ގޯއްޗާއި ފްލެޓްގެ މައްސަލަ - ދެން ދާންވީ މުއްތަލިބު އަރިހު ސަލާން ޖަހަން؟

މި ސަރުކާރަށް އަހަރެއް ފުރުނީ މި އިހަކަށް ދުވަހުއެވެ. ދާދި އިހަކަށް ދުވަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ ކެބިނެޓަށް ބަދަލު ގެންނަވައި، ބައެއް މިނިސްޓްރީ ތައް އެއްކޮށް ލައްވައިފި އެވެ. ރައީސް މުއިއްޒުގެ ސަރުކާރުގައި މިއީ ކެބިނެޓަށް ބަދަލު ގެންނެވި ދެވަނަ ފަހަރެވެ.

މިނިސްޓްރީ އޮފް ފިނޭންސް އާއި ޕްލޭނިން މިނިސްޓްރީ އެއްކޮށްލައި މިހާރު ވަނީ މިނިސްޓްރީ އޮފް ފިނޭންސް އެންޑް ޕްލޭނިންގ އަށް ބަދަލުކޮށްފައެވެ. އެ މިނިސްޓްރީ ގެ މިނިސްޓަރު ކަމުގެ މަޤާމް އަށް އައްޔަން ކުރެއްވީ މޫސާ ޒަމީރެވެ. މީގެ އިތުރުން ހައުސިންގ އާއި އިންފްރާސްޓްރަކްޗާރ އެއްކޮށްލައި މިހާރު ވަނީ އެ މިނިސްޓްރީގެ ނަން މިނިސްޓްރީ އޮފް ހައުސިން އެންޑް އިންފްރާސްޓްރަކްޗަރ އަށް ބަދަލުކޮށްފައެވެ. އެ މިނިސްޓްރީ ގެ މިނިސްޓަރު ކަމުގެ މަޤާމް އަށް އައްޔަން ކުރެއްވީ ޑރ. އަބްދުﷲ މުއްތޮލިބެވެ. ހަޔަރ އެޑިޔުކޭޝަން މިނިސްޓަރަކަށް ހުންނެވި ޑރ. މަރިޔަމް މާރިޔާ ބަދަލުކުރައްވާފައިވަނީ އެނިމަލް ވެލްފެއާ އެންޑް އެގްރިކަލްޗަރ މިނިސްޓަރަކަށެވެ. އަދި ހައުސިން މިނިސްޓަރު ޑރ.އަލީ ހައިދަރު ވަނީ ހަޔަރ އެޑިޔުކޭޝަން މިނިސްޓަރ ކަމަށް ބަދަލުކުރައްވާފައެވެ. މިނިސްޓަރު މާރިޔާ އެނިމަލް ވެލްފެއާ އެންޑް އެގްރިކަލްޗަރ ބަދަލުކުރެއްވިއިރު، އެ މިނިސްޓްރީގައި ކުރިން ހުންނެވި ޑރ. އައިޝަތު ރަމީލާ މަގާމުން އިސްތިއުފާ ދެއްވުމާ ގުޅިގެން އެ މިނިސްޓްރީ ހިންގެވުމާ ވަގުތީ ގޮތުން ހަވާލުވެވަޑައިގެންނެވެ.

މި ބަަލުކުރެއްވި ބަދަލުކުރެއްވުން މި ދިމަވަނީ ހައުސިން މިނިސްޓަރކަމުގައި ހުންނެވި ހައިދަރުގެ އިސްތިއުފާއަށް ކެނޑިނޭޅި އާއްމުން ގޮވަމުން ދިޔަ ދަނޑިވަޅަކާއެވެ. ވަޒީރުގެ އަރިހަށް ގޮސް ގޮސް، ވަޒީރާއި ބައްދަލު ނުވެގެން އާއްމުން ހަނާވާ އިރު ވެސް ވަޒީރަށް ރައްޔިތުންގެ އަޑެއް ނީވުނެވެ.

