"ސްކީލާން" ގެ ވީޑިއޯކޮޅެއް ޕީއެސްއެމް އިން ދައްކައިގެން ވަޒީފާ އިން ކަނޑާލި މުސްތަފާގެ ވަޒީފާ ޕީއެސްއެމުން އިޔާދަކޮށްފި
ކައުންސިލްގެ ރައީސްކަމަށް އޭނާ އިންތިޚާބު ކުރީ މީގެ ދެ އަހަރު ކުރިން
މީޑިއާ ކައުންސިލުގެ ރައީސް އަހްމަދު މުސްތަފާ
މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސްކަން ކުރައްވަމުން ގެންދަވާ އަހްމަދު މުސްތަފާ ޕަބްލިކް ސާވިސް މީޑިއާ (ޕީއެސްއެމް) ގައި އޭނާ އަދާކުރައްވަމުން ގެންދަވާ ވަޒީފާއިން ޕީއެސްއެމްގެ ބޯޑުން ނިންމައިގެން ބުރާސްފަތި ދުވަހު ވަކިކުރުމަށް ފަހު އަލުން އޭނާގެ ވަޒީފާ އިއާދަކޮށްފިއެވެ.
އޭނާގެ ވަޒީފާ އިއާދަކޮށްފައި ވަނީ އޭނާ ވަކިކުރި މައްސަލަ މުރާޖައާކޮށްދިނުމަށް އެދިވަޑައިގެން ޕީއެސްއެމްގެ ބޯޑަށް މުސްތަފާ ހުށަހެޅުއްވި މައްސަލަ ބެލުމަށް ފަހުގައެވެ. މިކަމާއި ގުޅޭ ގޮތުން ޕީއެސްއެމް އިން އެއްވެސް މައުލޫމާތެއް ހާމައެއް ނުކުރެއެވެ.
ޕީއެސްއެމްގެ ޓެކްނިކަލް އޮޕަރޭޝަންސް މެނޭޖަރުގެ މަގާމުގައި ހުންނެވި އަދި 30 އަހަރަށް ވުރެ ދިގު މުއްދަތެއްގައި ޕީއެސްއެމް އަށް ޚިދުމަތް ކުރައްވާފައިވާ މުސްތަފާ މަގާމުން ވަކި ކުރީ، ބުރާސްފަތި ވިލޭރޭ މޯލްޑިވްސް މީޑިއާ ކައުންސިލުން ބޭއްވި 11 ވަނަ ނޫސްވެރިކަމުގެ އިނާމު ދިނުމުގެ ހަފްލާ ގައި އެކި ދާއިރާތަކުން އެވޯޑްތަކަށް ނޮމިނޭޓްވި ކޮންޓެންޓު ދެއްކުމުގެ ތެރޭގައި، ތަހުގީގީ ދާއިރާއިން ނޫސްވެރިކަމުގެ އިނާމު ލިބުނު "އަދަދު" ނޫހުން ތައްޔާރު ކުރި "ސްކީލާން" ޑޮކިއުމެންޓަރީގެ ވީޑިއޯ ކޮޅެއް ޕީއެސްއެމްއިން ވަގުތުން ދެއްކި އެ އިވެންޓުގައި އޮން އެއަރ ވުމާ ގުޅިގެންކަން ރާއްޖެ އެމްވީ އަށް ވަނީ ކަށަވަރުވެފައެވެ.
ގިނަ ބައެއްގެ ސަމާލުކަން ހޯދި އެ ޑޮކިއުމެންޓަރީ އަކީ ރައީސް ޑރ. މުހައްމަދު މުއިއްޒުގެ ދޮން މަންމަ، ސްރީލަންކާގެ ރައްޔިތެއް ކަމުގައިވާ ޖީ ސްކީލާން، ރާއްޖޭން ބްލެކްލިސްޓުކޮށް ޑީޕޯޓުކުރި ގޮތާއި އޭނާ ރައީސް މުއިއްޒުގެ މައްޗަށް ކުރާ ތުހުމަތުތަކުގެ މައްޗަށް ތައްޔާރު ކުރި ޑޮކިއުމެންޓަރީއެކެވެ. މީޑިއާ ކައުންސިލުން ބުރާސްފަތި ވިލޭރޭ ބޭއްވި ހަފްލާގައި ޕީއެސްއެމް އިން އޮން އެއަރވެފައިވަނީ "ސްކީލާން" ޑޮކިއުމެންޓަރީގެ މަދު ސިކުންތު ކޮޅެއްގެ ވީޑިއޯ ފުޓޭޖްކަން ފާހަގަ ކުރެވެއެވެ.
މުސްތަފާ ޕީއެސްއެމްގެ ވަޒީފާއިން ކުއްލި ގޮތަކަށް ވަކި ކުރި އިރު އޭނާ އަކީ މީޑީއާގެ ދާއިރާގައި ގިނަ ދުވަސްތަކެއް ވަންދެން ޚިދުމަތް ކުރައްވާފައިވާ ބޭފުޅެކެވެ. އިތުބާރުހުރި ގޮތަކަށް މި ނޫހަށް މައުލޫމާތު ލިބިފައިވާ ގޮތުގައި މުސްތަފާ މަގާމުން ވަކިކޮށްފައި ވަނީ ޕީއެސްއެމް ބޯޑުން ފާސްކުރި އިރު މުސްތަފާގެ ބަހެއްވެސް އެކަމުގައި ނުހޯދައެވެ. އެހެންކަމުން އޭނާ މަޤާމުން ވަކި ކުރަން ކުރިން ނިންމީ ކޮން ކަންތައްތަކެއްގެ މައްޗަށް ބެލުމަށް ފަހުގައި ކަން ސާފެއް ނޫނެވެ.
މީޑިއާ ކައުންސިލަށް މުސްތަފާ އިންތިޚާބުކުރީ ޕީއެސްއެމް އިން ހިންގާ ޓީވީއެމް ތަމްސީލްކުރާ މެންބަރެއްގެ ގޮތުގައެވެ. ކައުންސިލްގެ ރައީސްކަމަށް އޭނާ އިންތިޚާބު ކުރީ މީގެ ދެ އަހަރު ކުރިންނެވެ.
