އަޅުގަނޑުގެ ގޮނޑިއާމެދު ގޮތެއް ނިންމާނަމަ މެންބަރު އަފޫގެ ގޮނޑިއާމެދުވެސް ގޮތެއް ނިންމަންޖެހޭނެ - ޒިޔާދު
ގޮނޑިއާމެދު ގޮތެއް ނިމޭއިރުގައި އެ ފޯމްގެ ތިރީގައި ސޮއިކޮށްފައި އިން މީހާގެ ގޮނޑިއާ ދޭތެރޭގައި ވެސް ގޮތެއް ވާންޖެހޭނެ
ވައިކަރަދޫ ދާއިރާގެ މެންބަރު ހުސައިން ޒިޔާދު
ޕާޓީ ބަދަލުކޮށްފައިވާ މައްސަލައިގައި އޭނާގެ ގޮނޑިއާމެދު ގޮތެއް ނިންމާނަމަ އެނާގެ ފޯމުގައި ޒިންމާ ނަގާނެކަމަށް ބުނެ ސޮއިކޮށްފައިވާ މެންބަރު މުހައްމަދު އަފޫ ހާމިދުގެ ގޮނޑިއާމެދުވެސް ގޮތެއް ނިންމަންޖެހޭނެކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.
ޕީއެންސީއަށް ޒިޔާދު ވައްދާފައިވާ މައްސަލައާއި ގުޅިގެން އިލެކްޝަންސް ކޮމިޝަނާއި ބައްދަލުކުރުމަށްފަހު ރާއްޖެޓީވީއާއި ވާހަކަދައްކަވަމުން ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވީ ވައިކަރަދޫގެ އެމްޑީޕީގެ ގިނަ މެންބަރުންނާއި، ދުވަހަކު ޕާޓީއަކަށް ނުވަންނަ ފަރާތްތައްވެސް ޕީއެންސީއަށް ވެއްދުމުން އެ ޝަކުވާތައް އައި ކަމަށެވެ. އަދި ހޯމަ ދުވަހު އޭނާ އޮތީ ކޮން ޕާޓިއެއްގައިތޯ އިއްތިފާގަކުން ޗެކް ކުރި އިރު އިނީ ޕީއެންސީގައި ކަަމަށާއި، އޭނާއަށް ނޭނގި ޕާޓީ ބަދަލުކުރިކަން އެނގުނީ އެހިސާބުން ކަމަށެވެ.
ޒިޔާދު ވިދާޅުވީ ގާނޫނު އަސާސީއަށް ގެނައި ބަދަލާއެކު އޭނާގެ ގޮނޑިއާމެދު ސުވާލު އުފެދޭ ކަމަށެވެ. ނަމަވެސް ގޮނޑި ގެއްލިގެން ކަންބޮޑު ނުވާ ކަމަށާއި، މާދަމާ އިންތިހާބެއް ބޭވިޔަސް ގޮނޑި ކާމިޔާބުކުރާނެ ކަމަށެވެ. ނަމަވެސް އިލެކްޝަންސް ކޮމިޝަނާއި މެދު ރައްޔިތުންގެ އޮތް އިތުބާރު ގެއްލުމުން ދެން ކުރާނެ ކަމެއް ނޯންނާނެ ކަމަށާއި އެއީ ކަންބޮޑުވާކަމެއް ކަމަށް ޒިޔާދު ވިދާޅުވިއެވެ.
ޒިޔާދުގެ ފޯމުގައި ޕާޓީގެ ރަޖިސްޓްރާ ނުވަތަ ޒިންމާވާ ވެރިއެއްގެ ގޮތުގައި އޮތީ ކެނދިކުޅުދޫ ދާއިރާގެ މެންބަރު މުހައްމަދު އަފޫ ހަމީދުއެވެ.
ޒިޔާދު ވިދާޅުވީ ޕާޓީ ބަދަލުކުރުވުން އެއީ ޕީއެންސީއަށް އައުކަމެއް ނޫން ކަމަށެވެ. އަދި މިއީ އެހެން ހުރިހާ ހިސާބެއްގައި ވެސް ކަންކުރާގޮތް ކަމަށް ޒިޔާދު ވިދާޅުވިއެވެ.
ޒިޔާދު ވިދާޅުވީ މިކަން މިހިސާބަށް ކޮންމެ ކޮންމެ މެންބަރެއް ނުކުރާނެ ކަމަށެވެ. އަދި އާންމު ރައްޔިތެއްގެ ޕާޓީ ބަދަލުކުރާއިރު އެ ކުރެވެނީ ބޮޑު ބޭ އިހުތިރާމެއް ކަމަށާއި، އެކަން ކުރަނީ ވެސް އެންގުމެއް ނެތި ކަމަށެވެ. އަދި ޕީއެންސީއަށް ވެއްދިކަން ނޭނގޭ ހާހުން ރައްޔިތުން ތިބޭނެ ކަމަށާއި، މިއީ ބޮޑު އިންސާފެއް ކަމަށެވެ.
ޒިޔާދު ވިދާޅުވީ ޒާތީ މައުލޫމާތާއެކު ޕީއެންސީން ނަގަނީ މީހާ ވަގަށް ކަމަށާއި، މިކަމުގެ މައިގަނޑު ވިސްނުމަކީ ޕާޓީއަށް މީހުން އިތުރުކުރުން ކަމަށާއި، ނޫނީ ޕާޓީއަށް ލިބޭ ފައިސާ އިތުރުކުރުން ކަމަށެވެ.
