އާސެނަލްގެ ކުޅުމާ މެދު ހިތްހަަމަ ޖެހޭ: އާޓެޓާ

އާސެނަލްގެ ކުޅުމާ މެދު ހިތްހަމަ ޖެހޭ ކަމަށް، އެ ޓީމުގެ ކޯޗު މިކޭލް އާޓެޓާ ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއާ ލީގުގައި އާސެނަލް އިން ބްރެންޓްފޯޑާ ދެކޮޅަށް ކުޅުނު މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ރަށުން ބޭރުގައި ކުޅުނު އެ މެޗުން މޮޅުވެ، އާސެނަލް އިން ވަނީ ލީގު ތާވަލްގެ ދެ ވަނަ މަގާމަށް ޖެހިލައިފަ އެވެ.

އާޓެޓާ ބުނީ ބްރެންޓްފޯޑުގެ އަމިއްލަ ދަނޑުގައި އެ ޓީމުން މިހާތަނަށް ދައްކާފައިވާ ކުޅުމަށް ބަލާއިރު، އެ ޓީމާ ދެކޮޅަށް ކުޅުމަކީ އުނދަގޫ ކަމެއްކަން ކުރިން ވެސް އިޙުސާސް ކުރެވުނު ކަމަށެވެ. ޚާއްސަކޮށް އިދިކޮޅަށް ކުޅެން އޮންނަނ ޓީމަކަށް ބްރެންޓްފޯޑުން މައްސަލަތައް ކުރިމަތިކުރުވާކަން ފާހަގަކޮށް އާޓެޓާ ބުނީ، އެ މެޗުގައި ވެސް ފުރަތަމަ ލަނޑު ޖެހީ އެ ޓީމުން ކަމަށެވެ. މެޗުން އާސެނަލް މޮޅުވީ ބްރެންޓްފޯޑުން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ތިން ލަނޑު ޖަހައިގެންނެވެ.

މީގެ އިތުރުން އާޓެޓާ ބުނީ އެއް ލަނޑުން ފަހަތުގައި އޮތްއިރު، އަލުން މެޗުގެ ނަތީޖާ އަނބުރާލުމަށް ވަރަށް ގިނަ މަސައްކަތް ކުރަން ޖެހުނު ކަމަށެވެ. އަދި އެއީ ވަރަށް އުނދަގޫ މަސައްކަތެއް ކަމަށް ވެސް އާޓެޓާ ވަނީ ފާހަގަ ކޮށްފަ އެވެ. އެކަން ފާހަގަ ކުރަމުން އާޓެޓާ ބުނީ، އޭނާ އަށް ޤަބޫލު ކުރެވޭ ގޮތުގައި އާސެނަލްގެ ކުޅުންތެރިން ދެއްކީ ވަރަށް ތަފާތު ހިތްވަރެއް ކަމަށެވެ. ޚާއްސަކޮށް ހަމަޖެހިލައިގެން ތިބެ ކުޅެމުން ދިޔަ މަންޒަރު ކުޅުންތެރިންގެ ފަރާތުން ފެނުނު ކަމަށް ވެސް އާޓެޓާ ބުންޏެވެ.

އިތުރަށް ވާހަކަ ދައްކަމުން އާޓެޓާ ބުނީ، އާސެނަލްގެ ކުޅުންތެރިން ދައްކަމުން އަންނަ ކުޅުމާ މެދު އޭނާ ހިތްހަމަ ޖެހޭ ކަމަށެވެ. އަދި ޓީމަށް މިފަހުން ބަދަލުތަކެއް ގެންނަން ޖެހުނުއިރު، ކުޅުންތެރިން އެ ބަދަލަށް ވަރަށް ފަސޭހަ އިން ފިޓުވެފައިވާކަން ވެސް އޭނާ ފާހަގަ ކުރި އެވެ. އަދި ލީގުގައި ދެން އާސެނަލް އޮތް މެޗަށް ނިކުންނައިރު ވެސް، ޓީމުގެ ޙާލަތު އޮންނާނީ ރަނގަޅަށް ކަމަށް އާޓެޓާ ބުނެފައިވެ އެވެ.

ލީގުގައި ދެން އާސެނަލަށް އޮންނާނީ ހޮނިހިރު ދުވަހުގެ ރޭ ރަށުން ބޭރުގައި ބްރައިޓަންއާ ދެކޮޅަށް ކުޅޭ މެެޗެވެ.