އަމޯރިމް ބުނީ ޔުނައިޓެޑު އޮތީ ހާސްވެފައި ކަމަށް

އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުގައި މެންޗެސްޓަރ ޔުނައިޓެޑު އޮތީ "ހާސްވެފައި" ކަމަށް އެ ޓީމުގެ ކޯޗު ރުބެން އަމޯރިމް ބުނެފި އެވެ.

އޭނާ މިހެން ބުނީ، ޔުނައިޓެޑުގެ އަމިއްލަ ދަނޑުގައި ބޯންމައުތާ ދެކޮޅަށް ކުޅުނު މެޗަށްފަހު ވާހަކަ ދައްކަމުންނެވެ. އެ މެޗުން ޔުނައިޓެޑު ބަލިވެފައިވާއިރު، މިއީ ޔުނައިޓެޑުގެ އަމިއްލަ ދަނޑުގައި ބޯންމައުތު އަތުން ބަލިވީ ދެ ވަނަ ފަހަރަވެ. މިދިޔަ ސީޒަންގެ ލީގުގައި ވެސް ޔުނައިޓެޑުގެ އަމިއްލަ ދަނޑުގައި އެ ޓީމުން ވަނީ ބޯންމައުތު އަތުން ބަލިވެފަ އެވެ.

އަމޯރިމް ބުނީ، މޮޅެއް ހޯދުމަށް ޔުނައިޓެޑުން މަސައްކަތް ކުރަމުން އަންނަ ކަމަށާއި، ޖެހިޖެހިގެން ދެ މޮޅު ނުވަތަ ތިން މޮޅު ހޯދުމަކީ އުނދަގޫ ކަމެއް ކަމަށެވެ. ނަމަވެސް، ޔުނައިޓެޑުން އަންނަނީ އެކަމަށް ވަރަށް ބޮޑަށް މަސައްކަތް ކުރަމުން ކަމަށް ވެސް އަމޯރިމް ވަނީ ބުނެފަ އެވެ. އެކަން ފާހަގަކޮށް އަމޯރިމް ބުނީ، ބޯންމައުތު މެޗަކީ ޔުނައިޓެޑަށް ވަރަށް އުނދަގޫ މެޗަކަށްވި ކަމަށެވެ.

މެޗުގެ ތެރޭގައި ޔުނައިޓެޑަށް ގިނަ އުނދަގޫތަކެއް ކުރިމަތިވި ކަމަށާއި، އެކަމުގެ ސަބަބުން ޓީމު ހާސްވެފައި އޮތްކަން ފާހަގަ ކުރެވުނު ކަމަށް ވެސް އަމޯރިމް ބުންޏެވެ. ދަނޑު މަތީގައި ތިބި ޔުނައިޓެޑުގެ ކުޅުންތެރިންގެ ފަރާތުން އެކަން ފެނުނު ކަމަށް ވެސް އަމޯރިމް ބުންޏެވެ. ޚާއްސަކޮށް މެޗުގައި ބޯންމައުތުން ޖެހި ޕެނަލްޓީ އާއި، ދެން ޖެހި ލަނޑުތަކުން އުނދަގޫކަން ފާހަގަ ކުރެވޭ ކަމަށް އަމޯރިން ބުނެފައިވެ އެވެ. މެޗުގައި ޔުނައިޓެޑުން ލަނޑުތަކެއް ޖެހުމަށް މަސައްކަތް ކުރި ކަމަށާއި، ނަަމަވެސް އެކަމުގައި ވެސް ޔުނައިޓެޑުގެ ކުޅުންތެރިންނަށް އުނދަގޫވި ކަމަށް އަމޯރިމް ވަނީ ބުނެފަ އެވެ.

މީގެ އިތުރުން އަމޯރިމް ބުނީ ނަތީޖާ ނުނެރެވުމަކީ އޭނާގެ އިތުރުން ކުޅުންތެރިން ވެސް ކަންބޮޑުވެ، މާޔޫސްވާ ކަމެއް ކަމަށެވެ. އެހެން ނަމަވެސް ކުރަމުން އަންނަ މަސައްކަތަށް ފޯކަސް ކުރަން ޖެހޭނެ ކަމަށާއި، އެ މަސައްކަތް ކުރުމުގައި ދެމި ތިބެން ޖެހޭނެ ކަމަށް އޭނާ ބުންޏެވެ. އަދި ދެން ވެސް މަސައްކަތް ކުރާނީ ކުރިއަށް އޮތް މެޗުން މޮޅުވުމަށް ކަމަށާއި، އެކަމަށް ގަދައަޅާ މަސައްކަތް ކުރާނެ ކަމަށް އަމޯރިމް ބުންޏެވެ. އެ މަސައްކަތް ކުރުމުގައި އެންމެ ފަހު ވަގުތާ ހަަމައަށް ދެމި ތިބޭނެ ކަމުގައި އަމޯރިމް ބުނެފައިވެ އެވެ.

ޔުނައިޓެޑުގެ ނަތީޖާތައް އިންތިހާ އަށް ދަށްވުމުގެ ސަބަބުން، އެ ޓީމުގެ ކޯޗުކަމުން އެރިކް ޓެން ހާގް ވަކި ކުރުމަށްފަހު އެ މަގާމަށް އަމޯރިމް ހަމަޖެއްސީ މި ސީޒަންގަ އެވެ. ނަމަވެސް އަމޯރިމްގެ އިރުޝާދުގެ ދަށުން ވެސް ޔުނައިޓެޑަށް ނަތީޖާ ނުނެރެވޭތީވެ، އޭނާ އަށް ވެސް އަންނަނީ ޕްރެޝަރު ބޮޑުވަމުންނެވެ. ލީގުގައި މިހާތަނަށް ކުޅެފައިވާ 17 މެޗުން 22 ޕޮއިންޓާ އެކު ޔުނައިޓެޑު އޮތީ 13 ވަނައިގަ އެވެ. ލީގުގައި ދެން ޔުނައިޓެޑަށް އޮންނާނީ ޑިސެމްބަރު މަހުގެ 26 ވަނަ ދުވަހު ރަށުން ބޭރުގައި ވުލްވްސްއާ ދެކޮޅަށް ކުޅޭ މެޗެވެ.