ރައީސް އަށް ކަމެއް ނޭނގޭ ކަމަށް ވިދާޅުވެއްޖެ ނަމަ އެއީ ރޯ ބުހުތާން ދޮގެއް ކަމަށާއި، ރަނގަޅަށް ވިއްޔާ އެކަމެއް ކޮށްފައި އޮންނާނީ ރައީސްގެ އިރުޝާދުގެ ދަށުން ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ ހަރުގެ ޖަލްސާގައި މެންބަރު އަހުމަދު ދީދީ ވަނީ މި ސަރުކާރުގެ ސިއްރު ވައްކަން ނޭނގޭ ކަމަށް ރައީސް ވިދާޅުވެފައި ވަނިކޮށް ރޯހިތު ކިޔާ މީހަކު ރައީސްގެ ދިފާއުގައި ނުކުމެފައިވާ ކަމަށެވެ. އެ ހިސާބުން ރައީސަށް ކަމެއް ނޭނގޭ ކަމަށް ވިދާޅުވެއްޖެ ނަމަ އެއީ ރޯ ބުހުތާން ދޮގެއްކަން މިހާރު އެނގޭ ކަމަށް ދީދީ ވިދާޅުވިއެވެ. އެހެން ވިދާޅުވެއްޖެ ނަމަ އެކަން މާކުރިން ރައީސަށް އެނގޭނެ ކަމަށް ދީދީ ވިދާޅުވިއެވެ.
މީގެ އިތުރުން ދީދީ ވަނީ ރައީސް މުއިއްޒު ވެރިކަން ކުރައްވަމުން ގެންދަވަނީ އެލް ބޯޑު ނުވަތަ ލާރނިންގ ބޯޑު ޖައްސަަވައިގެން ކަމަށް ސިފަކުރައްވާފައެވެ. ހަފްތާގެ ނިމޭ ދުވަހުގެ ކުރީ ދުވަހު މި ހަފްތާގައި ވެސް ފެނުނީ އެފަދަ މަންޒަރެއް ކަމަށް ދީދީ ވިދާޅުވިއެވެ.
އޭނާ އެފަދައިން ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ ކެބިނެޓަށް ބަދަލު ގެންނަވައި، ބައެއް މިނިސްޓްރީތައް އެއްކޮށްލައްވާފައިވާތީ އެކަމަށް އިޝާރާތްކުރައްވައެވެ. އެ މިނިސްޓްރީތައް ވަކިކުރެއްވީ އެ ތަންތަނުން ދޭ ޚިދުމަތް ވަރުގަދަކޮށް އެ ޚިދުމަތްތައް ވަރުގަދަކުރުމަށް ކަމަށް ރައީސް ވިދާޅުވެފައިވާ ކަމަށާއި ފެނިގެން ދިޔަ މަންޒަރަކީ އެތަންތަން ވަކިކޮށްގެން ވައްކަން ކުރި މަންޒަރުކަމަށް ދީދީ ވިދާޅުވިއެވެ.
ވަކިކޮށްލި މިނިސްޓްރީތައް އަނެއްކާ އެއްކޮށްލަނީ ވާންވީ ގޮތެއް ނުވާންވީ ގޮތެއް ރައްޔިތުންނަށް ނޭނގޭ. ހެނދުނު ވިދާޅުވާ އެއްޗެއް ނޫން ހަވީރު ވިދާޅުވީ. ވާންވީ ގޮތެއް ނުވާންވީ ގޮތެއް މިހާރަކު ނޭނގޭ. މީގެ 25 ވަރަކަށް ދުވަސް ކުރިން ރައީސްގެ ސްޕޯކްސް ޕަރސަން ވިދާޅުވި މުތުލަގަށް ކެބިނެޓަށް އެއްވެސް ބަދަލެއް ގެންނަވާކަށް ހިތުގަ ނެތޭ. އެކަމުގެ ޔަޤީންކަން ދެމޭ. އެފަހުން މަހެއް ނުވޭ. ހަފްތާ ނިމުމުގެ ކުރީ ދުވަހު ފެނުނީ ހަފްތާ ފެށޭ ދުވަސް ކުރީ ދުވަސް ނާންނަ ވަޒީރެއްގެ މިނިސްޓްރީ ބަދަލު ކުރެއްވިތަން. އެހެންވީމަ ބަހާ އަމަލާ ދިމާ ނުވޭ.މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ
މީގެ އިތުރުން ވެރިކަމަށް ވަޑައިގަތުމުގެ ކުރިން ހާމަ ނުކުރާނެ އެއްވެސް ކަމެއް ނޮއޮންނާނެ ކަަމަށް ރައީސް މުއިއްޒު ވިދާޅުވި ނަމަވެސް ކަން ވެގެން ދިޔައީ އެއާއި ދިމާ އިދިކޮޅަށް ކަމަށް ދީދި ވަނީ ވިދާޅުވެފައެވެ. ވަރަށް ސިއްރިއްޔާތުގައި ވަރަށް ގިނަ ކަންކަން ކުރަމުން ދަނިކޮށް އެކަންކަން ވެސް ފަޅާ އަރާފައިވާ ކަމަށް ދީދީ ވިދާޅުވިއެވެ. އެހާ ހިސާބުން ސަރުކާރަށް ހަދާނެ ގޮތް ހުސްވެ އުނބަށް ޖަހާފައިވާ ކަމަށް ވެސް ދީދީ ވަނީ ސިފަކުރައްވާފައެވެ.
ސަރުކާރުން ފައިސާ ނެތް ކަމަށް ބުނެ ދައްކާ ވާހަކަ އާއި ސަރުކާރުން ކުރާކަންކަން އަމަލާއި ދިމާ ނުވާ ކަމަށް ދީދީ ވަނީ ވިދާޅުވެފައެވެ. އެގޮތުން ފައިސާ ނެތް ކަމަށް އެއްކޮޅުން ބުނަމުން ދާއިރު މަދު ވަގުތުކޮޅަކަށް ޑްރޯން އަރުވަން އެތައް މިލިއަން ރުފިޔާ އެއް ހޭދަކުރި ކަމަށް ވެސް ދީދީ ވަނީ ވިދާޅުވެފައެވެ.
