މަންމޯހަން ސިންގް އަވަހާރަވުމާ ގުޅިގެން ރައީސް ތައުޒިޔާ ވިދާޅުވެއްޖެ
27 ޑިސެމްބަރު 2024 | ހުކުރު 08:09މަންމޯހަން ސިންގް އަވަހާރަވެފައި ވަނީ ސިއްހީ ހާލުކޮޅު ކުއްލިއަކަށް ދެރަވުމާ ގުޅިގެން ފަރުވާދެމުން ދަނިކޮށް
އިންޑިއާގެ ކުރީގެ ބޮޑުވަޒީރު މަންމޯހަން ސިންގް. ފޮޓޯ: ޑެއިލީ ސަން
އިންޑިއާގެ ކުރީގެ ބޮޑުވަޒީރު ޑރ. މަންމޯހަން ސިންގް އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެ އެވެ.
2004 ވަނަ އަހަރުން ފެށިގެން 2014 ވަނަ އަހަރާ ހަމައަށް އިންޑިއާގެ ބޮޑުވަޒީރުކަން ކުރެއްވި މަންމޯހަން ސިންގް އަކީ އެގައުމުގެ 14 ވަނަ ބޮޑުވަޒީރެވެ.
މަންމޯހަން ސިންގް އަވަހާރަވެފައި ވަނީ ސިއްހީ ހާލުކޮޅު ކުއްލިއަކަށް ދެރަވުމާ ގުޅިގެން ނިއުދިއްލީގައި ހުންނަ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އެއިމްސް) ގައި ފަރުވާ ދެމުން ދަނިކޮށް ބުރާސްފަތު ދިވަހުގެ ރޭގެ ވަގުތެއްގަ އެވެ. އޭނާ އަވަހާރަވިއިރު އުމުރުފުޅަކީ 92 އަހަރެވެ.
މަންމޯހަން ސިންގް އަވަހާރަވުމާ ގުޅިގެން ހުކުރު ދުވަހުގެ ހެނދުނު "އެކްސް" ގައި ކުރެއްވި މެސެޖެއްގައި 2011 ވަނަ އަހަރު ސިންގް ރާއްޖެއަށް ކުރެއްވި ދަތުރުފުޅުގެ ހަނދާން އާކުރައްވަމުން ރައީސް ވިދާޅުވީ މަންމޯހަން ސިންގް ގެ އެ ދަތުރުފުޅަކީ ރާއްޖޭގެ އިގުތިސޯދީ އަދި އިޖުތިމާއީ ކުރިއެރުމަށް މުހިންމު ދަތުރުފުޅެއް ކަމުގައެވެ.
ރައީސް ވިދާޅުވި ގޮތުގައި ކުރިއެރުމާއި ތަރައްގީއަށް ސިންގް ދެއްވި އަހައްމިއްޔަތާއި އެމަނިކުފާނުގެ 'ލުކް އީސްޓް ޕޮލިސީ' ހަރުދަނާ ކުރުމަށް ކުރެއްވި މަސައްކަތުން މުޅި ދެކުނު އޭޝިއާ ސަރަހައްދުގައި ތަރައްގީ އާއި ގުޅުންތައް ކުރިއެރުވުމުގައި މުހިންމު ދައުރެއް އަދާކުރި ކަމުގަ އެވެ.
އިތުރަށް ވިދާޅުވީ އިންޑިއާގެ ރައްޔިތުންނަށް ދިމާވެފައިވާ މި ހިތާމަވެރި ދަނޑިވަޅުގައި، އެމަނިކުފާނާއި ދިވެހި ރައްޔިތުން ބައިވެރިވާ ކަމަށެވެ.
އިންޑިއާގެ ބޮޑުވަޒީރު ނަރެންދްރަ މޯދީ "އެކްސް" ގައި ކުރެއްވި މެސެޖެއްގައި ވިދާޅުވީ ފިނޭންސް މިނިސްޓަރުކަން ހިމެނޭހެން ސަރުކާރުގެ އެކި މަގާމުތަކުގައި ސިންގް އަދާކުރެއްވި ދައުރުން އެ ގައުމުގެ އިގުތިސޯދީ ސިޔާސަތަށް ވަރުގަދަ އަސަރުތަކެއް ކުރި ކަމަށެވެ. އެގޮތުން ސިންގް ފާހަގަކުރެއްވެނީ އިހުތިރާމު ލިބިގެންވާ އިގުތިސޯދީ މާހިރެއްގެ ގޮތުގައި ކަމަށެވެ.
ބޮޑުވަޒީރުގެ ހައިސިއްޔަތުން ރައްޔިތުންގެ ދިރިއުޅުމުގެ ހާލަތު ރަނގަޅު ކުރެއްވުމަށް ފުޅާދާއިރާއެއްގައި ސިންގް މަސައްކަތްޕުޅު ކުރެއްވިކަން ވެސް މޯދީ ފާހަގަކުރެއްވި އެވެ.
