އެއް ވަނައިގައި ބާސެލޯނާ އަށް ލީޑު ގެއްލިއްޖެ

ސްޕެނިޝް ލީގުގައި ލެގާނެސްއާ ދެކޮޅަށް ކުޅުނު މެޗުން ބަލިވެ، އެއް ވަނައިގައި ހިފަހައްޓަމުން އައި ލީޑު ބާސެލޯނާ އަށް ގެއްލިއްޖެ އެވެ.

އާދީއްތަ ދުވަހުގެ ރޭ ލެގާނެސްއާ ދެކޮޅަށް ކުޅުނު މެޗުން ބާސެލޯނާ ބަލިވީ 1-0 އިންނެވެ. މެޗުގައި ލެގާނެސް އިން ހަމައެކަނި ލަނޑު ޖެހީ ވެސް ފުރަތަމަ ހާފުގަ އެވެ.

މެޗު ފަށައިގެން ހަތަރު ވަނަ މިނެޓުގައި އެ ޓީމުން ވަނީ ބާސެލޯނާ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ސާޖިއޯ ގޮންޒޭލޭޒް އެވެ. އެ ލަނޑު އޭނާ ޖެހީ އޮސްކާ ރޮޑްރީގޭޒް ތަނަވަސްކޮށްދިން ފުރުސަތެއްގަ އެވެ. މެޗުގެ ނަތީޖާ ހަމަހަމަ ކުރުމަށް ބާސެލޯނާ އަށް ވަނީ ފުރުސަތު ލިބިފަ އެވެ. އެ ޓީމުގެ ޕޮލެންޑުގެ ފޯވާޑު ރޮބާޓް ލެވަންޑޯސްކީ އަށް ލިބުނު އެއްވެސް ފުރުސަތެއް އޭނާ އަށް ނިންމާލެވޭ ގޮތެއް ނުވި އެވެ.

މެޗުން ބާސެލޯނާ ބަލިވެފައިވާއިރު، އެއް ވަނައިގައި އެ ޓީމު އޮތީ މިހާތަނަށް ކުޅެފައިވާ 18 މެޗުން 38 ޕޮއިންޓާ އެކު އެވެ. ދެ ވަނައިގައި އެތުލެޓިކޯ އަށް ވެސް ލިބެނީ 38 ޕޮއިންޓެވެ. ނަމަވެސް އެތުލެޓިކޯ އޮތީ ބާސެލޯނާ އަށް ވުރެ އެއް މެޗު މަދުން ކުޅެފަ އެވެ. އެހެންކަމުން، މެޗުގެ އަދަދު ހަމަކުރާއިރު، އެތުލެޓިކޯ އަށް އެއް ވަނަ މަގާމަށް ޖެހިލުމުގެ ފުރުސަތު އޮންނާނެ އެވެ. ތިން ވަނައިގައި އޮތް ރެއާލް މެޑްރިޑަށް 17 މެޗުން ލިބެނީ 37 ޕޮއިންޓެވެ.