ހަމާސް ބަލިކުރުމަށްފަހު ފުރިހަމަ މިނިވަން ކަމާއެކު އިސްރާއީލަށް ޣައްޒާގައި ބޭނުން ގޮތެއް ހެދޭނެ: ދިފާއީ ވަޒީރު
އިސްރާއީލުން އަންގާރަ ދުވަހުގެ ފަތިހުގެ ވަގުތެއްގައި ޣައްޒާ ސްޓްރިޕްގެ މެދުތެރޭގައި ހުރި އާންމުން ދިރިއުޅޭ އެޕާޓްމަންޓަކަށް ބޮން އަޅާ އެއް ޢާއިލާއަކަށް ނިސްބަތްވާ 10 އާންމު ރައްޔިތުން ވަނީ ޝަހީދު ކޮށްލާފައި
ނޮވެމްބަރު 11، 2024 ގައި ޣައްޒާ އަށް ވަންނަން ތައްޔާރު ވަމުން ދިޔަ އިސްރާއީލުގެ ސިފައިންގެ ފައުޖެއް
ހަމާސް ބަލިކުރުމަށްފަހު އިސްރާއީލަށް ޣައްޒާގެ ސަލާމަތީ ބާރު ލިބި، ފުރިހަމަ މިނިވަންކަމާއެކު ބޭނުން ގޮތަކަށް ކަންކަން ކުރެވޭނެ ކަމަށް އިސްރާއީލުގެ ދިފާޢީ ވަޒީރު އިސްރާއީލް ކަޓްޒް އަންގާރަ ދުވަހު ވިދާޅުވެއްޖެއެވެ.
އިސްރާއީލުން ޣައްޒާ ގައި ހިނގަމުންދާ އަނިޔާވެރި ހަނގުރާމަ އަށް އަހަރަކަށް ވުރެ ގިނަ ދުވަސް ފާއިތުވެގެން ގޮސްފައިވާއިރު، ކޮންމެ ރެޔަކާއި ދުވާލު ޣައްޒާގެ އެތައް ތަނަކަށް ބޮން އަޅާ ފަލަސްތީނުގެ އެތައް ބަޔަކު ގެންދަނީ ޝަހީދު ކުރަމުންނެވެ. އޭގެ އިތުރުން ކޮންމެ ދުވަހަކު އާންމުންގެ އެތައް ގެއެއްގައި ޑައިނަމައިޓް ހަރުކޮށް ގެންދަނީ ގޮއްވަމުންނެވެ.
އެންމެ ފަހުން އަންގާރަ ދުވަހުގެ ފަތިހުގެ ވަގުތެއްގައި ޣައްޒާ ސްޓްރިޕްގެ މެދުތެރޭގައި ހުރި އާންމުން ދިރިއުޅޭ އެޕާޓްމަންޓަކަށް ބޮން އަޅާ އެއް ޢާއިލާއަކަށް ނިސްބަތްވާ 10 އާންމު ރައްޔިތުން ވަނީ ޝަހީދު ކޮށްލާފައެވެ. އޭގެ ތެރޭގައި ކުޑަކުދިންނާއި އަންހެނުން ހިމެނެއެވެ.
އޭގެ އިތުރުން ނުރައްކާތެރި އެހެން ހާދިސާ އެއްގައި ކަމާލް އަދްވާން ހޮސްޕިޓަލަށް އަމާޒުކޮށް ޑްރޯންތަކުން 10 އަށް ވުރެ ގިނަ ބޮން އަޅާފައިވެއެވެ.
ތަކުރާރުކޮށް ބޮންއެޅުމާއި އެ ސަރަޙައްދު ހިސޯރު ކޮށްފައި އޮތުމުގެ ސަބަބުން ހޮސްޕިޓަލުގެ ކަރަންޓު މުޅިން ކެނޑި، ބޭސްފަރުވާއަށް ބޭނުންވާ ތަކެއްޗާއި މެޑިކަލް ސަޕްލައި ވަނީ ވަރަށް ބޮޑަށް މަދުވެފައެވެ.
އަނެއްކޮޅުން ޣައްޒާ ސްޓްރިޕްގެ ދެކުނުގައިވާ ޚާން ޔޫނިސްގެ ޚުޒާޢާ އަވަށުގަ އާއި ނުސީރާތު ކޭމްޕުގެ އުތުރުގައި ބޮޑެތި އާޓިލަރީ ހަމަލާތައް ދަނީ ދެމުންނެވެ. އަދި ރަފާ ސިޓީގައި އާންމުންގެ ގެތައް ދަނީ ޑައިނަމައިޓް އަޅާ ސުންނާފަތި ކުރަމުންނެވެ.
