ޕަބްލިކް ސާވިސް މީޑީއާ (ޕީއެސްއެމް) ޗެއާޕާސަންއަކަށް, މަޝްހޫރު ޕްރެޒެންޓަރު އާމިނަތު ނަމްޒާ އައްޔަންކުރައްވައިފި އެވެ.
ނަމްޒާ ޕީއެސްއެމް ޗެއާޕާސަންއަކަށް އައްޔަން ކުރިކަން ހާމަކޮށްފައި ވަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން "އެކްސް" ގައި މިއަދު ކުރި ޕޯސްޓެއްގައިއެވެ.
ޕީސީބީ އިން އެކްސްގައި ކުރި ޕޯސްޓުގައި ބުނީ ޕީއެސްއެމްގެ ޑިރެކްޓަރުންގެ ބޯޑުގެ މެންބަރު ކަމަށާއި ޗެއާޕާސަން ކަމަށް މ. ހަނީކޯމްބް، އާމިނަތު ނަމްޒާ އައްޔަންކޮށްފައިވާ ކަމަށެވެ.
ނަމްޒާ ޕީއެސްއެމް ޗެއާޕާސަންއަކަށް ހަމަޖެއްސިކަން ޕީސީބީ އިން ރަސްމީކޮށް އިއުލާނު ކުރިއިރު، ނަމްޒާއަށް ވަނީ މަގާމުގެ ރަސްމީ ސިޓީ ވެސް ލިބިފައިއެވެ.
ދައުލަތުގެ މީޑިއާގައި ގިނަ އަހަރުތަކެއް ވަންދެން ޕްރެޒެންޓަރެއްގެ ގޮތުގައި ޕްރޮގްރާމްތައް ހުށަހަޅުއްވާ ދެއްވާފައިވާ ނަމްޒާ އެންމެފަހުން އަދާކުރައްވާފައިވަނީ ސިޓީސް, ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓްރީގެ ޑެޕިއުޓީ މިނިސްޓަރުގެ މަގާމެވެ.
މި ސަރުކާރުގައި ނަމްޒާ ފުރަތަމަ އައްޔަންކުރެއްވީ ޖެންޑާ, ފެމިލީ އެންޑް ސޯޝަލް ސާވިސް މިނިސްޓްރީގެ ޑެޕިއުޓީ މިނިސްޓަރުގެ މަގާމަށެވެ.
ނަމްޒާ ޕީއެސްއެމްގެ ޗެއާޕާސަންކަމުގެ މަގާމަށް އައްޔަންކުރެއްވިއިރު، ޕީއެސްއެމްގެ މެނޭޖިން ޑިރެކްޓަރުގެ މަގާމަށް އެ ކުންފުނީގެ ސޭލްސް އެންޑް މާކެޓިން ޑިރެކްޓަރުގެ މަގާމުގައި ހުންނެވި އިބްރާހީމް ނަސްރީން (ނައްޓު) އާދިއްތަ ދުވަހު ވަނީ އައްޔަންކުރައްވާފަ އެވެ.
