ރާއްޖޭގައި މިހާރު މިއޮތީ ވެރިންގެ ކިބައިން މަދަދު ހޯދުމުގެ ސަޤާފަތެއް: ފިރުޝާން
15 ޖެނުއަރީ 2025 | ބުދަ 05:59ރާއްޖޭގައި މިހާރު މިއޮތް ވެރިކަމުގެ ނިޒާމަށް ބަދަލުގެންނަން ޖެހޭ
ޑިމޮކްރަޓްސްގެ ވަގުތީ ރައީސް އަދި ކުރީގެ މަޖިލިސް މެމްބަރު ހުސެއިން ފިރުޝާން
ރާއްޖޭގައި މިވަގުތު އޮތް ވެރިކަމުގެ ނިޒާމު ބައްޓަންވެފައި އޮތް ގޮތުން ހުރިހާ ބާރެއް އޮތީ ރައީސްގެ އަތުގައި ކަމަށާއި އެހެން ކަމުން ގައުމުގައި މިހާރު މި އޮތީ ވެރިންގެ ކިބައިން މަދަދު ހޯދުމުގެ ސަޤާފަތެއް އުފެދިފައިކަމަށް ދަ ޑިމޮކްރަޓްސްގެ ވަގުތީ ރައީސް ހުސައިން ފިރުޝާން ވިދާޅުވެއްޖެއެވެ.
ރާއްޖޭގެ ވެރިކަމުގެ ނިޒާމުގެ ކަންކަން މިހާރު އޮތްގޮތާއި ގުޅޭގޮތުން ރާއްޖެ ޓީވީގެ "ފަލަސުރުޚީ" ޕްރޮގްރާމުގައި ވާހަކަދައްކަވަމުން ފިރުޝާން ވިދާޅުވީ ރާއްޖޭގެ ވެރިކަމުގެ އޮނިގަނޑު މިހާރު މިއޮތީ އޭރަކު ވެރިއަކަށް ހުންނަ ވެރިއަކަށް ހުރިހާ ބާރެއް ލިބޭގޮތަށް ބައްޓަން ކުރެވޭގޮތަށް ކަމަށެވެ. އެގޮތުން ރައީސް ޑރ. މުހައްމަދު މުއިއްޒުގެ މި ސަރުކާރަށް ބަލާލިނަމަވެސް އެކަން ވަރަށް ރަނގަޅަށް ހާމަވާކަމަށް އޭނާ ވިދާޅުވިއެވެ.
ފިރުޝާން ވިދާޅުވީ މި ސަރުކާރުގައި އެންމެ ބާރުގަދަ މީހަކީ ރައީސުލްޖުމްހޫރިއްޔާ އަށް ވެފައިވާ ކަމަށާއި ވެރިކަމުގައި ހުންނަ ވެރިޔަކު ބޭނުން ނުވާ އެއްވެސް ގޮތަކަށް ގައުމުގައި މިހާރު ކަންކަން ވަމުން ނުދާކަމަށެވެ.
ރައްޔިތުންގެ މަޖިލީހަށް އިޝާރާތް ކުރައްވާ ފިރުޝާން ވިދާޅުވީ މި ސަރުކާރަށް މަޖިލީހުން ލިބިފައިވާ ސުޕަ މެޖޯރިޓީ ވެސް މި އޮތީ ރައީސުލްޖުމްހޫރިއްޔާގެ ހިމާޔަތުގައި، ރައީސުލްޖުމްހޫރިއްޔާގެ އަތްދަށުގައި ކަމަށެވެ. އެގޮތުން މި ސަރުކާރުގެ ސުޕަމެޖޯރިޓީ އޮންނަ މަޖިލިސް ވެސް ސަރުކާރު ޖަވާބުދާރީ ކުރުމުގައި ހުއްޓުމަކަށް އައިސްފައިވާ ކަމަށް ފިރުޝާން ވިދާޅުވިއެވެ. މީގެ އިތުރުން ސަރުކާރުގެ މިނިވަން މުއައްސަސާތަކަށް ވެސް މިހާރު މިއޮތީ ރައީސުލް ޖުމްހޫރިއްޔާ އަތްބާނައި ބޭނުން ގޮތެއް ހެދޭގޮތަށް ހަދާފައިކަމަށް ވެސް ފިރުޝާން ވިދާޅުވިއެވެ.
