ކިންގްސްޓަންގެ ޚާއްސަ ޕްރޮމޯޝަނެއް: ސައިކަލު ގަތުމުން އަހަރަކަށް އަޑީތެލާއި ރޭޑިއޭޓަރ ކޫލަންޓް ހިލޭ

ސައިކަލު ގަތުމުން އަހަރަކަށް އަޑީތެލާއި ރޭޑިއޭޓަރ ކޫލަންޓް ހިލޭ ލިބޭ ޕްރޮމޯޝަނެއް ކިންގްސްޓަން ފިހާރައިން ފަށައިފި އެވެ.

މިހިނގާ ޑިސެމްބަރު މަހުގެ 10ން ފެށިގެން އަންނަ އަހަރުގެ ޖެނުއަރީ 10 ގެ ނިޔަލަށް ކުރިއަށް ގެންދާ މި ޕްރޮމޯޝަނާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ކިންގްސްޓަން ގެ ޖެނެރަލް މެނޭޖަރ އަލީ ނިޝާރު ވިދާޅުވީ، މި ޕްރޮމޯޝަންގެ ނަމަކީ "ތެލާ ފެނާ" ކަމަށެވެ. އަދި މި ޕްރޮމޯޝަންގެ ދަށުން އެ މުއްދަތުގެ ތެރޭގައި ކިންގްސްޓަން އިން ގަންނަ ކޮންމެ ސައިކަލަކަށް ރޭޑިއޭޓަރ ކޫލަންޓާއި އަޑީތެޔޮ އަހަރެއް ވަންދެން ހިލޭ ލިބޭނެކަން ނިޝާރު ފާހަގަ ކުރެއްވި އެވެ.

ނިޝާރު އިތުރަށް ވިދާޅުވީ، މި ޕްރޮމޯޝަންގެ މަޤްސަދަކީ ރައްޔިތުންނަށް ލުއިފަސޭހަ ގޮތްތަކެއް ހޯދައިދެއްވުން ކަމަށެވެ. އަދި ޕްރޮމޯޝަންގެ ދަށުން ސައިކަލު ގަންނަ ކަސްޓަމަރުން ކިންގްސްޓަންގެ ސަރވިސް ސެންޓަރަށް އައުމުން އެ ޚިދުމަތް ލިބޭނެ ކަމަށް އޭނާ ވިދާޅުވި އެވެ.

އެކަމާ ގުޅޭގޮތުން މައުލޫމާތު ދެއްވަމުން ކިންގްސްޓަންގެ މެނޭޖަރ، ޝޯވް ރޫމް ފާތިމަތު މާޝާ ސައީދު ވިދާޅުވީ، މި ޕްރޮމޯޝަންގެ ދަށުން އިންސްޓޯލްމަންޓް ފެސިލިޓީތައް މެދުވެރިކޮށް ސައިކަލު ގަންނަ މީހުންނަށްވެސް ބައިވެރިވެވޭނެ ކަމަށެވެ. އަދި އަތޮޅުތެރޭގައި ދިރިއުޅޭ މީހުންނަށްވެސް މި ޕްރޮމޯޝަންގެ ދަށުން ލުއިފަސޭހަ ގޮތްތަކެއް ހަމަޖައްސާފައިވާނެކަން އޭނާ ފާހަގަ ކުރެއްވި އެވެ.

ކިންގްސްޓަން އިން ސައިކަލުގެ ވިޔަފާރި ކުރަމުންދާތާ 3 އަހަރުވެފައިވާ ކަމަށް އެ ފިހާރައިން މައުލޫމާތު ދެއެވެ.