓީ އަށް ބަދަލުވީ 2022 ވަނަ އަހަރު އެވެ. އެ ކުލަބާ އެކު އޭރު ހާލަންޑު ސޮއި ކުރީ ފަސް އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާން އަހަރުތަކެއް އޮއްވައި، ސިޓީން ވަނީ ދިގު މުއްދަތަަކަށް ހާލަންޑުގެ އެއްބަސްވުން އައު ކޮށްފަ އެވެ.

ސިޓީ އާއެކު ހާލަންޑު ސޮއި ކުރީ ނުވަ އަހަރާއި ބައި މުއްދަތެއްގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2034 ވަނަ އަހަރުގެ ޖޫން މަހުގެ ނިޔަލަށެވެ، ސިޓީ އާއެކު ހާލަންޑު ސޮއި ކުރި އައު އެއްބަސްވުމުގެ ދަށުން، އޭނާ އަށް ރެކޯޑު އަދަދެއްގެ މުސާރަ ލިބޭނެ އެވެ.

މިއީ މެންޗެސްޓަރ ސިޓީގެ ތާރީޚުގައި ވެސް އަދި އިނގިރޭސި ޕްރިމިއާ ލީގުގެ އިތުރުން ފުޓުބޯޅައިގެ ތާރީޚުގައި ވެސް އެންމެ ބޮޑު މުސާރަ ލިބޭ އެއްބަސްވުމެވެ. މީޑިއާ ތަކުގައި ރިޕޯޓުކޮށްފައިވާ ގޮތުން އައު އެއްބަަސްވުމުގެ ދަށުން ސިޓީގައި ހާލަންޑަށް މުސާރައިގެ ގޮތުގައި ހަފުތާއަކު ފަސް 500،000 (ފަސްލައްކަ) ޕައުންޑު ލިބޭނެ އެވެ.

ސިޓީ އަށް ބަދަލުވެ ހާލަންޑު އަންނަނީ އެ ކުލަބުގައި މޮޅު ކުޅުމެއް ދައްކަމުންނެވެ، މިއީ ސިޓީގައި ހާލަންޑު ހޭދަ ކުރާ ތިން ވަނަ ސީޒަނެވެ. އޭނާ ވަނީ މިހާތަނަށް ސިޓީ އަށް ކުޅެދިން 126 މެޗުގައިި 111 ލަނޑު ޖަހައިފަ އެވެ. މީގެ އިތުރުން ހާލަންޑު ވަނީ ސިޓީ އާއެކު ހަތް ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި ޕްރިމިއާ ލީގު ދެ ފަހަރު ކާމިޔާބު ކުރުމުގެ އިތުރުން، އެފްއޭ ކަޕް، އެފްއޭ ކޮމިއުނިޓީ ޝީލްޑު، ޔުއެފާ ޗެމްޕިއަންސް ލީގު އަދި ޔުއެފާ ސުޕަ ކަޕް ކާމިޔާބު ކުރުން ހިމެނެ އެވެ.