އިޒްރޭލުން ޣައްޒާގެ ދެ ހޮސްޕިޓަލަކަށް ހަމަލާދީ، އިތުރު މަރުކަޒަކުން ބަލިމީހުން ނެރެލައިފި

އިޒްރޭލުން ޣައްޒާގެ ދެ ހޮސްޕިޓަލަކަށް ހަމަލާދީ، ތިންވަނަ ހޮސްޕިޓަލުން ބަލިމީހުން ހުސްކޮށްލައިފިކަމަށް އަލްޖަޒީރާއިން ރިޕޯޓުކޮށްފިއެވެ.

އަލްޖަޒީރާއިން ރިޕޯޓް ކުރާ ގޮތުގައި މި ހަމަލާތައް ދީފައިވަނީ ހޯމަ ދުވަހު ކަމަށް ބެލެވެއެވެ.

އުތުރު ޣައްޒާގެ ޖަބާލިޔާ ކޭމްޕްގައި ހުރި އަލް-އަވްދާ ހޮސްޕިޓަލުގެ ތިންވަނަ ފަންގިފިލާއަށް އިޒްރޭލުގެ އާޓިލަރީން ހަމަލާދީފައިވެއެވެ. މީގެ އިތުރުން، އުތުރު ބައިތު ލަހިޔާގައި ހުރި ކަމާލް އަދްވާން ހޮސްޕިޓަލުގައި އިޒްރޭލް ސިފައިން ދުރުން ކޮންޓްރޯލްކުރެވޭ ގޮވާ ތަކެތި ގޮއްވާލާފައިވެއެވެ.

މި ހަމަލާގައި މަދުވެގެން 20 ބަލިމީހުންނާއި މެޑިކަލް މުވައްޒަފުންނަށް އަނިޔާވެފައިވާކަމަށް އަލްޖަޒީރާއިން ބުނެފައިވެއެވެ.

ބައިތު ލަހިޔާގައި ހުރި އިންޑޮނީޝިއާ ހޮސްޕިޓަލުން ޒަޚަމްވެފައިވާ މީހުންނާއި ބަލިމީހުން ނެރުމަށް އިޒްރޭލު ސިފައިން މަޖުބޫރުކުރަމުންދާކަމަށް ޣައްޒާގެ ޞިއްޙީ ވުޒާރާއިން ވަނީ ބުނެފައެވެ. މިއީ އިޒްރޭލުން އަމާޒުކުރި ތިންވަނަ ހޮސްޕިޓަލެވެ.

ޣައްޒާގެ ޞިއްޙީ ވުޒާރާއިން ހާމަކުރި ގޮތުގައި، ވޭތުވެދިޔަ 24 ގަޑީއިރުގެ ތެރޭގައި މަދުވެގެން 21 މީހުން ޝަހީދުވެ، 51 މީހުންނަށް އަނިޔާވެފައިވެއެވެ.

2023 ވަނަ އަހަރުގެ އޮކްޓޯބަރު 7ން ފެށިގެން އިޒްރޭލުން ޣައްޒާއަށް ދެމުންދާ ހަމަލާތަކުގައި މަދުވެގެން 45،338 ފަލަސްޠީނުން ޝަހީދުވެ، 107،764 މީހުންނަށް އަނިޔާވެފައިވާކަމަށް ޣައްޒާގެ ޞިއްޙީ ވުޒާރާއިން ބުނެފައިވެއެވެ.