ޣައްޒާގެ ކަމާލް އަދްވާން ހޮސްޕިޓަލް ކައިރި އަށް އިސްރާއީލު ސިފައިން ހަމަލާދިނުމުގެ ސަބަބުން މަދުވެގެން 3 އާންމު ރައްޔިތުން ޝަހީދުވެއްޖެއެވެ.

އާދީއްތަ ދުވަހުގެ ރޭ ޣައްޒާގެ އުތުރުގައި ހުންނަ މި ހޮސްޕިޓަލް ކައިރިއަށް ދިން ހަމަލާގައި ގިނަ ބަޔަކު ޒަޚަމްވެފައިވާ ކަމަށްވެސް މީޑިއާ ރިޕޯޓުތައް ބުނެއެވެ.

އިސްރާއީލުން ހިޞާރުކޮށްފައިވާ އުތުރު ޣައްޒާގައި ހުންނަ ކަމާލް އަދްވާން ހޮސްޕިޓަލްގެ ޑިރެކްޓަރު ހާމަ ކުރެއްވި ގޮތުގައި، އެ ހޮސްޕިޓަލް ހުސްކުރުމަށް އިސްރާއީލުން ކުރާ އަމުރަށް ކިޔަމަންވުމަކީ "ކުރެވޭނެ ކަމެއް ނޫނެވެ." އޭނާ ވިދާޅުވީ މިވަގުތު ވެސް އެ ހޮސްޕިޓަލުގައި ގާތްގަނޑަކަށް 400 ބަލި މީހުން ތިބި ކަމަށާއި، އޭގެ ތެރޭގައި އޮކްސިޖަނާއި އިންކިއުބޭޓަރުގެ ބޭނުން ޖެހިފައިވާ ކުޑަކުދިން ވެސް ހިމެނޭ ކަމަށެވެ.

މި ހަމަލާ ދީފައިވާ އިރު ހޮނިހިރު ދުވަހުގެ ރެއިން ފެށިގެން އިސްރާއީލު ސިފައިން އަންނަނީ ބައިތުލް ލަހިޔާގައި ހުންނަ މި ހޮސްޕިޓަލަށް ހަމަލާތައް ދެމުންނެވެ. ހާލަތު ގޯސްވަމުން ދާއިރު ހޮސްޕިޓަލުގެ މުވައްޒަފުންނާއި ބަލި މީހުންނަށް ރައްކާތެރިކަން ލިބޭނެ ގޮތެއް ނެތް ކަމަށް ވެސް ހޮސްޕިޓަލުން ބުނެފައިވެއެވެ.

ޞިއްޙީ މަޞްދަރުތަކުން ބުނާ ގޮތުގައި އިސްރާއީލު ސިފައިން ހޮސްޕިޓަލަށް ބޮންއަޅައި، އޭގެ އިތުރުން ބަޑިން ދިން ހަމަލާތަކުގައި ހޮސްޕިޓަލުގެ އަންހެނުންގެ ވޯޑާއި، ކުޑަކުދިންގެ ވޯޑަށް ވަނީ ހަމަލާތައް އަރާފައެވެ. މި ހަމަލާތަކުގެ ސަބަބުން ހޮސްޕިޓަލުގެ ވަސީލަތްތަކަށް ބޮޑެތި ގެއްލުންތަކެއް ލިބި، ހޮސްޕިޓަލުގެ އެތެރޭގައި ތިބި މެޑިކަލް ޓީމުތަކާ މުވާޞަލާތު ކެނޑިފައިވެއެވެ.

އިސްރާއީލުގެ ޑްރޯންތަކުން ހޮސްޕިޓަލުގެ ޖަނަރޭޓަރުތަކާއި ތެޔޮ ޓޭންކުތަކަށް ހަމަލާދިނުމުގެ ސަބަބުން ހޮސްޕިޓަލުން ކަރަންޓު ވަނީ ކެނޑިފައެވެ.

އޮކްޓޯބަރު 7، 2023 އިން ފެށިގެން އިސްރާއީލުން ޣައްޒާ އަށް ދޭ ހަމަލާގެ ސަބަބުން މިހާތަނަށް 45،259 އާންމު ރައްޔިތުން ޝަހީދުވެފައިވެއެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. މީގެ އިތުރުން 107،627 މީހުން ވަނީ ޒަޚަމްވެފައެވެ.