ވަގު ފޯމް ފުރިމީހުން އެނގޭ، ޕީއެންސީގެ ތެރެއިން މިކަން ކުރުމަކީ ލަދުވެތިކަމެއް - އަސްމާ
13 ޖެނުއަރީ 2025 | ހޯމަ 18:23އެކަން ކުރަނީ ބޮޑުތަކުރުފާނު މަގު އާޓިފިޝިއަލް ބީޗާ ދިމާލުގައި ހުންނަ ޕީއެންސީ ޖަގަހައިގެ ހުންނަ ކޮޓަރިއެއްގައި
ޕީއެންސީން ފުރާފައިވާ މެމްބަރޝިޕް ފޯމް ޕާޓީގެ ސެކްރެޓަރީ ޖެނެރަލް އަބްދުއްރަހީމް އާ ހަވާލު ކުރަނީ
ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ)ގެ ތެރެއިން ވަގުފޯމް ފުރިމީހުން އެނގޭ ކަމަށާއި، ޕީއެންސީގެ ތެރެއިން މިކަން ކުރުމަކީ ލަދުވެތިކަމެއް ކަމަށް މާފަންނު މެދު ދާއިރާގެ މެންބަރު އަސްމާ ރަޝީދު ވިދާޅުވެއްޖެއެވެ.
އަސްމާ މިފަދައިން ވިދާޅުވެފައިވަނީ އިދިކޮޅު އެމްޑީޕީގެ ބައެއް އާންމު މެންބަރުންނާއި، ގައުމީ މަޖިލީހުގެ މެންބަރުންނާއި ރައްޔިތުންގެ މަޖިލީހުގެ މެންބަރުން ވަގަށް ޕީއެންސީއަށް ވައްދާފައިވާކަން ފަޅާ އަރާފައިވަނިކޮށް، ޕީއެންސީގެ މަޖިލިސް މެންބަރުން ތިބި ވަޓްސްއެޕް ގްރޫޕަކަށް ފޮނުވި މެސެޖެއްގައެވެ.
އަސްމާ ވިދާޅުވީ އެކަންކުރި މީހުން އެނގޭ ކަމަށާއި، ހިތާމައަކީ ޕީއެންސީގެ ތެރެއިން އެކަން ކުރުން ކަމަށެވެ. އަސްމާގެ މެސެޖުގައި ވިދާޅުވެފައިވަނީ މިއީ މީހުން އިތުރުކުރާ ގޮތް ނޫން ކަމަށާއި، މިއީ ވަރަށް ވިޔާނުދާ ލަދުވެތި ކަމެއް ކަމަށެވެ.
"ވަރަށް ލަދުވެސް ގަނޭ" އަސްމާ ފޮނުވި މެސެޖުގައި ލިޔުއްވާފައިވެއެވެ.
އަސްމާ ވިދާޅުވީ ޕީއެންސީއަށް ވަގަށް ފޯމް ފުރަނީ ކޮންތާކުކަންވެސް މެސެޖުގައި ވިދާޅުވެފައެވެ. އެގޮތުން އެކަން ކުރަނީ ބޮޑުތަކުރުފާނު މަގު އާޓިފިޝިއަލް ބީޗާ ދިމާލުގައި ހުންނަ ޕީއެންސީ ޖަގަހައިގެ ހުންނަ ކޮޓަރިއެއްގައި ކަމަށެވެ. އޭނާ ވިދާޅުވީ މެންބަރުން އިތުރުކުރަން ހުށަހެޅި ފޯމުތަކުގައި ބޭނުންކޮށްފައިވަނި އައިޑީ ކާޑުގައި ހުންނަ ފޮޓޯތަކުގައި މީހާ ލައިގެން ހުންނަ ގަމީސް ބަދަލުކޮށްގެން ނުވަތަ ހެދުމުގައި ކުލަ ޖައްސައިގެން ކަމަށެވެ.
ޕީއެންސީއަށް ވަގަށް މީހުން ވައްދާ މައްސަލަ ފެންމަތިވެފައިވާއިރު، ދުވަހަކުވެސް ސިޔާސީ ޕާޓީއަކަށް ނުވަންނަ މީހުންނާއި، އިދިކޮޅު ޕާޓީތަކުގެ މެންބަރުންނާއި މަޖިލިސް މެންބަރުންވެސް ހިމެނެއެވެ. އަދި މި ފޯމްތަކުގައި މައިގަނޑު ގޮތެއްގައި ޒިންމާދާރުވެރިއެއްގެ ގޮތުގައި ޕާޓީގެ ފަރާތުން ސޮއިކޮށްފައި ހުންނަނީ ވިލިމާލެ ދާއިރާގެ މެންބަރު މުހައްމަދު އިސްމާއިލް އާއި ކެނދިކުޅުދޫ ދާއިރާގެ މެންބަރު މުހައްމަދު އަފޫ ހަމީދެވެ.
ޕީއެންސީގެ ވަގު ފޯމުގެ މައްސަލަ ބޮޑުވެފައި އޮއްވާ، އެމްޑީޕީ ވައިކަރަދޫ ދާއިރާގެ މެންބަރު ހުސައިން ޒިޔާދުވެސް ޕީއެންސީއަށް ވައްދާ ވަގު ފޯމެއް ވަނީ ހުށަހަޅާފައެވެ. ނަމަވެސް އިލެކްޝަންސް ކޮމިޝަނުން ވަނީ އެ ފޯމް ބާތިލްކޮށް، ޒިޔާދުގެ މެމްބަރޝިޕް ބަދަލުކުރަން ހުށަހެޅި މައްސަލައިގައި ފިޔަވަޅު އަޅާނެކަމަށް ބުނެފައެވެ.
