ޣައްޒާ ގައި އިސްރާއީލުގެ އަނިޔާވެރި ހަމަލާތަކުގައި ޝަހީދުވި މީހުންގެ އަދަދު 45،000ން މައްޗަށް ހިނގައްޖެއެވެ.
ހަމަލާތަކުގައި ޝަހީދު ވާ މީހުންނާއި ޒަޚަމްވާ މީހުންގެ އަދަދު އިތުރުވަމުން ދިޔަ ނަމަވެސް އިސްރާއީލުގެ ބާރުތަކުން ޣައްޒާ އަށް ދޭ ހަމަލާތަކަށް ކުޑަވެސް މަޑުޖެހުމެއް އައިސްފައެއް ނުވެއެވެ.
ހޯމަ ދުވަހުގެ ރޭ ޣައްޒާގެ އުތުރުގައި ހުންނަ ކަމާލް އަދްވާން ހޮސްޕިޓަލަށް ހަމަލާދީފައި ވާއިރު، ބައިތު ލަހިޔާ ގައި 2 މީހުން، ޝާޠީ ރެފިއުޖީ ކޭމްޕުގައި 4 މީހުން، އަދި ޣައްޒާ ސިޓީގައި އިތުރު 5 މީހުން ޝަހީދު ކޮށްލާފައިވެއެވެ.
ކަމާލު އަދްވާން ހޮސްޕިޓަލަށް މީގެ ކުރިންވެސް އިސްރާއީލުން ހަމަލާދީފައި ވާއިރު، އެތަނުގެ މުވައްޒަފުން ބުނެފައި ވަނީ ހޮސްޕިޓަލުގެ އިންޓެންސިވް ކެއަރ ޔުނިޓަށް ސްނައިޕަރުން ހަމަލާދީފައިވާ ކަމަށެވެ. ޣައްޒާގައި ހުންނަ އަލް އަޤްޞާ ޓީވީން ބުނި ގޮތުގައި އިސްރާއީލުގެ ކުއަޑްކޮޕްޓަރ ޑްރޯންތަކުން ހޯމަ ދުވަހުގެ ރޭ ހޮސްޕިޓަލަށް ވަނީ 10ށް ވުރެ ގިނަ ބޮން އަޅާފައެވެ. މީގެ ސަބަބުން ހޮސްޕިޓަލުގެ ތިންވަނަ ފަންގިފިލާގައި އަލިފާން ރޯވެފައިވާ ކަމަށް ވެސް ރިޕޯޓު ކޮށްފައިވެއެވެ.
މި ހަމަލާތައް ދިން އިރު އޭގެ ކުރީ ދުވަހު، އިސްރާއީލުގެ ބާރުތަކުން ޚާން ޔޫނިސްގައި ހުރި އދ. ގެ އަންރުވާ އިން ހިންގާ ސްކޫލަކަށް ބޮންއަޅައި މަދުވެގެން 20 މީހުން ޝަހީދު ކޮށްލާފައެވެ. އަދި ބައިތު ހަނޫންގައި ހުރި އެހެން ސްކޫލަކަށް އެއްގަމުން ހަމަލާދީ 43 ފަލަސްޠީނު މީހުން ޝަހީދު ކޮށްލިއެވެ.
ޣައްޒާ ސިޓީގެ ހުޅަނގު އުތުރުގައި އޮންނަ އަލް ޝާޠީ ރެފިއުޖީ ކޭމްޕުގައި ތިބި ބަޔަކަށް އިސްރާއީލުގެ ޑްރޯނަކުންނާއި މިސައިލްތަކަކުން ހޯމަ ދުވަހުގެ ރޭ ހަމަލާދީފައިވެއެވެ.
އަލްޖަޒީރާގެ ރިޕޯޓަރު ބުނެފައިވަނީ 4 މީހުން ވަގުތުން ޝަހީދުވި ކަމަށެވެ.
ޝާތީ ރެފިއުޖީ ކޭމްޕަށް ދިން ހަމަލާގެ މަންޒަރުތައް ދައްކަން ކެރޭ ވަރަށް ވުރެ އަނިޔާވެރި ކަމަށް އަލްޖަޒީރާ އިން ބުނެފައިވެއެވެ. އެހެން ނަމަވެސް މިސައިލްތަކުން ހަށިތައް ކުދިކުދިވެފައިވާ ކަމަށް ރިޕޯޓަރު ބުންޏެވެ. އަލްޖަޒީރާ އިން ބުނާ ގޮތުގައި އިސްރާއީލުގެ ސިފައިން ބޭނުންކުރާ މިސައިލްތަކަށް ހުންނަނީ މޮހޮރާއި ކުދިކޮށްފައިވާ މައުދަންތައް އަޅާ ފުރާފައެވެ. އަދި އެތަކެތި ގޮވުމުން، ހަށިގަނޑުގެ ތެރެއަށް ތޮރުފިގެން ގޮސް ގައިން ބައިވަރު ލޭތައް ބޭރުވުމަށް މަގުފަހިވާ ކަމަށް ބުނެފައިވެއެވެ.
2023 އޮކްޓޯބަރު 7 އިން ފެށިގެން އިސްރާއީލުން ގާޒާއާ ދެކޮޅަށް ކުރަމުންދާ ހަނގުރާމައިގައި މަދުވެގެން 45،028 ފަލަސްޠީނު މީހުން ޝަހީދުވެ، 106،962 މީހުން ޒަޚަމްވެފައިވެއެވެ.
