ޔަމާލްގެ އުންމީދަކީ 21 އަހަރުވުމުގެ ކުރިން ވޯލްޑް ކަޕާއި ޗެމްޕިއަންސް ލީގު ކާމިޔާބު ކުރުން

އުމުރުން 21 އަހަރު ވުމުގެ ކުރިން ފީފާ ވޯލްޑް ކަޕް އަދި ޔުއެފާ ޗެމްޕިއަންސް ލީގު ކާމިޔާބު ކުރަން ބޭނުންވާ ކަމަށް، ބާސެލޯނާ އަށް ކުޅެމުން އަންނަ ސްޕެއިންގެ ޒުވާން ކުޅުންތެރިޔާ ލަމީން ޔަމާލް ބުނެފި އެވެ.

ޔަމާލް މިހެން ބުނީ، އޭނާގެ މުސްތަޤުބަލާ ގުޅޭ ގޮތުން ވާހަކަ ދައްކަމުންނެވެ. މިހާރު އުމުރުން 17 އަހަރުވެފައިވާ ޔަމާލް ބުނީ، އޭނާގެ އުމުރުން 21 އަހަރުވުމުގެ ކުރިން ވޯލްޑް ކަޕްގެ އިތުރުން، ބާސެލޯނާ އާއެކު ޔުއެފާ ޗެމްޕިއަންސް ލީގު އަދި ސްޕެނިޝް ލީގު ދެ ފަހަރު ކާމިޔާބު ކުރަން ބޭނުންވާ ކަމަށެވެ. އަދި އޭނާ އަށް ޗެމްޕިއަންސް ލީގު ކާމިޔާބު ކުރެވިއްޖެ ނަމަ، ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ކާމިޔާބު ކުރުމުގެ ފުރުސަތު ވެސް ބޮޑު ވާނެ ކަމަށް ޔަމާލް ވަނީ ބުނެފަ އެވެ.

މީގެ އިތުރުން ޔަމާލް ބުނީ ބާސެލޯނާ އާއެކު އޭނާ ކުރިއަށް ދާން ބޭނުންވާ ކަމަށާއި، އެ ކުލަބާ އެކު ގިނަ ކާމިޔާބީތައް ޙާސިލު ކުރަން ބޭނުންވާ ކަމަށެވެ. އަދި ބާސެލޯނާ އަކީ އަބަދު ވެސް އޭނާ ވަރަށް ލޯބިވާ ކުލަބެއް ކަމަށާއި، އެ ކުލަބަށް ކުޅުމުގެ ފުރުސަތު ލިބުމަކީ ފަޚުރުވެރިވާ ކަމެއް ކަމަށް ވެސް ޔަމާލް ވަނީ ބުނެފަ އެވެ.

ބާސެލޯނާގެ ސީނިއާ ޓީމުން ޔަމާލް އަށް ފުރުސަތު ލިބުނީ 2023 ވަނަ އަހަރު އެވެ. އޭގެ ފަހުން އޭނާ ވަނީ ބާސެލޯނާ އަށް ކުޅެދިން 72 މެޗުގައި 13 ލަނޑު ޖަހައިފަ އެވެ. އަދި ބާސެލޯނާ އިން 23-2022 ވަނަ ސީޒަންގެ ސްޕެނިޝް ލީގު ކާމިޔާބު ކުރިއިރު، ބާސެލޯނާގެ ސްކޮޑުގައި ޔަމާލް ހިމެނެ އެވެ. އޭނާ އަކީ މިވަގުތު ބާސެލޯނާގައި ތިބި ކުޅުންތެރިންގެ ތެރެއިން އެންމެ މުހިންމު އެއް ކުޅުންތެެރިޔާ އެވެ.

މީގެ އިތުރުން ސްޕެއިންގެ ޤައުމީ ޓީމުގައި ވެސް ޔަމާލް އަންނަނީ މޮޅު ކުޅުމެއް ދައްކަމުންނެވެ. ސްޕެއިންގެ ޤައުމީ ޓީމުން ވެސް އޭނާ އަށް ފުރުސަތު ލިބުނީ 2023 ވަނަ އަހަރު އެވެ. ޔަމާލް ވަނީ މިހާތަނަށް ސްޕެއިންގެ ޤައުމީ ޓީމަށް ކުޅެދިން 17 މެޗުގައި ތިން ލަނޑު ޖަހައިފަ އެވެ. ސްޕެއިން އާއެކު އޭނާ ވަނީ މިއަހަރު ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތް ކާމިޔާބު ކޮށްފަ އެވެ. އެ މުބާރާތުގެ އެންމެ މޮޅު ޒުވާން ކުޅުންތެރިޔަކަށް ހޮވުނީ ވެސް ޔަމާލް އެވެ.