އޭޑީކޭ އާ އިމާރާތުގެ 80 ޕަސެންޓް މަސައްކަތް ނިންމާލެވިފައިވާ ކަމަށާއި އަންނަ ސެޕްޓެމްބަރު މަހުގައި މަސައްކަތް ފެށުމަށް ހަަމަޖެހިފައިވާ ކަމަށް އޭޑީކޭގެ މެނޭޖިންގ ޑިރެކްޓަރ އަހުމަދު އަފްއާލް ވިދާޅުވެއްޖެ އެވެ.

ރާއްޖެއެމްވީއަށް މައުލޫމާތު ދެއްވަމުން،އައްfފާލް ވިދާޅުވީ، އެ ހޮސްޕިޓަލުގެ ތިއޭޓަރ ކޮމްޕެކްސްގެ މަސައްކަތުގެ އެންމެ ފަހު މަސައްކަތްތައް މިހާރު ކުރެވެމުންދާ އިރު، ކެތް ލެބުގެ އެންމެހާ މަސައްކަތް ނިމިފައިވާ ކަމަށެވެ. ކެތްލެބަށް ބޭނުންވާ އިކުއިޕްމެންޓްތަކާއި މެނިޝަރީސްތައް ގެނެސްފައިވާ ކަމަށާއި  ކެތްލެބުގައި ހަރަކާތްތެރިވާނެ މުވައްޒަފުންނަށް ބޭނުންވާ ޓްރެއިނިންގ ދެމުންގެންދާ ކަމަށް އޭނާ ވިދާޅުވި އެވެ.

އޭޑީކޭގެ އާ އިމާރާތާއި އެކު 80 އެނދު އިތުރުވެގެންދާނެ ކަމަށާއި  އޭރުން އޭޑީކޭ ހޮސްޕިޓަލުގައި ހުރި އެނދުގެ  އަދަދު 160 އެނދު އަރާނެ ކަމަށް އޭނާ ވިދާޅުވިއެވެ. 

އާ އިމާރާތުގައި ގާއިމް ކުރާ ވޯޑަކީ ރާއްޖޭގެ ހޮސްޕިޓަލްތަކުގައި ހުންނަ ވޯޑަށް ވުރެ އެތައް  ގޮތަކުން ފުރިހަމަ ވޯޑްތަކަކަށް ވެގެންދާނެ ކަަމަށް އެ ހޮސްޕިޓަލުން ބުނެ އެވެ.

އެގޮތުން ވޯޑްގައި ވެސް ބަލިމީހުނަށް ބޭނުންވާ ޕްރައިވެސީ ލިބޭނެ ކަމަށް އެ ހޮސްޕިޓަލުން ބުނެ އެވެ.

ސެޕްޓެމްބަރު މަހު އޭޑީކޭ އާ އިމާރާތުގެ މަސައްކަތް ނިމޭނެ ކަމަށް އެ ހޮސްޕިޓަލުން ބުނަމުންދާ އިރު އެ ހޮސްޕިޓަލުގެ އާ އިމާރާތުގެ މަސައްކަތް ފަށާފައި ވަނީ 2015 ވަނަ އަހަރުގެ މެދުތެރޭގަ އެެވެ. އެ އިމާރާތުގެ މަސައްކަތަށް 55 މިލިއަން ރުފިޔާ  ޚަރަދުކުރުމަށް ވަނީ ހަމަޖެހިފަ އެވެ.