ސަރުކާރުން ހެދި އެއްޗަކުން އިންސްޓޯލްމަންޓަށް ސައިކަލު ގަނެވޭނެ މަގު ބަންދުވެއްޖެ
16 ޖެނުއަރީ 2025 | ބުރާސްފަތި 12:10ސަރުކާރުން މިގެނައި ބަދަލަކީ ކަމާބެހޭ ފަރާތްތަކާ މަޝްވަރާކޮށް ޚިޔާލު ހޯދައިގެން ގެނައި ބަދަލެއް ނޫން ކަމަށް ސައިކަލު ވިޔަފާރި ކުރާ ބައެއް ފަރާތްތަކުން ބުނެފައިވޭ.
މާލޭގެ މަގުމަތީގައި ބަޔަކު ސައިކަލު ދުއްވަނީ
ރާއްޖޭގައި އެއްގަމު ދަތުރުފަތުރުގައި މުހިންމު ދައުރެއް އަދާކުރާ މޮޓޯ ސައިކަލު އިންސްޓޯލްމަންޓަށް ވިއްކުން ހުއްޓިއްޖެއެވެ.
މިހެން މިކަން ދިމާވީ ސަރުކާރުން ވެހިކަލް ރަޖިސްޓަރީކުރުމުގެ ގަވައިދައް ގެނައި ބަދަކަލާ ގުޅިގެންނެވެ.
ދިވެހިރާއްޖޭގައި އެއްގަމު އުޅނަދު ފަހަރު ރަޖިސްޓްރީކުރުމުގެ ގަވާއިދަށް ފަހުން ގެނެވުނު ބަދަލުތަކާ ގުޅިގެން، ބައެއް ވިޔަފާރިތަކުން ބުނެފައިވަނީ އިންސްޓޯލްމަންޓް އުސޫލުން ސައިކަލް ވިއްކުން ހުއްޓާލާފައިވާ ކަމަށެވެ. މިދިޔަ އަހަރުގެ ނޮވެމްބަރު މަހު ޓްރާންސްޕޯޓް މިނިސްޓްރީން ތަޢާރަފުކުރި މިއައު ގަވާއިދުގެ ދަށުން، މިހާރު ކުންފުނީގެ ނަމުގައި ރަޖިސްޓަރީ ކުރެވޭނީ ހަމަ އެކަނި ކުންފުނީގެ ހިންގުމުގެ ބޭނުމަށް ގެންނަ އުޅަނދުފަހަރު އެކަންޏެވެ.
މިހެން މިކަން މިހާރު އޮތް އިރު ކުރީގައި އިންސްޓޯލްމަންޓަށް ނަގާ ސައިކަލު، އިންސްޓޯލްމަންޓުގެ މުއްދަތުގައި ރަޖިސްޓަރީ ކޮށްފައި ހުންނަނީ ސައިކަލު ވިއްކާ ކުންފުނީގެ ވިޔަފާރީގެ ތަކެތީގެ ގޮތައެވެ. އަދި އޭގެ ފަހުން ފައިސާ ދެއްކުން ނިމުމުން ގަތް މީހާގެ ނަންމައްޗަށް ބަދަލު ކުރެއެވެ. އެހެން ނަމަވެސް ސަރުކާރުން ގަވައިދަށް ގެނައި ބަދަލާއެކު މިހާރު ވެހިކަލްތައް ސީދާ ގަންނަ ފަރާތުގެ ނަމުގައި ރަޖިސްޓަރީ ކުރަން ލާޒިމުކުރެއެވެ. އެއީ ފައިސާ ދައްކާ ނިންމާފައިވާ އުޅަނދެއް ކަމަށްވިޔަސް އަދި އިންސްޓޯލްމަންޓަށް ގަންނަ ސައިކަލެއް ވިޔަސް ގަންނަ މީހާގެ ނަމުގައި ރަޖިސްޓަރީ ކުރުން ލާޒިމުވެއެވެ.
މިކަމުގެ ސަބަބުން އިންސްޓޯލްމަންޓަށް ސައިކަލު ގަންނަ ފަރާތްތަކަށާއި ވިއްކާ ފަރާތްތަކަށްވެސް ގޮންޖެހުންތަކެއް ކުރިމަތިވެފައިވެއެވެ.
އިންސްޓޯލްމަންޓަށް ސައިކަލު ވިއްކާ ތަންތަނުން ދެކޭ ގޮތުގައި ފައިސާ ދައްކާ ޚަލާސް ނުކުރަނީސް ގަންނަ މީހާގެ ނަން މައްޗަށް އުޅަނދު ރަޖިސްޓްރީ ކުރުމުން ފައިސާ ގަވައިދުން ނުދައްކާ ހާލަތުގައި އަނބުރާ ސައިކަލު ހޯދުމަށް ބޮޑެތި މައްސަލަތަކެއް ކުރިމަތިވާނެއެވެ.
ސަރުކާރުން މިގެނައި ބަދަލަކީ ކަމާބެހޭ ފަރާތްތަކާ މަޝްވަރާކޮށް ޚިޔާލު ހޯދައިގެން ގެނައި ބަދަލެއް ނޫން ކަމަށް ސައިކަލު ވިޔަފާރި ކުރާ ބައެއް ފަރާތްތަކުން ބުނެފައިވެއެވެ.
ގަވައިދު މިހާރު އޮތް ގޮތުން އިންސްޓޯލްމަންޓަށް ސައިކަލު ވިއްކަން އެފަދަ ވިޔަފާރިތަކުން ފަސްޖެހޭ އިރު، އެއްފަހަރާ ބޮޑު އެއްޗެއް ދީގެން ސައިކަލު ގަނެވޭނެ ތަނަވަސްކަން ނެތް ފަރާތްތަކަށްވެސް މިކަމުގެ ސަބަބުން ބޮޑު ގެއްލުމެއް ވާނެ ކަމަށް ވަނީ ބެލެވިފައެވެ.
