ޖަރުމަނު ލީގުގައި މައިންޒާ ދެކޮޅަށް ކުޅުނު މެޗުން ބަލިވެ، މި ސީޒަންގެ ލީގުގައި ބަޔާން މިއުނިކުން ފުރަތަމަ ބައްޔާ ކުރިމަތިލާން ޖެހިއްޖެ އެވެ.

މައިންޒުގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 2-1 އިން ބަޔާންގެ މައްޗަށް ކުރި ހޯދައިފަ އެވެ. މެޗުގައި މައިންޒުން ދެ ލަނޑު ޖަހައި ލީޑު ހޯދި ފަހުން، ބަޔާނުން ވަނީ ލަނޑެއް ޖަހައިފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، މައިންޒަށް ލީޑު ނަގައިދިނީ ލީ ޖައެ ސުން އެވެ. އޭގެ ފަހުން މެޗުގެ ދެ ވަނަ ހާފުގައި އޭނާ ވަނީ ދެ ވަނަ ލަނޑެއް ޖަހައި، މައިންޒަށް ލީޑު ފުޅާ ކޮށްދީފަ އެވެ. މެޗުގެ 60 ވަނަ މިނެޓުގައި އޭނާ އެ ލަނޑު ޖެހީ އާމިންޑޯ ސިއެބް ތަނަވަސްކޮށްދިން ފުރުސަތެއްގަ އެވެ. މެޗުގައި ބަޔާންގެ ހަމައެކަނި ލަނޑު 87 ވަނަ މިނެޓުގައި ޖެހީ ލެރޯއީ ސާނޭ އެވެ.

މިއީ މި ސީޒަންގެ ޖަރުމަނު ލީގުގައި ބަޔާންގެ ފުރަތަމަ ބައްޔެވެ. މިހާތަނަށް ކުޅުނު 14 މެެޗުން 33 ޕޮއިންޓާ އެކު ބަޔާން އޮތީ އެއް ވަނައިގަ އެވެ. 10 މެޗުން ބަޔާން މޮޅުވެފައިވާއިރު، އެއް މެޗުން ބަލިވެ އަދި އަނެއް ތިން މެޗުން ވަނީ އެއްވަރުވެފަ އެވެ. ދެ ވަނައިގައި އެންމެ ފަހުގެ ޗެމްޕިއަން ބަޔާ ލެވަކޫސަނަށް ލިބެނީ 29 ޕޮއިންޓެވެ.