ބާސެލޯނާގެ އެއްބަސްވުން ޔަމާލް އައު ކުރާނެ

ބާސެލޯނާ އަށް ކުޅެމުން އަންނަ ސްޕެއިންގެ ޒުވާން ކުޅުންތެރިޔާ ލަމީން ޔަމާލް، އެ ކުލަބުގެ އެއްބަސްވުން އައު ކުރާނެ ކަމަށް އޭނާގެ އެޖެންޓް ޖޯޖް މެންޑޭސް ބުނެފި އެވެ.

އުމުރުން 17 އަހަރުގެ ކުޅުންތެރިޔާ އަށް ބާސެލޯނާގެ ސީނިއާ ޓީމުން ޖާގަ ލިބުނީ 2023 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެ އެއްބަސްވުމުގެ މުއްދަތު ހަމަވުމުގެ ކުރިން، ބާސެލޯނާ އިން ޔަމާލްގެ އެއްބަސްވުން އައު ކުރަން ބޭނުންވާ ކަމަށް މީޑިިއާ ތަކުގައި ވަނީ ރިޕޯޓުކޮށްފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ޔަމާލްގެ އެޖެންޓު މެންޑޭސް ބުނީ، ބާސެލޯނާ އާއެކު ޔަމާލް އައު އެއްބަސްވުމެއްގައި ސޮއި ކުރާނެ ކަމަށާއި، އެކަން އެގޮތުގައި ކުރިއަށް ދާނެ ކަމަށެވެ. އޭނާ ބުނީ ޔަމާލް ހުރީ ބާސެލޯނާގައި ހިތްހަމަ ޖެހިގެން ކަމަށާއި، އެ ކުލަބާ އެކު ކުރިއަށް ދާން ޔަމާލް ބޭނުންވާ ކަމަށެވެ.

ޔަމާލް އަންނަނީ ވެސް ބާސެލޯނާގައި މޮޅު ކުޅުމެއް ދައްކަމުންނެވެ. އޭނާ ވަނީ މިހާތަނަށް ބާސެލޯނާ އަށް ކުޅެދިން 72 މެޗުގައި 13 ލަނޑު ޖަހައިފަ އެވެ. ބާސެލޯނާ އާއެކު އޭނާ ވަނީ ސްޕެނިޝް ލީގު ވެސް ކާމިޔާބު ކޮށްފަ އެވެ. ބާސެލޯނާގެ އިތުރުން ޔަމާލް އަންނަނީ ސްޕެއިންގެ ޤައުމީ ޓީމުގައި ވެސް ހިމެނިގެން ކުޅެމުންނެެވެ. ޤައުމީ ޓީމާ އެކު އޭނާ ވަނީ މިއަހަރުގެ ޔޫރޯ ފުޓުބޯޅަ މުބާރާތް ވެސް ކާމިޔާބު ކޮށްފަ އެވެ.