ދިވެހި ރާއްޖޭގެ ރައީސުލްޖުމްހޫރިއްޔާގެ އޮފީހުގެ ރަސްމީ ޔޫޓިއުބް ޗެނަލް ގެއްލުނުފަހުން ނުވަ ދުވަސްވީ އިރު އަދިވެސް އެ ޗެނަލް ރިކަވަރ ނުވާކަން ހާމަވެއްޖެ އެވެ.

މުހިންމު އަރކައިވްތަކެއް ހުރި ރައީސް އޮފީހުގެ ރަސްމީ ޔޫޓިއުބް ޗެނަލް ވީނުވީއެއް ނޭންގި ގެއްލުނު ނަމަވެސް ރައީސް އޮފީހުން ރަސްމީކޮށް އެކަން އިއުލާންކޮށްފައެއް ނުވެ އެވެ. ބައެއް މަސްދަރުތަކުން ބުނާ ގޮތުގައި ރައީސް އޮފީހުގެ ޔޫޓިއުބް ޗެނަލް ވަނީ ހެކް ކޮށްފަ އެވެ.

މިކަމާއި ގުޅޭގޮތުން މައުލޫމާތު އޮޅުން ފިލުވުމަށް ރައީސް އޮފީހުގެ ޗީފް ސްޕޯކްސް ޕަރސަން ހީނާ ވަލީދު އަށް ތަކުރާރުކޮށް ގުޅުމުން ފޯނަށް ޖަވާބު ނުދެއްވާ ފޮނުވި ޓެކްސް މެސެޖް އަށް ރިޕްލައި ކުރައްވާ ވިދާޅުވީ، "ފުލުހުންގެ ސައިބަރ ސެކިއުރިޓީ ބޭފުޅުން އެކަމާއި ބެހޭ އަޕްޑޭޓެއް ދެއްވުމުން ޖަވާބެއް ދެއްވާނެ" ކަމަށެވެ.

އެ ޗެނަލަށް ދިޔުމުން އެއްވެސް ވީޑިއޯއެއް އަދި ޗެނަލުގެ ޕްރޮފައިލެއް ވެސް ނުފެނެ އެވެ. ޗެނަލް ރިމޫވް ކޮށްފައިވަނީ ޔޫޓިއުބުގެ ކޮމިއުނިޓީ ގައިޑްލައިންސްއާ ހިލާފުވެގެން ކަމަށް ބުނާ ބެނާއެއް މީގެ ކުރިން ޗެނަލުގެ ލިންކަށް ދިޔުމުން ފެނުނެވެ. ނަމަވެސް، މިހާރު އަރަނީ އެ ޗެނަލް ވުޖޫދުގައި ނެތް ކަމަށެވެ.

ޔޫޓިއުބުގެ ގަވާއިދުތަކާ ސަރުކާރުން ހިލާފުވި ކަމަށް ބުނެ ރައީސް އޮފީހުގެ ޔޫޓިއުބު ޗެނަލް އެ ޕްލެޓްފޯމުން ރިމޫވް ކޮށްލުމުގެ ކުރިން އެ ޗެނަލް ހެކުކޮށް، އެހެން ބައެއްގެ ވީޑިއޯތަކެއް އާންމުކޮށްފައިވާ ކަމަށް ބައެއް މަސްދަރުތަކުން ބުނެއެވެ.