އޭސީސީ އިން ބަލާ، ފިޔަވަޅު އަޅަން ބޭނުން ވަނީ ވަކި ފަރާތަކުން އަންގާ މައްސަލަތައް އެކަނި : ޝާތިރު
ކަންބޮޑުވުމަކީ މިނިވަން މުއައްސަސާތައް މިނިވަންކަމާއި އެކު ނުހިނގާތީ ކަމަށް އޭނާ ވިދާޅުވި
އެމްޑީޕީ ގައުމީ މަޖިލީހުގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން ރާއްޖެއެމްވީ އަށް ދެއްވި ބަސްތީގަތުމުގެ ތެރެއިން
އޭސީސީ އިން ބަލާ، ފިޔަވަޅު އަޅަން ބޭނުން ވަނީ ވަކި ފަރާތަކުން ބަލަން އަންގާ މައްސަލަތައް އެކަނި ކަމަށް އެމްޑީޕީ ގައުމީ މަޖިލީހުގެ މެމްބަރު ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން ވިދާޅުވެއްޖެއެވެ.
ޝާތިރު އެފަދައިން ވިދާޅުވީ އެންސްޕާގެ ފައިސާއިން އެމްއެމްޓީވީ އުފެއްދިކަމުގެ ތުހުމަތުކުރެވޭތީ އަވަސް މައްސަލައެއްގެ ގޮތުގައި އެކަން ތަހުގީގު ކުރުމަށް އޭސީސީ އަށް މައްސަލަ ހުށަހެޅުމާއި ގުޅޭ ގޮތުން ނޫސްވެރިންނަށް މައުލޫމާތުދެއްވަމުންނެވެ.
މިކަމާއި ގުޅޭގޮތުން ވާހަކަދައްކަވަމުން ޝާތިރު ވަނީ މި ސަރުކާރާއި ގުޅުން ހުރި ވަރަށް ގިނަ ކޮރަޕްޝަންގެ މައްސަލަތައް އޭސީސީ އަށް މިހާރު ވެސް ހުށަހަޅާފައިވާކަމަށް ފާހަގަކުރައްވާފައެވެ.
ޝާތިރު ވިދާޅުވީ ސަރުކާރުން ބޭނުންވާ ބައެއްގެ މައްސަލަތައް ވަރަށް އަވަސް އަރުވައިގެން ބަލަމުންދާ މަންޒަރު ފެންނަ ކަމަށާއި އެއީ ވަރަށް ދެރަ ކަމެއް ކަމަށް ޝާތިރު ވިދާޅުވިއެވެ. އޭސީސީ އިން ޤާނޫނީ އިމުގެ ތެރެއިން ކުރަން ޖެހޭ ކަންކަން ކުރަން ޖެހޭ ކަމަށާއި އެގޮތަށް އަމަލު ނުކުރެވުމަކީ އާއްމުންގެ ކަންބޮޑުވުމެއް ކަމަށް ވެސް އޭނާ ވިދާޅުވިއެވެ. މިނިވަންކަމާއި އެކު މިނިވަން މުއައްސަސާތައް ނުހިނގާ ކަމަށް ފާހަގަކުރައްވާ އޭނާ ވަނީ އެކަމަށް ފާޑު ވިދާޅުވެފައެވެ.
" އަޅުގަނޑަށް ހީވަނީ ކަންބޮޑުވުމަކީ މިނިވަން މުއައްސަސާތައް މިނިވަންކަމާއި އެކު ނުހިނގާތީ ހެން އަސްލު. އެކަމާއި އަޅުގަނޑުމެން މި އަޑު އުފުލަނީ." ޝާތިރު ވިދާޅުވިއެވެ.
މި މައްސަލަ އޭސީސީއަށް ހުށަހެޅުއްވީ އަހުމަދު ސަލީމް (މާޒް ސަލީމް) އެވެ. އޭސީސީގެ ރައީސް އާދަމް ޝާމިލް އަށް އެޑްރެސްކުރައްވާ ފޮނުއްވި ސިޓީގައި ވިދާޅުވެފައިވަނީ 2024 ވަނަ އަހަރުގެ ތެރޭގައި ނޭޝަނަލް ޕުރޮޓެކްޝަން އެޖެންސީ (އެންސްޕާ) ގެ ފައިސާ އިން މޯލްޑިވްސް މީޑިޔާ ހައުސް ޕުރައިވެޓު ލިމިޓެޑް ގެ ދަށުން އެމްއެމްޓީވީ ނަމަކަށް ކިޔާ ޓީވީ ސުޓޭޝަނެއް އުފެއްދިކަމުގެ ތުހުމަތު ކުރެވިފައިވާ ކަމަށެވެ.
