އިސްރާއީލުން އިތުރު ޝަރުތު ކުރިމަތި ނުކުރާނަމަ ހަނގުރާމަ ހުއްޓާލުމުގެ އެއްބަސްވުމަކަށް އާދެވިދާނެ: ހަމާސް

ޤަޠަރުގައި މިހާރު ކުރިއަށްދާ ހަނގުރާމަ ހުއްޓާލުމުގެ މަޝްވަރާތަކަކީ "ސީރިއަސް އަދި ޕޮޒިޓިވް" މަޝްވަރާތަކެއް ކަމަށް ފަލަސްތީނުގެ ރައްޔިތުންގެ ހައްގުގައި ޖިހާދު ކުރަމުންދާ ހަމާސް އިން ބުނެފިއެވެ.

ހަމާސް އިން ހާމަ ކުރި ގޮތުގައި އިސްރާއީލުން އައު ޝަރުތުތައް ކަނޑައެޅުން ހުއްޓާލައިފި ނަމަ ރަހީނު ކޮށްފައި ތިބި އިސްރާއީލުގެ މީހުން ދޫކޮށްލުމަށް އެއްބަސްވުމަކަށް އާދެވުން ވަރަށް ގާތް ކަމުގައެވެ.

ހަމާސް އިން މިކަން ހާމަ ކުރީ އަންގާރަ ދުވަހު އެ ޖަމާއަތުން ނެރުނު ބަޔާނެއްގައެވެ.

ހަނގުރާމަ ހުއްޓާލުމުގެ ވާހަކަ ތަކަށް ހޯމަ ދުވަހު އިސްރާއީލުގެ ވަފުދެއް ދޯހާއަށް ގޮސް މަޝްވަރާތަކުގައި މެދުވެރިންގެ ދައުރު އަދާ ކުރާ ފަރާތްތަކާ ވަނީ ބައްދަލު ކޮށްފައެވެ.

މި ބައްދަލުވުމުގެ ކުރިން ވެސް ޤަޠަރު، އެމެރިކާ އަދި މިޞްރުން ހަނގުރާމަ ހުއްޓާލުމާއި، އިސްރާއީލުގެ ރަހީނުން ދޫކޮށްލުމާ ގުޅޭގޮތުން ނުރަސްމީ މަޝްވަރާތައް ކުރިއަށް ގެންދާތާ އެތައް މަސްތަކެއް ފާއިތުވެގެން ގޮސްފައިވެއެވެ.

ނަމަވެސް، ފާއިތުވި އަހަރުގެ ފަހުކޮޅު އެއް ހަފްތާގެ މުއްދަތައް ހަނގުރާމަ މެދުކަނޑާލުން ފިޔަވައި، މި ކުރެވުނު މަޝްވަރާތަކުން އެދެވޭ ނަތީޖާ އެއް ފެނިފައެއް ނުވެއެވެ.

ހޯމަ ދުވަހު އިސްރާއީލުގެ ދިފާއީ ވަޒީރު އިސްރާއީލް ކަޓްޒް އިޝާރާތް ކުރެއްވި ގޮތުގައި، 2023 ވަނަ އަހަރުގެ ނޮވެމްބަރު މަހު ހަނގުރާމަ މެދުކަނޑާލި ފަހުން، ޣައްޒާގައި ތިބި ރަހީނުން ދޫކޮށްލުމާ ބެހޭ ގޮތުން "އެއްބަސްވުމަކާ މިހާ ގާތައް އާދެވިފައި" ނުވާ ކަމަށެވެ.

ދޯހާގައި ހުންނަ ހަމާސްގެ އިސް އޮފިޝަލަކުވެސް ހޯމަ ދުވަހު ބުނެފައިވަނީ އެއްބަސްވުމަކާ ހަމައަށް އައުމަށް "މިހާރު މިވަނީ ވަރަށް ބޮޑަށް ގާތްވެފައި" ކަމަށެވެ.

ނަމަވެސް އޭނާ އިންޒާރު ކުރި ގޮތުގައި އިސްރާއީލުގެ ބޮޑުވަޒީރު ބެންޖަމިން ނެތަންޔާހޫއަށް "ކުރިންވެސް ކޮންމެ ފަހަރަކު ކަން ކުރި ފަދައިން މި ފަހަރުވެސް އެއްބަސްވުން އުވާލެވިދާނެ" ކަމަށެވެ.

އޮކްޓޯބަރު 7 ގައި ހަމާސްގެ ހަނގުރާމަވެރިން އިސްރާއީލަށް ދިން ކުއްލި ހަމަލާގައި ރަހީނު ކުރި 250 އަށްވުރެ ގިނަ އިސްރާއީލު މީހުންގެ ތެރެއިން 100 އަށްވުރެ ގިނަ މީހުން އަދިވެސް ޣައްޒާ ގައި ދިރި ތިބި ކަމަށް ވަނީ އަންދާޒާ ކުރެވިފައެވެ.

ހަމާސް އިން ބުނެފައިވަނީ އިސްރާއީލުން ޣައްޒާއަށް ދެމުންދާ ހަމަލާތައް މުޅިން ހުއްޓާލައި، އިސްރާއީލުގެ ޖަލުތަކުގައި ބަންދުކޮށްފައި ތިބި އެތައް ސަތޭކަ ފަލަސްތީނު މީހުން ދޫކޮށްލުމަށް އެއްބަސްވެއްޖެނަމަ ރަހީނުން ދޫކޮށްލާނެ ކަމަށެވެ.