ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ ކުރައްވާ ސުވާލު ކުރިން ހުށަހަޅަން ނުޖެހޭނެ ކަމަށް ރައީސް އޮފީހުގެ ތަރުޖަމާން ހީނާ ވަލީދު ހުކުރު ދުވަހު ވިދާޅުވެއްޖެ އެވެ.

ހުކުރު ދުވަހު އެކްސް ގައި ކުރެއްވި ޕޯސްޓެއްގައި ހީނާ ވިދާޅުވީ، ރައްޔިތުންނާ ގާތުން ބައްދަލުކުރައްވައި އެކި ކަންކަމުގައި ރައްޔިތުންގެ ޚިޔާލާއި މަޝްވަރާ ހޯއްދެވުމަށް ރައީސް މުއިއްޒު ބާއްވަވާ ބައްދަލުވުން ތަކުގައި އެ ބައްދަލުވުމުގެ ކުރިން ސުވާލު ނުވަތަ ޚިޔާލު ހުށައަޅަން ޖެހޭ ކަމަށް ބުނެ ބައެއް ފަރާތްތަކުން ދައްކަމުންދާ ވާހަކަ ތަކަކީ ކަނޑައެޅިގެން ހަގީގަތާ ޚިލާފު ދޮގު ވާހަކަ ތަކެއް ކަމަށެވެ.

މީގެ ކުރިން ބޭއްވުނު މިފަދަ ބައްދަލުވުން ތަކުގައި ބައިވެރިވެވަޑައިގެންނެވި ކޮންމެ ބޭފުޅަކަށް ވެސް އެބޭފުޅެއްގެ ޚިޔާލާއި ކަންބޮޑުވާ ކަންކަމާއި ބެހޭގޮތުން މިނިވަންކަމާއެކު އެ ބޭފުޅަކު ދައްކަވަން ބޭނުންފުޅުވާ ވާހަކަ އެއް ދެއްކެވުމުގެ ފުރުސަތު ރައީސް ދެއްވާފައިވާ ކަމަށެވެ. އަދި ކުރިއަށްހުރި ބައްދަލުވުން ތަކުގައި ވެސް އަމަލު ކުރައްވާނީ އެ އުސޫލުން ކަމަށް ހީނާ ވިދާޅުވި އެވެ.

އެއްވެސް ބޭފުޅަކު ދުރާލާ ސުވާލު ނުވަތަ ޚިޔާލު އެއްވެސް ފަރާތަކާ ހިއްސާ ކުރައްވަން ޖެހިވަޑައި ނުގަންނަވާނެ ކަމަށް އޭނާ ވިދާޅުވި އެވެ.

ހީނާ މިމޭރުމުން ވާހަކަ ދެއްކެވި ނަމަވެސް މިފަހުން ރައީސް މުއިއްޒު ރައްޔިތުންނާއެކު ބާއްވަވާ ބައްދަލު ކުރެއްވުންތަކަށް ވަދެވެނީ ރައީސް އޮފީހުން ދައުވަތު ކާޑު ފޮނުވާ މީހުންނަށް ކަމަށް މައުލޫމާތު ލިބެ އެވެ. އަދި މައްޗަންގޮޅީ ރައްޔިތުންނާއެކު ބޭއްވެވި ބައްދަލު ކުރެއްވުމާއި، ވިލިމާލޭގެ ރައްޔިތުންނާއެކު ބޭއްވެވި ބައްދަލު ކުރެއްވުން ތަކުގައި އެއް ބަޔަކު ބައިވެރިވެ ސުވާލުކޮށް، ޝަކުވާ ހުށަހަޅާފައިވެ އެވެ. އަދި އަތޮޅުތެރޭގެ ރަށްތަކަށް ނިސްބަތްވާ މީހުން ވެސް މި ބައްދަލު ކުރެއްވުމުގައި ބައިވެރިވެފައިވެ އެވެ. މިކަމާ ގުޅިގެން ގިނަ ބައެއްގެ ފާޑު ކިޔުން ސަރުކާރަށް ވަނީ އަމާޒުވެފަ އެވެ.