ރައީސް މުއިއްޒު ރައްޔިތުންނަށް ވައުދުވުމުގެ ނަމުގައި އެ ހަދަނީ ބުހުތާނު ދޮގު:ޑރ. ޑީޑީ
11 ޖެނުއަރީ 2025 | ހޮނިހިރު 11:40ހއ. ތުރާކުނުން ފެށިގެން އައްޑޫ ސިޓީއާއި ހަމައަށް ބަލާލާއިރު، ފެންނަން ހުރީ ޞާލިހުގެ ސަރުކާރުން ފަށާފައިވާ ޕްރޮޖެކްޓުތަކެއް ހުއްޓިފައިވާ މަންޒަރު
އެމްޑީޕީގެ ކުރީގެ ރައީސް ޑރ.އިބްރާހިމް ޑީޑީ
ރާއްޖޭގެ ވެރިކަމުގައި މިހާރު އެ ހުންނެވި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އެހުންނެވީ، ދޮގުމަތިން ދޮގުހައްދަވަމުން ގޮސް، ބުހުތާން ދޮގުހެދުމުން ޑަބަލް ޕީއެޗްޑީ ހައްދަވައިގެން ކަމަށް އެމްޑީޕީގެ ކުރީގެ ރައީސް ޑރ. އިބްރާހިމް ދީދީ ވިދާޅުވެއްޖެއެވެ.
ޑރ.ޑީޑީ މިފަދައިން ވިދާޅުވެފައިވަނީ އެމްޑީޕީން ކުރިއަށް ގެންދިޔަ ޖަގަހަ ޖަލްސާގައި ވާހަކަ ދައްކަވަމުންނެވެ.
ނިމިގެން ދިޔަ ހަފްތާގައި ރައީސް މުއިއްޒު ވަނީ ހުވަދު އަތޮޅުގެ ބައެއް ރަށްތަކަށް ޒިޔާރަތްކޮށްފައެވެ. ހުވަދު އަތޮޅަށް ތިން ދުވަހުގެ މުއްދަތަކަށް ކުރެއްވި މި ދަތުރުފުޅުގައި ރައީސް ވަނީ ހުވަދުއަތޮޅު ދެކުނުބުރީގެ ފަސް ރަށަކަށާއި ހުވަދުއަތޮޅު އުތުރުބުރީގެ ހަތަރު ރަށަކަށް ވަޑައިގެންފައެވެ. އެގޮތުން މި ރަށްރަށަށް ވަޑައިގެން އެމަނިކުފާނު ވަނީ ގިނަ ވައުދުތަކެއް ވެވަޑައިގެންފައެވެ.
ރައީސް ހުވަދު އަތޮޅުގެ ރަށްތަކަށް ކުރެއްވި މި ދަތުރުފުތަކަށް އިޝާރާތްކުރައްވައި ޑީޑި ވަނީ މިއީ ކޮން ބޭނުކަމު ރައީސް ކުރެއްވި ދަތުރުފުޅެއް ތޯ ސުވާލުއުފައްދާފައެވެ. އެގޮތުން ރައީސްގެ މި ދަތުރުފުޅަކީ ރަށްރަށަށް ކަންކަންތައްތަކެއް ކޮށްދެއްވުމުގެ ވައުދުތަކެއް ވެވަޑައިގަތުމަށް ކުރެއްވި ދަތުރުފުޅުތަކެއް ކަމަށް މީހުން ބުނާތީ އަޑުއިވޭކަމަށާއި އެފަދައިން ރަށްރަށަށް ކޮށްދޭ ކަންކަމުގެ ވާހަކަތައް ރައީސް އޮފީހުގައި ޕްރެސްކޮންފަރެންސް އެއް ބާއްވައިގެން ވެސް ދެއްކިދާނޭކަމަށް ޑީޑީ ވިދާޅުވިއެވެ.