ގޯއްޗާއި ފްލެޓްގެ މައްސަލައިގައި އާއްމުން ދަނީ ވެރިކަމުގެ ފުރަތަމަ ދުވަހުން ފެށިގެން އެއް އިދާރާއިން، އަނެއް އިދާރާއިން އެ ފްލެޓާއި ގޯތިތަކަށް ވާ ގޮތެއް ނޭނގިގެން ސަލާން ޖަހަމުންނެވެ. ބަދަލުވަނީ ސަލާން ޖަހަން ދާން ޖެހޭ ތަނެވެ. ޖަވާބު ހޯދަން ސަލާން ޖެހޭ މީހުންނެވެ. ދެންވީ އާ ވަޒީރުގެ އަރިހަށް ސަލާންޖަހަން ދާންތޯ އާއްމުން މިއަދު ސުވާލު ކުރެއެވެ. ވަޒީރު ބަދަލުވެއްޖެއެވެ. ދެން ވެސް ކަންކަން ބަދަލުވާނެ ކަމުގެ ރާހަތަށް ރައްޔިތުންނަކަށް ނެތެވެ.

ފްލެޓާއި ގޯތި މައްސަލައިގައި މި ސަރުކާރުގެ އަމަލުތައް ހުރި ގޮތުން އެނގިގެން ދަނީ ރައީސް ޑރ.މުހައްމަދު މުއިއްޒުގެ ދޮގުވެރިކަންކަމަށް އާއްމުން އެދަނީ ކޮންމެ ހަފްތާއަކު މުޒާހަރާގައި ގޮވަމުންނެވެ. ރައީސް މުއިއްޒުގެ ސަރުކާރުގައި ފްލެޓާއި ގޯތި ދޫނުކޮށް ހިފަހައްޓަމުންދާތީ ކަންބޮޑުވާ ވާހަކަ އަޑު އިއްވަން އޭސީސީ އާއި މިނިސްޓްރީ އަށް ދެވުނު އަދަދެއް މި އާއްމުންނަކަށް ނޭނގެއެވެ. ޝަކުވާތައް އަޑުއަހާނެ މީހަކު ނެތީއެވެ. އާ ވަޒީރު މަޤާމާއި ހަވާލުވެވަޑައިގެން މި ވީހާ ތަނަށް ވެސް މިކަމާ އެއްޗެއް ވިދާޅުވާނަމޭ ހަމަ ހިތްޕުޅަށް އަރާ ވަޑައި ނުގަންނަވައެވެ.

އާއްމުން ދިރިއުޅެމުން މިދަނީ ވަރަށް ހާލުގައި ކަމަށް ބުނެ އާއްމުން އެދަނީ މީޑިއާ އާއި މީސްމީޑިއާގައި އުދާސްތައް ބަންޑުންކޮށްލަމުންނެވެ. އެގޮތުން އެއް ކޮޓަރި އެއްގައި ދަރިންނާއި، މައިންބަފައިން ގޮވައިގެން ވަރަށް ދަތި ހާލުގައި ދިރިއުޅެމުންދާކަމުގެ ޝަކުވާ އާއްމުން ދަނީ ކުރަމުންނެވެ. އާއްމުން ދަނީ ފްލެޓާއި ގޯތި ނުދީ ސަރުކާރުން ލަސްކުރަނީ ސިޔާސީ މަޤްސަދެއްގައި ކަމަށް ފާހަގަކޮށް އެކަމަށް ފާޑު ކިޔަމުންނެވެ. މިއިން ކަމަކާއި އާ ވަޒީރު ވެސް މާބޮޑު ސަމާލުކަމެއް ދެއްވާހެނެއް ހިއެއް ނުވެއެވެ. ރައްޔިތު މީހާ ވަޒީރާއި ބައްދަލުކުރަން ގޮސް އާދޭސް ކުރުން ނޫން ގޮތެއް ރައްޔިތު މީހާއަކަށް އޮތްތަނެއް ކަން ހިނގާ ގޮތުންނެއް ނުފެނެއެވެ.