ޕީއެސްއެމްގެ އެމްޑީއަކަށް ނަސްރީން އައްޔަނުކޮށްފި
ޕީއެސްއެމްގެ އައު އެމްޑީ އިބްރާހީމް ނަސްރީން. ފޮޓޯ: ޕީއެސްއެމް
ޕަބްލިކް ސާވިސް މީޑީއާ (ޕީއެސްއެމް)ގެ މެނޭޖިން ޑިރެކްޓަރުގެ މަގާމަށް އެ ކުންފުނީގެ ސޭލްސް އެންޑް މާކެޓިން ޑިރެކްޓަރުގެ މަގާމުގައި ހުންނެވި އިބްރާހީމް ނަސްރީން (ނައްޓު) މިއަދު އައްޔަންކޮށްފި އެވެ.
ޕީއެސްއެމްގެ އެމްޑީއަކަށް ނަސްރީން އައްޔަނުކުރިކަމަށް ވާހަތައް ދެކެވުނު ނަމަވެސް ޕްރައިވެޓައިޒޭޝަން އެންޑް ކޯޕަރައިޓޭޒަޝަން ބޯޑުން (ޕީސީބީ) އިން އަދި މިކަން ރަސްމީކޮށް ހާމަކޮށްފައެއް ނުވެއެވެ.
ޕީއެސްއެމްއަށް ގިނަ އަހަރުތަކެއް ވަންދެން ހިދުމަތްކޮށް ދެއްވަމުން ގެންދަވާ ނަސްރީން އަކީ މި ސަރުކާރުން އެ ކުންފުންޏަށް އައްޔަންކުރި 3 ވަނަ މެނޭޖިން ޑިރެކްޓަރެވެ.
މި ސަރުކާރުން ޕީއެސްއެމްގެ އެމްޑީއަކަށް އެންމެ ފުރަތަމަ ހަމަޖެއްސެވި ޒީނާ ޒާހިރު އިސްތިއުފާ ދެއްވުމުން، އެ މަގާމާއި ދެން ހަވާލުވީ މުހައްމަދު ސައީދުއެވެ. ސައީދު އެމްޑީގެ މަގާމަށް އައްޔަނު ކުރީ އޮގަސްޓް 25، ގަ އެވެ. އެއަށްފަހު މުހައްމަދު ސައީދު މިދިޔަ އަންގާރަ ދުވަހު ވަނީ މަގާމުން އިސްތިއުފާ ދެއްވާފަ އެވެ.
ނަސްރީން އެ މަގާމަށް އައްޔަންކުރެއްވުމާ ގުޅިގެން "އެކްސް" ގައި ޒީނާ ޒާހިރު ކުރެއްވި ޕޯސްޓެއްގައި ވަނީ ޒީނާގެ އެމްޑީ ކަމުގެ މުއްދަތުގައި ނަސްރީންގެ ފަރާތުން ލިބިވަޑައިގެން އެއްބާރުލުން ފާހަގަކުރައްވާފަ އެވެ.
