ރައީސް މުއިއްޒު އަޑީގައި ހުންނަވައިގެން އުފެއްދި ކަމަށް އަޑު އަރާފައިވާ އަގުބޮޑު ޓީވީ ސްޓޭޝަން އެމްއެމް ޓީވީ އާއި އެންސްޕާ އާ ދެމެދު ބައްދަލުވުން ތަކެއް ބޭއްވިކަން ހާމަ ވެއްޖެއެވެ.

މިކަން ހާމަ ކުރީ އެންސްޕާގެ ޑެޕިއުޓީ ސީއީއޯ ގެ މަގާމުން ބުރާސްފަތި ދުވަހު ވަކި ކުރި ފާތިމަތު ޝިއުނާ ނެރުނު ބަޔާނެއްގައެވެ.

ޝިއުނާގެ ބަޔާނުން ހާމަވާ ގޮތުގައި ގިނަ ބައްދަލުވުންތަކެއް އެންސްޕާ އާއި އެމްއެމް ޓީވީ ދެމެދު ވަނީ ބޭއްވިފައެވެ.

"އެންސްޕާގެ ޑެޕިއުޓީ ޗީފް އެގްޒެކެޓިވް އޮފިސަރަކަށް އައްޔަން ކުރެވުނު ތާރިޅުން ފެށިގެން، އެމްއެމް ޓީވީ އާ އެކު ބޭއްވި އެއްވެސް ބައްދަލުވުމެއްގައި ބައިވެރިވެފައި ނުވާނެ" ކަމަށް ޝިއުނާގެ ބަޔާނުގައި ވެއެވެ.

މިކަން ޝިއުނާ ހާމަ ކުރި އިރު އެމްއެމް ޓީވީ އާއި އެންސްޕާއާ ދެމެދު ފަސް އަހަރު ދުވަހަށް ހެދި އެއްބަސްވުމެއްގެ ދަށުން މަހަކަށް 580،000ރ. ގެ ރޭޓުން އެމްއެމް ޓީވީ އަށް ކުލީގެ ގޮތުގައި، ޖުމްލަ 34.8 މިލިއަން ރުފިޔާ ހަމަޖެހިގެންދާ އިންތިޒާމެއް ހަމަޖެއްސިއެވެ. މި އެއްބަސްވުމުގެ މައުލޫމާތު ސޯޝަލް މީޑިއާގައި ފަޅާ އެރުމުން، އެއްބަސްވުން އެންސްޕާ އިން އުވާލި ކަމަށް ބުނެ އެމްއެމް ޓީވީ ދިފާއުކޮށް ބަޔާނެއް ނެރެފައިވެއެވެ.

ޑެޕިއުޓީ ސީއީއޯ ގެ މަގާމުން ވަކި ކުރުމާ ގުޅިގެން ޝިއުނާ ނެރުނު ބަޔާނެއްގައި ބުނެފައިވަނީ، އޭނާ މަގާމުން ވަކި ކުރި ދަނޑިވަޅަކީ އެންސްޕާގެ ސީއީއޯ ހީނާ ވަލީދުގެ މައްޗަށް ކުރެވިފައިވާ ކަރަޕްޝަންގެ ތުހުމަތުގެ އިތުރުން ސަރުކާރުގެ މައްޗަށް ކަރަޕްޝަންގެ ގިނަ ތުހުމަތު ތަކެއް އަމާޒު ވެފައިވާ ދަނޑިވަޅެއް ކަމަށާއި، ސަރުކާރަށް އަމާޒުވާ ކަރަފްޝަންގެ އެއްވެސް މައްސަލަ އެއްގައި އޭނާގެ ބައިވެރިވުމެއް ނޯންނާނެ ކަމުގެ ޔަގީންކަން ދޭ ކަމުގައެވެ.

ސަރުކާރުން ކޮރަޕްޝަންގެ އަމަލުތައް ފޮރުވުމަށް ކުރާ މަސައްކަތްތައް ހަރުކަށި އިބާރާތުން ކުށްވެރި ކުރާ ކަމަށް ވެސް ޝިއުނާ ގެ ބަޔާނުގައި ބުނެފައިވެއެވެ.

ޝިއުނާ މަގާމުން ވަކިކުރި ސަބަބެއް ސަރުކާރުން ހާމަކޮށްފައެއް ނުވެއެވެ.