އިންސްޓޯލްމަންޓަށް ޓެކްސް ފައިސާ ދެއްކުމުގައި އިތުރު ލުއިތަކެއް

އިންސްޓޯލްމަންޓަށް ޓެކްސް ފައިސާ ދައްކަން ބޭނުންވާ ފަރާތްތަކަށް އިތުރު ލުއިތަކެއް ދީފައިވާ ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ހާމަކޮށްފި އެވެ.

ފައިސާ ދެއްކުމަށް ދަތިވާ ފަރާތްތަކަށް ބަހާލައިގެން ފައިސާ ދެއްކުމުގެ އިންތިޒާމުތައް މީރާއިން ހަމަޖައްސާދީފައި ވާއިރު، އިންސްޓޯލްމަންޓަށް ފައިސާ ދައްކާ ފަރާތްތަކުން ފުރަތަމަ ޕޭމަންޓު (ކޮމިޓްމަންޓް ޕޭމަންޓު) ގެ އަދަދު ދަށްކުރުމަށް ނިންމާ، ޑޭޓަޑް ޗެކް ބެހެއްޓުމަށް މަޖުބޫރު ކޮށްފައި އޮތުމަށް ވަނީ ލުއިތަކެއް ދީފަ އެވެ. މިދިން ލުއިތައް 30 ޖޫން 2020 ގެ ނިޔަލަށް ދެމިއޮންނާނެ ކަމަށް މީރާއިން ބުނެއެވެ.

މީރާ އިން ދިން ލުއިތައް ހިމެނޭ ގޮތަށް، މިހާތަނަށް 74 އިންސްޓޯލްމަންޓް އެއްބަސްވުމެއްގައި ސޮއިކޮށްފައިވާ ކަމަށް އެ އިދާރާ އިން ބުނެއެވެ. މިހާރު އިންސްޓޯލްމަންޓު އެއްބަސްވުންތަކުގައި ސޮއިކޮށްފައިވާ ފަރާތްތަކަށް ވެސް ޖޫން މަހުގެ ނިޔަލަށް ފައިސާ ދެއްކުން ލަސްކޮށްދިނުމަށް ވަނީ ނިންމާފަ އެވެ. އަދި އެ ފަރާތްތަކުން ފައިސާ ދައްކަން ޖެހޭ މުއްދަތު ވެސް ވަނީ އިތުރުކޮށްދީފަ އެވެ.

މީރާ ގެ އެންފޯސްމަންޓް އެކްޝަންތަކަށް ލުޔެއް ދޭން ނިންމީ، ކޮވިޑް-19 ގެ ސަބަބުން އިގްތިސާދަށް އައިސްފައިވާ ހީނަރުކަމާއެކު މާލީ ގޮންޖެހުންތަކާއި ކުރިމަތިލާން ޖެހިފައިވާ ވިޔަފާރިތަކަށް ލުޔެއް ދިނުމުގެ ބޭނުމުގައި ކަމަށް ކޮމިޝަނަރ ޖެނެރަލް އޮފް ޓެކްސޭޝަން ފަތުހުﷲ ޖަމީލު ވިދާޅުވި އެވެ.

މީރާ ގެ އެންފޯސްމަންޓް އެކްޝަންތަކަށް ލުއި ދިނުމުގެ އިތުރަށް، އެ އިދާރާ އިން އަންނަނީ ޓެކްސް ދައްކަން ޖެހޭ ފަރާތްތަކަށް ޓެކްސް ދެއްކުމުގައި ލުއި ފަސޭހަ އިންތިޒާމުތަކެއް ހަމައްޖައްސަމުންނެވެ. އެގޮތުން، ކޯލް ސެންޓަރުގެ ޚިދުމަތްތައް މެދުކެނޑިފައި ވުމާއި ގުޅިގެން، ވައިބަރ މެދުވެރިކޮށް ޓެކްސްޕޭޔަރުންނަށް ބޭނުންވާ މައުލޫމާތުތައް ދިނުމުގެ އިންތިޒާމުތަކާއި އޮންލައިންކޮށް ފައިސާ ދެއްކޭނެ އިންތިޒާމުތައް ވެސް ވަނީ ހަމަޖައްސާފަ އެވެ.