ފިރުޝާން ވިދާޅުވީ ރައީސުލް ޖުމްހޫރިއްޔާ މާ ބޮޑުމީހަކަށް ހަދައިގެން، މާ ވަރުގަދަ މީހަކަށް ހަދައިގެން އުޅެން އުޅުމުގެ ނަތީޖާ އަކީ މިއަދު މި ސަރުކާރު ޖަވާބުދާރީ ކުރެވެންވެސް އަދި މަޖިލިސް މެމްބަރުންނަށް ރައްޔިތުން ތަމްސީލުކުރެވޭނެ ގޮތެއްވެސް މިއަދު ނެތުން ކަމަށެވެ. އެކަމުގެ ނަތީޖާ މިއަދު ގައުމުން ފެންނަމުންދާ ކަމަށާއި އެގޮތުން މުޅިގައުމުގައި ވައްކަމާއި ކަރަޕްޝަން އިންތިހާއަށް މައްޗަށް ގޮސްފައިވާކަމަށް ފިރުޝާން ވިދާޅުވިއެވެ.
ފިރުޝާން ވިދާޅުވީ ރައްޔިތުންގެ މަޖިލިސް އޮތުމުގެ އަސްލަކީ ރައްޔިތުން ތަމްސީލުކޮށް، ރައްޔިތުން ބޭނުންވާ ގޮތަށް، އެ ބޭނުންވާ ކަންކަން ނިންމުން ކަމަށާއި ނަމަވެސް މިއަދު މަޖިލިސް މެމްބަރުން މި ތަބާވާން ޖެހެނީ ސަރުކާރުގެ ވިޕަކަށް ކަމަށެވެ. އެނޫންގޮތަކަށް މަޖިލިސް މެމްބަރުން ކަންތައް ކޮށްފި ނަމަ ގޮނޑިގެއްލޭނޭ ކަމަށް އޭނާ ވިދާޅުވިއެވެ.
ހުރިހާ ކަމެއްވެސް ގޯސްކޮށް މި ދަނީ ސަރުކާރުގެ މިހާރުގެ އޮނިގަނޑުގެ މައްސަލަ އަކުން ކަމަށް ފާހަގަކުރައްވާ ފިރުޝާން ވިދާޅުވީ މިހާރު ސަރުކާރުގެ މި އޮނިގަނޑު އޮތްގޮތުން މަޖިލިސް މެމްބަރުން ރައީސުލްޖުމްހޫރިއްޔާއަށް ސަލާންޖަހަން ޖެހޭނެ ކަމަށާއި އަދި ކައުންސިލަރުން މަޖިލިސް މެބަރުންނަށް ސަލާންޖަހަން ދާންޖެހޭނެކަމަށެވެ. އެހެން ކަމުން ރާއްޖޭގައި މިހާރު މިއޮތީ ވެރިން، ވެރިންގެ ކިބައިން މަދަދު ހޯދުމުގެ ސަޤާފަތެއްކަމަށް ވެސް ފިރުޝާން ވިދާޅުވިއެވެ.
ރައްޔިތުންގެ މަޖިލީހުން ސަރުކާރު ޖަވާބުދާރީކުރުވަން ބަލާއިރު، މެޖޯރިޓީ އޮތީ ރައީސުލްޖުމްހޫރިއްޔާގެ އަތްދަށުގައި ކަމަށާއި އެހެން ކަމުން މިކަން މިގޮތަށް އޮތްހާ ހިނދަކު ސަރުކާރު ޖަވާބުދާރީ ކުރެވޭނޭ ހަމައެއްވެސް މަގެއް ފެންނަން ނެތް ކަމަށް އޭނާ ވިދާޅުވިއެވެ.
ފިރުޝާން ވިދާޅުވީ ވެރިކަމުގެ ނިޒާމް މިހާރު މިއޮތް ގޮތުން ހުރިހާކަމެއްވެސް ރައީސުލްޖުމްހޫރިއްޔާއާއި ހަމައިން ހުއްޓިފައިވާކަމަށާއި ރައީސުލްޖުމްހޫރިއްޔާ ނުރުހުންވެދާނެތީ އެއްވެސް ކަމެއް މިއަދު ކުރެވެން ނެތްކަމަށެވެ. އެހެންކަމުން ސަރުކާރުގެ މި އޮނިގަނޑު އެތުރިފައި މި އޮންނަގޮތް ބަދަލުކުރުމަކީ މިއަދު ކުރަން ޖެހިފައިވާ ކަމެއް ކަމަށާއި އެކަން ނުކޮށް ރާއްޖެއަށް ކުރިމަތިވަމުން މި އަންނަ ގޮންޖެހުންތަކުން އަރައިނުގެނެވޭނެ ކަމަށް ފިރުޝާން ވިދާޅުވިއެވެ.
