ޑެނީ އޮލްމޯ ހުރީ ބާސެލޯނާ ދޫކޮށްލާ ގޮތަކަށް ނޫން
2 ޖެނުއަރީ 2025 | ބުރާސްފަތި 05:48ބާސެލޯނާ އަށް އޮލްމޯ ރަޖިސްޓްރީ ކުރެވިފައި ނުވާތީ، މިހާރު އޭނާ އަށް ހިލޭ ޓްރާންސްފާއެއްގައި ކުލަބު ބަދަލު ކުރުމުގެ ފުރުސަތު އޮންނާނެ އެވެ.
ބާސެލޯނާ އަށް ކުޅެމުން އަންނަ ޑެނީ އޮލްމޯ
ބާސެލޯނާ އަށް ކުޅެމުން އަންނަ ސްޕެއިންގެ އެޓޭކިން މިޑްފީލްޑަރު ޑެނީ އޮލްމޯ ހުރީ އެ ކުލަބު ދޫކޮށްލާ ގޮތަށް ނޫން ކަމަށް އޭނާގެ އެޖެންޓު އެންޑީ ބަރާ ބުނެފި އެވެ.
ޖަރުމަނުގެ އާރްބީ ލައިޕްޒިގް ދޫކޮށްލުމަށްފަހު އޮލްމޯ ބާސެލޯނާ އަށް ބަދަލުވީ މިއަހަރުގެ އޯގަސްޓު މަހުގެ ތެރޭގަ އެވެ. ކުރިން ބާސެލޯނާގެ ޒުވާން އުމުރުފުރައިގެ ޓީމަށް ވެސް ކުޅެފައިވާ އޮލްމޯ ވަނީ ބާސެލޯނާ އާއެކު ހަ އަހަރު ދުވަހުގެ އެއްބަސްވުމެއްގައި ސޮއި ކޮށްފަ އެވެ. އަދި މިހާތަނަށް އޭނާ ވަނީ ބާސެލޯނާ އަށް 15 މެޗު ކުޅެދީފަ އެވެ.
ނަމަވެސް އޮލްމޯ ރަޖިސްޓްރީ ކުރުމުގައި ބާސެލޯނާ އަށް ވަނީ އެތަކެއް ގޮންޖެހުންތަކާ ކުރިމަތިލާން ޖެހިފަ އެވެ. އޮލްމޯ ރަޖިސްޓްރީ ކުރުމަށް މިހާތަނަށް ބާސެލޯނާ އިން ދެ ފަހަރެއްގެ މަތިން ހުށަހަޅާފައިވާއިރު، އެ ދެ ފަހަރު ވެސް ވަނީ ބާސެލޯނާގެ ހުށަހެޅުން ބޭރުކޮށްލައިފަ އެވެ. ބާސެލޯނާ އިން އޮލްމޯ ގަތްއިރު ވެސް، އެ ކުލަބުގެ މާލީ ޙާލަތު ތަން ނުދޭތީ، އޮލްމޯ ރަޖިސްޓްރީ ކުރުމަށް ބާސެލޯނާ އަށް ވަނީ ހުސްވި ޑިސެމްބަރު މަހުގެ ނިޔަލަށް ފުރުސަތު ދީފަ އެވެ.
އެ މުއްދަތު ހަމަވީއިރު ވެސް، ބާސެލޯނާ އަށް އޮލްމޯ ރަޖިސްޓްރީ ކުރެވިފައި ނުވާތީ، މިހާރު އޭނާ އަށް ހިލޭ ޓްރާންސްފާއެއްގައި ކުލަބު ބަދަލު ކުރުމުގެ ފުރުސަތު އޮންނާނެ އެވެ. ނަމަވެސް އޮލްމޯގެ އެޖެންޓު ބުނެފައި ވަނީ އޮލްމޯ ނިންމީ ބާސެލޯނާގައި މަޑު ކުރަން ކަމަށެވެ. ސަބަބަކީ ބާސެލޯނާ އިން އޮލްމޯ ބަހައްޓަން ބޭނުންވުން ކަމަށް ވެސް އޭނާގެ އެޖެންޓު ވަނީ ބުނެފަ އެވެ. އޮލްމޯ ބޭނުން ވަނީ ބާސެލޯނާ އަށް ކުޅެންކަން ފާހަގަ ކުރަމުން އޭނާގެ އެޖެންޓު އިތުރަށް ބުނީ، އެހެން އެއްވެސް ކުލަބަކަށް ބަދަލުވާން މިވަގުތު ވިސްނަމުން ވެސް ނުދާ ކަމަށެވެ.
އޮލްމޯގެ ރަޖިސްޓްރޭޝަންގައި ބާސެލޯނާ އަށް ކާމިޔާބު ހޯދީފައިނުވާއިރު، މިހާރު އެކަން ސްޕެއިންގެ ފުޓުބޯޅަ ފެޑެރޭޝަން (އާރުއެފްއީއެފް) އަށް ހުށަހަޅާފައިވާ ކަމަށް ވެސް ބާސެލޯނާ އިން ވަނީ ހާމަކޮށްފަ އެވެ.
