އިމްޕޯޓު އެކްސްޕޯޓުން ނޮވެމްބަރު މަހު ދައުލަތަށް 249 މިލިޔަން ރުފިޔާ ލިބިފައިވާކަމަށް ކަސްޓަމްސްގެ ތަފާސްހިސާބުތަކުން ދައްކައިފިއެވެ.
މޯލްޑިވްސް ކަސްޓަމްސް ސަރވިސްއިން، އާންމުކޮށްފައިވާ ތަފާސްހިސާބުތައް ދައްކާ ގޮތުން ތެލަށް ކުރި ހޭދަ އުނިކޮށް މިދިޔަ އަހަރާއި މިއަހަރު އިމްޕޯޓް ހުރީ އެއްވަރެއްގައެވެ.
އެގޮތުން މިދިޔަ އަހަރުގެ ނޮވެމްބަރު މަހު އަދި މިއަހަރުގެ ނޮވެމްބަރު މަހުވެސް އިމްޕޯޓްކޮށްފައިވަނީ 3.4 ބިލިޔަން ރުފިޔާގެ މުދަލެވެ. ނަމަވެސް ތެލަށް ކުރި ހޭދައާއި އެކު މިދިޔަ އަހަރު ނޮވެމްބަރު މަހު ޖުމްލަ 4.3 ބިލިޔަން ރުފިޔާގެ މުދާ ވަނީ ރާއްޖެއަށް އެތެރެކޮށްފައެވެ.
މިއަހަރު ނޮވެމްބަރު މަހު ރާއްޖެއަށް އެތެރެކޮށްފައިވަނީ 4 ބިލިޔަން ރުފިޔާގެ މުދަލުގައެވެ. ނޮވެމްބަރުމަހު ރާއްޖެއަށް އެންމެ ގިނައިން އެތެރެކޮށްފައިވަނީ މެޝިނަރީ އާއި އިލެކްޓްރިކް ސާމާނު، ތެލުގެ ބާވަތްތަކުގެ އިތުރުން ކާބޯތަކެތީގެ ބާވަތްތަކެވެ. އަދި ރާއްޖެއަށް އެންމެ ގިނައިން މުދާ އެތެރެކޮށްފައިވަނީ ޔޫ.އޭ.އީ، ޗައިނާ، އިންޑިއާ، ސިންގަޕޫރު އަދި މެލޭޝިއާއެވެ.
މީގެތެރެއިން ޔޫ.އޭ.އީ އިން 103 މިލިއަން ރުފިޔާގެ މުދާ އެތެރެކޮށްފައިވާއިރު، ޗައިނާއިން އެތެރެކުރި މުދަލުގެ އަގު 608 މިލިއަން ރުފިޔާއަށް އަރައެވެ. އަދި އިންޑިއާ އިން 582 މިލިޔަން ރުފިޔާގެ މުދާ ރާއްޖެއަށް އެތެރެކޮށްފައި ވައިރު، ސިންގަޕޫރުން އެތެރެކުރި މުދަލުގެ އަގު 253 މިލިޔަން ރުފިޔާއަށް އަރާކަމަށް ތަފާސް ހިސާބުތަކުން ދައްކާފައިވެއެވެ.
2023 ވަނަ އަހަރާއި އަޅާބަލާއިރު ނޮވެމްބަރު މަހު އިމްޕޯޓު އެއްވަރެއްގައި ހިފެހެއްޓިފައިވާއިރު، ކާބޯތަކެއްޗާއި، ތަލާއި އަދި އިލެކްޓްރޯނިކް ސާމާނާއި މެޝިނަރީތަކަށް ކުރި ހޭދަ 500 މިލިޔަން ރުފިޔާއަށްއަރައެވެ. އެގޮތުން ކާބޯތަކެތީގެ އިމްޕޯޓް އަގު ހުރީ 883 މިލިޔަން ރުފިޔާއެވެ.
މެޝިނަރީ އަދި އެލެކްޓްރޯނިކް ސާމާނުގެ އިމްޕޯޓް އަގު 717 މިލިޔަން ރުފިޔާގައި ހުރިއިރު، މި ދިޔަ ނޮވެމްބަރު މަހު ތެލަށް 582 މިލިޔަން ރުފިޔާ ހޭދަކޮށްފައިވެއެވެ. ކަސްޓަމްސްގެ ތަފާސްހިސާބުތައް ދައްކާގޮތުން ރާއްޖެއިން މުދާ އެކްސްޕޯޓުކުރި މިންވަރު ވަނީ ދަށްވެފައެވެ. އެގޮތުން މިދިޔަ އަހަރު ނޮވެމްބަރުމަހު ރާއްޖެއިން ވަނީ 216 މިލިޔަން ރުފިޔާގެ މަސް ބޭރުކޮށްފައެވެ. ނަމަވެސް މިއަހަރުގެ މި މުއްދަތުގައި އެކްސްޕޯޓް ހުރީ 120 މިލިޔަން ރުފިޔާގައެވެ.
ތަފާސްހިސާބުތައް ދައްކާގޮތުން ނޮވެމްބަރު މަހު ރާއްޖެ އިމްޕޯޓު އެކްސްޕޯޓުން ވަނީ 249 މިލިޔަން ރުފިޔާ ލިބިފައެވެ. މިދިޔަ އަހަރުގެ މިމުއްދަތުގައި އިމްޕޯޓު އެކްސްޕޯޓުން ލިބިފައިވަނީ 429 މިލިޔަން ރުފިޔާއެވެ.
