ރެއާލްގެ ފަރިތަކުރުންތަކަށް އަލަބާާ ނިކުންނަން ފަށައިފި

ސްޕެއިންގެ ރެއާލް މެޑްރިޑަށް ކުޅެމުން އަންނަ އޮސްޓްރިއާގެ ޑިފެންޑަރު، ޑޭވިޑް އަލަބާ އެ ކުލަބުގެ ފަރިތަކުރުންތަކަށް ނިކުންނަން ފަށައިފި އެވެ.

އުމުރުން 32 އަހަރުގެ އަލަބާ ވަނީ ކަކުލަށް ލިބުނު އަނިޔާއެއްގެ ސަބަބުން ގިނަ ދުވަސްތަކެއް ވަންދެން ކުޅުމާ ދުރުގައި ހުންނަން ޖެހިފަ އެވެ. އަލަބާ އަށް އަނިޔާވީ 2023 ވަނަ އަހަރުގެ ޑިސެމްބަރު މަހުގެ ތެރޭގައި ރެއާލް އިން ސްޕެނިޝް ލީގުގައި ވިޔަރެއާލާ ދެކޮޅަށް ކުޅުނު މެޗުގަ އެވެ. އޭގެ ފަހުން އަލަބާ ކުޅުމާ ދުރުގައި ހުންނައިރު، ހުސްވި ޑިސެމްބަރު މަހުގެ ތެރޭގައި އޭނާ ރެއާލްގެ ފަރިތަކުރުންތަކުގައި ބައިވެރިވާަން ފަށާފައިވާ ކަމަށް ވަނީ ރިޕޯޓުކޮށްފަ އެވެ.

ފަރިތަކުރުންތަކުގައި ބައިވެރިވާާން އަލަބާ ފަށާފައިވާއިރު، ރެއާލް އިން މިވަގުތު އިސްކަން ދޭނީ އޭނާގެ ޙާލަތު ދެނެގަތުމަށް ކަމަށް ވެސް ސްޕެއިންގެ މީޑިއާ ތަކުގައި ވަނީ ބުނެފަ އެވެ. ރެއާލް އިން އަލަބާގެ ކަންކަމުގައި ގެން ގުޅޭ ޕްލޭންތަކާ އެއްގޮތަށް ކުރިއަށްދާ ނަމަ، ޖަނަވަރީ މަހުގެ 19 ވަނަ ދުވަހު ސްޕެނިޝް ލީގުގައި ރެއާލް އިން ލަސް ޕަލްމާސްއާ ދެކޮޅަށް ރެއާލް ކުޅޭ މެޗުގައި އަލަބާ އަށް ކުޅެވޭނެ ކަމަށް ރެއާލްގެ މެޑިކަލް ޓީމުން ވަނީ އަންދާޒާކޮށްފަ އެވެ.

ޖަރުމަނުގެ ބަޔާން މިއުނިކް ދޫކޮށްލުމަށްފަހު، 2021 ވަނަ އަހަރު ރެއާލަށް ބަދަލުވި އަލްބާ އަކީ އެ ކުލަަބުގައި މުހިންމު ދައުރެއް އަދާ ކުރާ ކުޅުންތެރިޔެކެވެ. ރެއާލްގައި މިވަގުތު ވެސް އަނިޔާގެ މައްސަލަ ބޮޑުވެފައިވާއިރު، މި ދަނޑިވަޅުގައި އަލަބާ އަލުން އަނބުރާ ކުޅުމުގެ ތެރެއަށް އައުމަކީ ރެެއާލްގެ ކޯޗު ކާލޯ އަންޗެލޮޓީ އަށް ލިބޭނެ ވަރަށް ބޮޑު ހަމަ ޖެހުމެއް ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ.