ޣައްޒާއަކީ މިހާރު ކަށްބިމެއް، އެތަނުން ސަލާމަތްވާނެ ގޮތެއް ނެތް: އަންރުވާ
ޣައްޒާ ރައްޔިތުންގެ ނިކަމެތި ހާލަތު ދުނިޔެއަކަށް ނުފެނޭ، އެތަނުގައި މަރު ނޫން އެހެން ގޮތެއް ނެތް.
ޣައްޒާގެ ދިރިއުޅޭ ކުޑަކުދިން އުޅެމުން ދަނީ އިންތިހާ ނިކަމެތި ހާލަތުގައި، ބޯ ހިޔާވަހި ކަމެއް ކާބޯތަކެއްޗެއް ނުލިބޭ
ބަނޑުހައިހޫނުކަން އާންމުވެ، ދިރިއުޅުމުގެ ހާލަތު ނިކަމެތިވެ، ބޯކޮށް ވެހޭ ފިނިމޫސުމުގެ ވާރޭ އާއި ހިނގަމުންދާ ހަނގުރާމައިގެ ސަބަބުން ދިރިއުޅުން ނުރައްކާވެފައިވާ ޣައްޒާ އަކީ މިހާރު "ކަށްބިމެއް" ކަމަށް އަންރުވާ ގެ ސީނިއަރ އިމަރޖެންސީ އޮފިސަރ، ލުއިސް ވޯޓަރިޖް ވިދާޅުވެއްޖެއެވެ.
ޣައްޒާ ރައްޔިތުންގެ ނިކަމެތި ހާލަތާ ބެހޭ ގޮތުން ވާހަކަ ދައްކަވަމުން ހުކުރު ދުވަހު އޭނާ ވިދާޅުވީ، ޣައްޒާ ރައްޔިތުންގެ ނިކަމެތި ހާލަތު ދުނިޔެއަށް ނުފެންނަ ކަމަށެވެ.
"މި މީހުންނަށް ދިމާވަމުންދާ ކަންތައްތައް ދުނިޔެއަކަށް ނުފެނޭ. މި ޙާލަތުގައި އާއިލާތަކަށް ރައްކާތެރިކަން ލިބޭނެ އެއްވެސް ގޮތެއް ނެތް،" ލުއިސް ވޯޓަރިޖް ވިދާޅުވިއެވެ.
ހުކުރު ދުވަހުގެ ރޭ އާއި އެ ދުވަހުގެ ހެނދުނު ބޯކޮށް ވެހުނު ފިނި މޫސުމުގެ ވާރޭ އަށް ފަހު ޣައްޒާގެ މެދުތެރޭގައި ހުންނަ ނުސީރާތު ރެފިއުޖީ ކޭމްޕުން ވާހަކަދައްކަވަމުން، ސީނިއަރ އިމަރޖެންސީ އޮފިސަރ ވިދާޅުވީ ދެ މިލިއަނަށްވުރެ ގިނަ މީހުން ބަންދުވެފައިވާ ކަމަށާއި އެމީހުންނަށް ސަލާމަތްވެވޭނެ ގޮތެއް ނެތް ކަމުގައެވެ.
އޭނާ ވިދާޅުވީ، ތާށިވެފައި ތިބި މީހުންނަށް އަސާސީ ބޭނުންތައް ފުރިހަމަ ކުރެވޭނެ ގޮތެއް ނެތް ކަމަށާއި، މަރުވުން ނޫން އެހެން މަގެއް އެމީހުންނަށް ނެތް ކަމުގައެވެ.
"މި ޙާލަތުގައި އާއިލާތަކަށް ހިމާޔަތްވާން އެއްވެސް ގޮތެއް ނެތް،" ވޯޓަރިޖް ވިދާޅުވިއެވެ.
ގިނަ މީހުން ދިރިއުޅެނީ ފޮތި ޓެންޓުގައި ކަން ފާހަގަ ކުރަމުން ފެން ނުވަންނަ އެއްވެސް ހިޔާވައްސެއް ނެތް ކަމަށާއި އެތާނގެ އިމާރާތްތަކުގެ 69 އިންސައްތަ އަށް ގެއްލުން ލިބި ނުވަތަ ހަލާކުވެފައިވެފައިވާ ކަމަށް އެނާ ވިދާޅުވިއެވެ.
"މި ޙާލަތުގައި ރައްކާތެރިވާނެ އެއްވެސް ތަނެއް ނެތް."
އޭނާ އިތުރަށް ވިދާޅުވީ، ޣައްޒާ ރައްޔިތުންނަށް ބޭނުންވާ އެހީ ނުލިބުމާއި، އަދި ލިބޭ އެހީ ފޯރުކޮށް ދިނުމުގައި އިސްރާއީލުން ތަކުރާރުކޮށް ހުރަސް އަޅަމުން ގެންދާ ކަމަށެވެ.
އދ. ގެ އެހީ ވިލަރެސް ކުރާ އޮފީސް އޯސީއެޗްއޭ އިން ބުރާސްފަތި ދުވަހު ހާމަ ކޮށްފައިވާ ގޮތުގައި އިސްރާއީލުން ހިސޯރުކޮށްފައިވާ އުތުރު ޣައްޒާ އާއި ފެނާއި ކާބޯތަކެތި ފޯރުކޮށް ދިނުމުގެ ހުއްދަ އަށް އަނެއްކާ ވެސް އެދުމުން އިސްރާއީލުން ވަނީ ހުއްދަ ދިނުމަށް ދެކޮޅު ހަދާފައެވެ. އޭގެ ސަބަބުން ބައިތު ހަނޫން އާއި، ބައިތު ލަހިޔާ އާއި ޖަބާލިޔާގެ ބޮޑު ބައެއްގައި ދިރިއުޅޭ ފަލަސްތީން ރައްޔިތުންނަށް ބޭނުންވާ އެއްވެސް އެހީ އެއް ފޯރުކޮށް ދެވޭނެ މަގެއް މިހާރަކު ނެތް ކަމަށް އދ އިން ވަނީ ބުނެފައެވެ.