ޑީޑީ ވިދާޅުވީ ރައީސް ހުވަދު އަތޮޅަށް ކުރެއްވި އެ ދަތުރުފުޅުގައި އެތަކެއް މިލިއަން ރުފިޔާއެއް ޚަރަދުކުރައްވާފައިވާ ކަމަށާއި އަދި މި އަހަރު ފެށިގެން މި ވޭތުވެ ދިޔަ މަދު ދުވަސްކޮޅުގެ ތެރޭގައި ދަތުރުތަކަށް އެކަނިވެސް އެތަކެއް މިލިއަން ރުފިޔާއެއް ޚަރަދުކޮށްފައިވާ ކަމަށެވެ. ނަމަވެސް ހއ. ތުރާކުނުން ފެށިގެން އައްޑޫ ސިޓީއާއި ހަމައަށް ބަލާލާއިރު، ފެންނަން ހުރީ މީގެ ކުރިން ރައީސް އިބްރާހީމް މުޙައްމަދު ޞާލިހުގެ ސަރުކާރުން ފަށާފައިވާ ހުރިހާ ޕްރޮޖެކްޓުތަކެއް ހުއްޓިފައިވާ ތަންކަމަށް އޭނާ ވިދާޅުވިއެވެ.
ރައީސް މުއިއްޒުގެ މި ސަރުކާރުން އަދި މިހާތަނަށް ވެވަޑައިގެން އެއްވެސް ވައުދެއް ފުއްދަމުން ނުދާ ކަން ފާހަގަކުރައްވާ ޑީޑީ ވިދާޅުވީ ރައީސް މުއިއްޒު ހުވަދު އަތޮޅުގެ ރަށްތަކަށް ކުރެއްވި މި ދަތުރުފުޅުގައި އިތުރު ވައުދުތަކެއް ވުމަށް ކަމަށް ވިދާޅުވެ އެ ހެއްދެވީ ކަނޑައެޅިގެން ރޯ ބުހުތާނު ދޮގުކަމަށެވެ. އަދި ބުހުތާނު ދޮގު ހައްދަވަމުން ހައްދަވަމުން ގޮސް މިހާރު ރައީސް މުއިއްޒު އެ ހުންނެވީ ޑަބަލް ޕީއެޗްޑީ ނަންގަވައިގެން ކަމަށް ވެސް ޑީޑީ ވިދާޅުވިއެވެ.
މީގެ އިތުރުން ޑީޑީ ވަނީ ރައީސް މުއިއްޒުގެ މި ސަރުކާރުން ވޭޕް މަނާކުރުމުގެ ސިޔާސަތަށް ވެސް ވަރަށް ބޮޑަށް ފާޑުވިދާޅުވެ ވާހަކަފުޅު ދައްކަވާފައެވެ. އެގޮތުން ޑީދީ ވިދާޅުވީ ސިއްޚަތަށް ގެއްލުހުރި ކަންކަމަކީ ރައްޔިތުން އެކަމުން ދުރުކުރަން ޖެހޭ ކަންކަންކަމަށާއި އެ ފަދަ ސިޔާސަތުތަކަށް ތާއީދުކުރައްވާ ކަމަށެވެ. ނަމަވެސް ކަންކުރަން ޖެހޭނީ ވަކި އުސޫލެއްގެ ތެރެއިންކަމަށް ޑީޑީ ވިދާޅުވިއެވެ. ނަމަވެސް މި ސަރުކާރުން އެކަންވެސް ކޮށްފައި އެހުރީ އެކަން ކުރަން ޖެހޭ ރަނގަޅު އުސޫލަކުން ނޫންކަމަށް ވެސް އޭނާ ވިދާޅުވިއެވެ. އަދި މި ސަރުކާރުން އެކަން ކޮށްފައި ވަނީ ރައްޔިތުންނަށާއި ޒުވާނުންނަށް ވެސް އެކަމުން ބޮޑެތި ތަކުލީފުތަކެއް އުފުލަން ޖެހޭގޮތަށް ކަމަށް ވެސް ޑީޑީ ވިދާޅުވިއެވެ.
ޑީޑީ ވިދާޅުވީ ރައީސް މުއިއްޒު ހެނދުނު ނެރުއްވާ ގަވައިދު ހަވީރުވާއިރު ބަދަލުކުރައްވާ އުނބައްޖަސަވަމުން ގެންދަވާކަމަށާއި ކަން މިހެން ހުރިއިރު، ރައީސް މުއިއްޒުގެ މި ސަރުކާރުގެ ހަރުދަނާ އެއްވެސް ސިޔާސަތެއް ރައްޔިތުންނަށް ފެންނަން ނެތްކަމަށެވެ.
