ރައީސް އޮފީހުގެ ޔޫޓިއުބް ޗެނަލް ގެއްލިއްޖެ!

ދިވެހި ރާއްޖޭގެ ރައިސުލްޖުމްހޫރިއްޔާގެ އޮފީހުގެ ރަސްމީ ޔޫޓިއުބް ޗެނަލް ވީނުވީއެއް ނޭނގި ގެއްލިއްޖެ އެވެ.

ރައީސުލްޖުމްހޫރިއްޔާގެ އޮފީހުގެ ޔޫޓީއުބް ޗެނަލް ސާރޗް ކޮށްގެންވެސް ނުފެނެ އެވެ. މިކަމާއި ގުޅޭގޮތުން މައުލޫމާތު އޮޅުން ފިލުވުމަށް ރައީސް އޮފީހުގެ ޗީފް ސްޕޯކްސް ޕަރސަން ހީނާ ވަލީދު އަށް ގުޅުމުން ފޯނަށް ޖަވާބެއް ނުދެއްވަ އެވެ. އަދި ރައީސް އޮފީހުގެ ކޮމިއުނިކޭޝަން މިނިސްޓަރ ހަލީލް ވެސް ފޯނަށް ޖަވާބެއް ނުދެއްވަ އެވެ.

އެހެންކަމުން ރައީސް އޮފީހުގެ ރަސްމީ ޔޫޓިއުބް ޗެނަލް އަށް ވީ ގޮތް ސާފެއް ނުވެއެވެ. ބައެއް މަސްދަރުތަކުން ރިޕޯޓުކޮށްފައިވާ ގޮތުގައި އެ ޗެނަލް ވަނީ ހެކް ކޮށްފަ އެވެ. ނަމަވެސް ރަސްމީގޮތުން ރައީސް އޮފިހުން އެކަން އިއުލާން ކޮށްފައެއް ނުވެ އެވެ.

އެ ޗެނަލް ގެއްލިފައި މިވަނީ ރައީސް އަތޮޅުތެރެއަށް ކުރައްވާ ދަތުރުފުޅުގެ ހުރިހާ ހަރަކާތެއްހެން އެ ޗެނަލް މެދުވެރިކޮށް ލައިވް ކުރަމުން ދަނިކޮށެވެ. ރައީސް އޮފިހުގެ އެ ޗެނަލް އަކީ މީގެ ކުރިން ރާއްޖޭގެ ވެރިކަން ކޮށްފައިވާ ރައިސުންނާއި އެކިއެކި މުނާސަބަތުތަކުގެ ގިނަ އަދަދެއްގެ ވީޑިއޯ އާރކައިވް ކޮށްފައިވާ މުހިންމު ޗެނަލް އެކެވެ.

ރައީސް އޮފިހުގެ ޔޫޓިއުބް ޗެނަލް މިހާރު ފެންނަން ނެތަސް އެހެން ޕްލެޓްފޯރމް ތަކުގައި އެ އޮފިހުގެ އެކައުންޓްތައް މިހާރުވެސް ފެންނަން އެބަހުއްޓެވެ.