ހުކުރު ދުވަހުގެ ރޭ ޣައްޒާ އަށް އިސްރާއީލުން ބޮން އަޅާ 3 މީހުން ޝަހީދުކޮށް އެތައް ބަޔަކު ޒަޚަމް ކޮށްފި
މިހާތަނަށް މަދުވެގެން 46,006 ފަލަސްތީނު މީހުން ޝަހީދުވެ، 109,378 ށް ވުރެ ގިނަ މީހުން އިސްރާއީލުގެ ހަމަލާތަކުގައި ޒަޚަމްވެފައިވެއެވެ.
09 ޖެނުއަރީ 2025 - އިސްރާއީލުން ދީރުލް ބަލާހް އަށް ދިން ވައިގެ ހަމަލާއެއްގައި ދަރިފުޅު ގެއްލުމުން ފަލަސްތީނުގެ މަންމައަކު ހިތާމަކުރަނީ
ހުކުރު ދުވަހުގެ ރޭ ޣައްޒާ ސިޓީގެ ހުޅަނގު ސަރަހައްދަށް އިސްރާއީލުން ދިން ވައިގެ ހަމަލާއެއްގައި 3 ފަލަސްތީނު މީހުން ޝަހީދުވެ، އިތުރު 10 މީހުން ޒަޚަމްވިކަމަށް ވަފާ ނިއުސް އިން ބުނެފިއެވެ.
ވަފާ އިން ބުނިގޮތުގައި އިސްރާއީލުގެ ހަނގުރާމަމަތީ މަތިންދާބޯޓަކުން ހަމަލާ ދިނީ ޣައްޒާ ސިޓީގެ ހުޅަނގު ސަރަހައްދުގައިވާ ރިމާލް ހިސާބުގެ އަލް-ކަންޒް މިސްކިތާ ކައިރީގައި ހުރި އިމާރާތެއްގެ އެޕާޓްމަންޓަކަށެވެ. މި ހަމަލާގައި ޝަހީދުވި މީހުންގެ ތެރޭގައި އަންހެނަކާއި އަންހެން ކުއްޖަކު ހިމެނެއެވެ.
މި ހަމަލާގައި ކައިރީގައި ހުރި ގެތަކަށް ގެއްލުން ލިބުނެވެ.
ބައިނަލްއަޤްވާމީ ޢަދުލުގެ ކޯޓު (އައިސީޖޭ) އިން ޣައްޒާގެ ރަފަހް ގައި ހިންގަމުންދާ ހަނގުރާމަވެރި ޢަމަލުތައް ހުއްޓާލުމަށް ޤާނޫނީ ގޮތުން ލާޒިމް ނިންމުމެއް ނެރުނު ނަމަވެސް، އިސްރާއީލުން އެ ނިންމުމަށް އެއްވެސް އަޅާލުމެއް ނުބަހައްޓާ، ހަނގުރާމައިގެ ސަބަބުން ވީރާނާވެފައިވާ ޣައްޒާ ގައި ނަސްލު ފޮހެލުމުގެ ޢަމަލުތައް ކުރިއަށް ގެންދިއުމަށް ނިންމާފައިވެއެވެ. މި ޢަމަލުތަކަކީ ނަސްލު ފޮހެލުމުގެ ބައިނަލް އަގްވާމީ މުޢާހަދާގެ ދަށުން އިސްރާއީލުގެ މައްޗަށް އޮތް ޒިންމާތަކާ ޚިލާފު ކަންކަމުގެ ގޮތުގައި ވަނީ ފާހަގަ ކުރެވިފައެވެ.
2023 އޮކްޓޯބަރު 7 ން ފެށިގެން އިސްރާއީލުން ގެންދަނީ ޣައްޒާ ގައި ނުރައްކާތެރި ހަނގުރާމައެއް ހިންގަމުންނެވެ. މިހާތަނަށް މަދުވެގެން 46,006 ފަލަސްތީނު މީހުން ޝަހީދުވެ، 109,378 ށް ވުރެ ގިނަ މީހުން އިސްރާއީލުގެ ހަމަލާތަކުގައި ޒަޚަމްވެފައިވެއެވެ.
މީގެ އިތުރުން، މަދުވެގެން 10,000 މީހުން ގެއްލިފައިވެއެވެ. މި މީހުންނަކީ ޣައްޒާގެ އެކި ސަރަހައްދުތަކަށް ދިން ހަމަލާތަކުގައި ވެއްޓިފައިވާ އިމާރާތްތަކުގެ ތެރޭގައި މަރުވެފައިވާ ކަމަށް ބެލެވޭ މީހުންނެވެ.
ފަލަސްތީނުގެ އަދި ބައިނަލްއަޤްވާމީ ޖަމްޢިއްޔާތަކުން ބުނާ ގޮތުގައި މަރުވެ އަދި ޒަޚަމްވެފައިވާ މީހުންގެ ތެރޭގައި ގިނައީ އަންހެނުންނާއި ކުޑަކުދިންނެވެ.
